Rəşad Həsənov: “Bu, müəyyən qədər xarici investisiyaya əlavə çıxış imkanları yaradır”
Azərbaycanda Dünya İqtisadi Forumunun afilə edilmiş regional mərkəzi yaradılır. Bununla bağlı müvafiq niyyət protokolu Azərbaycan Prezidenti İlham Əliyevlə Dünya İqtisadi Forumunun prezidenti Borge Brendenin görüşü zamanı imzalanıb.
Sənədi Prezident İlham Əliyev və forumun prezidenti Borge Brende imzalayıblar. Dövlət başçısı qeyd edib ki, biz Davos Forumu ilə bu mühüm sənədi imzalayan ilk ölkələr arasında olmağımızla çox fəxr edirik: “Bu, həqiqətən də bizim əlaqələrimizdə yeni səhifədir. Ümidvaram ki, gələcək keçmiş qədər uğurlu olacaq”.
Görüşdə o da vurğulanıb ki, bu cür mərkəzlər çox məhdud sayda ölkələrdə yaradılır və onların əsas məqsədi dördüncü sənaye inqilabının səbəb olduğu çağırış və imkanların həyata keçirilməsidir.
Bütün hallarda, Dünya İqtisadi Forumunun Azərbaycanda regional mərkəzinin yaradılması mühüm hadisədir. Bu cür mərkəzlərin çox məhdud sayda ölkələrdə yaradıldığını nəzərə alsaq, belə bir mərkəzin Azərbaycanda yaradılması nəyin göstəricisidir?
- “Digər tərəfdən, bu kimi beynəlxalq təşkilatların Azərbaycanda fəaliyyət göstərməsi xüsusilə qeyri-neft sektorunun inkişafı baxımından əhəmiyyətlidir”
Məsələyə münasibət bildirən iqtisadçı-ekspert Rəşad Həsənov buna bir neçə aspektdən yanaşdı: “Məsələ ondadır ki, bu kimi beynəlxalq təşkilatların Azərbaycanda fəaliyyət göstərməsi xüsusilə qeyri-neft sektorunun inkişafı baxımından əhəmiyyətlidir. Bu, müəyyən qədər xarici investisiyaya əlavə çıxış imkanları yaradır. Digər tərəfdən, adətən, bu kimi institutlar mütəmadi olaraq real sektorun qiymətləndirilməsi, iqtisadi vəziyyətin dəyərləndirilməsi, həmçinin, mövcud strateji inkişaf proqramları ilə bağlı həm araşdırmalar, tədqiqatlar aparırlar, həm də tövsiyələr hazırlayırlar. Ona görə də bu təşkilatın akkreditasiya olunmuş nümayəndəliyinin Azərbaycanda yerləşməsi müsbət haldır. Bunun sayəsində Azərbaycan iqtisadiyyatının inkişafı ilə bağlı keyfiyyətli tövsiyələr hazırlana bilər. Hesab edirəm ki, bu və digər baxımdan Dünya İqtisadi Forumunun Azərbaycanda regional mərkəzinin yaradılması müsbət əhəmiyyətə malikdir”.
Vidadi ORDAHALLI
