21/09/2020 22:30
728 x 90

Müstəqillik, suverenlik və öz gücünə güvən Azərbaycan gəncinə nə verir – İdeya Davosdan gəldi...

Azər Həsrət: “Gənclərimizin sözügedən ideologiyaya söykənməsi onların gücünü daha da artırır”

img

Azərbaycanın, o cümlədən, gənc nəslin əsas ideyası və ideologiyası suverenlik, müstəqillik və öz ehtiyatlarımıza güvənməkdir. Bunu Prezident İlham Əliyev Davos Dünya İqtisadi Forumu çərçivəsində "Strateji baxış: Avrasiya" mövzusunda keçirilən panel iclasında iştirakı zamanı moderatorun suallarını cavablandırarkən deyib.

Ölkə başçısı Azərbaycan gəncləri ilə bağlı maraqlı məqamlara toxunub: “Lakin fakt ondan ibarətdir ki, Azərbaycan gəncləri küçələrdə deyil, gənclər universitetlərdə, məktəblərdədir, gənclər startap biznesindədir, gənclər hökumət məsələlərinə fəal cəlb olunublar. Biz çox nəhəng könüllülər hərəkatına başlamışıq və on minlərlə insan ictimai xidmətlər sektorunda könüllülər qismində təlimlərdə iştirak edib. Sonra da biz yaxşı nəticələr göstərənləri hökumət təşkilatlarına işə götürürük”.

Prezident onu da qeyd edib ki, dünyanın müxtəlif yerlərində gənclərin küçələrdə olması onları nəyinsə qane etmədiyinə görə baş verir: “Onları həyat qane etmir, onların hökumətə olan etimadı itib. Hökumət hakimiyyətə gəlmək üçün populist şüarlardan istifadə etmiş, lakin sonra vəd etdiklərini yerinə yetirə bilməmişdir. Əslində, onlar yalan danışıblar. Bunun əsas səbəbi isə siyasətçilərin məsuliyyətsizliyidir. Çünki biz təkcə Avropada yox, bir çox ölkələrdə onu müşahidə edirik ki, hökumət hakimiyyətə gəlir və dərhal hökumətin rəhbəri təzyiq altında olur. İnsanlar onu seçir, lakin bir ildən sonra o, ona göstərilən etimadı itirir. Çünki yerinə yetirilməsi mümkün olmayan vədlər verilmişdir. Azərbaycanda biz həmişə sözümüzə əməl edirik. Biz heç vaxt yerinə yetirə bilməyəcəyimiz məsələləri dilimizə gətirmirik və insanlarımızın həyat standartları ildən-ilə daha da yaxşılaşır”.

Bütövlükdə, gənclərin sözügedən prinsiplərə əsaslanan ideologiyaya söykənməsi onlara hansı gücü verir?

  • “Prezidentin ölkə gəncləri ilə bağlı dediyi o fikirlər gənclərimiz üçün əlavə stimul rolunu oynayır”

Məsələyə münasibət bildirən media eksperti Azər Həsrət buna bir neçə kontekstdən yanaşdı: “Prezident İlham Əliyevin növbəti dəfə Davosda yüksək səviyyədə iştirakı Azərbaycan dövlətinin əhəmiyyətini bir daha təsdiqləmiş olur. Üstəlik, onun şəxsi liderlik özəllikləri, danışıqlar aparması, ümumiyyətlə, ayrı-ayrı şəxslərlə görüşlər keçirməsi xüsusən də Azərbaycan gənclərinə əlavə stimul verir. Yəni bir Azərbaycan liderinin bu cür yüksək səviyyəli toplantılarda, görüşlərdə iştirakı gəncləri həvəsləndirir. Üstəlik, onun ölkə gəncləri ilə bağlı dediyi o fikirlər gənclərimiz üçün əlavə stimul rolunu oynayır. Müstəqilliyin, suverenliyin qorunması, bu məsələdə gənclərin üzərinə vəzifələrin düşməsi, onlara etimadın göstərilməsi ölkə başçısının önəm verdiyi siyasi kursdur. O cür yüksək səviyyəli tədbirdə Prezidentin bu cür fikirlər səsləndirməsi həm gənclərə etimaddır, həm də əlavə məsuliyyət deməkdir. Yəni bu, bir növ, o deməkdir ki, cənab Prezident Azərbaycan gənclərinə güvənir, inanır. Bununla belə, onlardan bir məsuliyyət də tələb edir ki, ölkəmizin gələcəyinin qarantiyası məhz gənclərimizdir. Düşünürəm ki, gənclərimizin sözügedən ideologiyaya söykənməsi onların gücünü daha da artırır. Gənclərimizin daha da irəli getməsi, inkişaf etməsi Azərbaycanın dövlət müstəqilliyinin möhkəmlənməsində ciddi rol oynamaları üçün əlavə imkanlar açır”.

Vidadi ORDAHALLI

Son xəbərlər