21/02/2020 19:29
728 x 90

Azərbaycan sərhədçiləri Qazax-Ağstafa istiqamətində düşmənin psixoloji üstünlük qazanmaq səylərini qırdı – 2018-ci ilin sonlarından gedən proses...

img

Dağlıq Qarabağ münaqişəsinin dinc müstəvidə həllinin dalana dirəndyi bir vaxtda konfliktin hərbi müstəvidə çözülmə ehtimalı artmaqda davam edir. Son dövrlərdə cəbhə xəttində atəşkəs hallarının düşmən tərəfindən tez-tez pozulması da savaş ehtimalını artırır. Bu fonda diqqət çəkən məqamlardan biri də sərhəd xəttində olanlardır.

Artıq faktdır ki, Azərbaycan-Ermənistan dövlət sərhədi boyu müxtəlif vaxtlarda situasiyanın kəskinləşməsi müşahidə olunur. Xüsusən də Azərbaycan-Ermənistan dövlət sərhədinin Qazax və Ağstafa ra­yonları istiqamətində bu hal özünü qabarıq göstərir. Amma o da faktdır ki, həmin istiqamətlərdə sərhədlərin müdafiə və mühafi­zəsini həyata keçirən Döv­lət Sərhəd Xidmətinin (DSX) Sərhəd Qoşun­ları hər dəfə düşmənin layiqli cavabını da verir. Burada istənilən düşmən təxribatının qarşısı layiqincə alınır. Sərhəd məsələləri üzrə ekspert, Dövlət Sərhəd Xidmətinin ehtiyatda olan polkovniki Afəq Abiyev də vurğulayır ki, Dövlət Sərhəd Xidməti tərəfindən son bir ildə Azərbaycan-Ermənistan dövlət sərhədində düşmənin əməliyyat imkanlarının məhdudlaşdırılması Ermənistan tərəfinin həmin istiqamətə diqqəti artırmasına səbəb olub. Ehtiyatda olan polkovnikin sözlərinə görə, Azərbaycan DSX Sərhəd Qoşunlarının qısa müddətdə dövlət sərhədində, xüsusilə Ermənistanın əsas kommunikasiya xətlərinin (qaz kəməri və Gürcüstandan Ermənistana gedən avtomobil magistralı) keçdiyi ərazilərə nəzarət imkanları əldə etməsi İrəvanı çıxılmaz vəziyyətə salıb.

Bundan sonra düşmən qeyd olunan istiqamətdəki hərbi hissələrində və yaşayış məntəqələrində yaranan psixoloji gərginliyi azaltmaq məqsədilə təxribat fəaliyyətlərinə daha çox diqqət yönəltməyə başlayıb:“Ermənistan tərəfinə Qazax və Ağstafa rayonları istiqamətində dövlət sərhədindəki bizim vəziyyət bəllidir. Qeyd etmək istərdim ki, 2018-ci ilin sonunadək Sərhəd Qoşunlarımız düşmənlə üzbəüz olmamışdı. Qazax və Ağstafa istiqamətində biz dövlət sərhədinin mühafizəsini üzərimizə götürdükdə, qarşı tərəf düşündü ki, sərhədçilərin təcrübəsizliyindən istifadə edib təxribat yarada və psixoloji üstünlüyü qazana bilər. Lakin 2019-cu ilin fevralından düşmənin sərhəddə başlayan təxribat fəaliyyətlərinin heç biri effektiv olmadı. Əksinə, bölmələrimiz, bildiyiniz kimi, 2-ci Şıxlı və “Babakər” yüksəkliyi istiqamətlərində yeni mövqelərə çıxaraq möhkəmləndilər. Nəticədə daha geniş əraziyə nəzarət etmək imkanı qazandıq. Daha sonra, oktyabr ayında mülki sakinimizi – traktorçumuzu vurdular. Onun da qisası layiqincə alındı və düşmənin peşəkar snayperləri tərəfimizdən məhv edildi”.

Ehtiyatda olan polkovnik “azeridefence”ə açıqlamasında qeyd edir ki, itkilərin artması, eləcə də sərhəddə yaşadığı uğursuzluqların əvəzini çıxmaq, itirilmiş nüfuzunu bərpa eləmək məqsədilə Ermənistan tərəfi həm dövlət sərhədində, həm də informasiya məkanında təxribatlara davam edir:“Düşmən təxribatlar vasitəsilə həm Azərbaycan tərəfinin müdafiə sistemini öyrənmək, həm də sərhəd qoşunlarımızın təmas xəttində xidmət edən şəxsi heyəti üzərində psixolji üstünlük əldə etmək niyyəti güdür. Digər tərəfdən, Paşinyan hökuməti Ermənistan daxilindəki narazılıq cəhdlərinin qarşısını almağa və diqqəti cəbhəyə yönəltməyə çalışır”.

Abiyevin sözlərinə görə, yanvarın 7-dən bu günədək dövlət sərhədində Ermənistan ordusunun, biri taborun qərargah rəisi olmaqla, 5 hərbi qulluqçusu zərərsizləşdirilib: “Həyata keçirilən tədbirlər nəticəsində düşmənin üzləşdiyi itkilər, düşdüyü çıxılmaz durum barədə məlumatlıyıq. Əvvəlki illərdə apardığımız təhlillər əsasında deyə bilərəm ki, düşmən bu dəfə də çoxsaylı itkilərini bir-bir avtoqəza, hansısa bədbəxt hadisə adıyla yayımlamağa çalışacaq”. 

Qeyd edək ki, bu gün sərhədçilərimiz sərhədboyu ərazilərdə bir sıra mühüm strateji və həyati vacib obyektləri, o cümlədən Gürcüstan-Ermənistan qaz kəmərini və kompressor stansiyasını nəzarətdə saxlaya bilir. Baş verənlərdən erməni tərəfi də kifayət qədər narahatdır. Bundan əvvəl  erməni hərbi ekspert, keçmiş müdafiə naziri Seyran Ohanyanın müşaviri olmuş David Camalyan bildirib ki, əslində Azərbaycanın sərhəd qoşunlarının Ermənistanla sərhədin Qazax və Ağstafa istiqamətlərində yerləşdirilməsi təsadüfi deyil və bu addım Azərbaycanın Qarabağı geri almaq üçün hücum əməliyyatlarının bir hissəsi olacaq: “Azərbaycan Qarabağa qarşı hücuma hazırlaşır və prinsipcə istisna etmək olmaz ki, formalaşdırılan hücum qruplaşmasına onların 3-cü ordu korpusunun bölmələri də daxil ediləcək. İndiki halda prinsipial olaraq bunu qeyd etmək vacibdir: Azərbaycanda həm daxili qoşunlar, həm də sərhəd qoşunları Qarabağa mümkün hücum zamanı döyüş əməliyyatlarına tam cəlb edilmələri nəzərə alınmaqla təşkil olunub. Yəni Azərbaycanın sərhəd qoşunlarını təkcə sərhədlərin qorunması funksiyasını həyata keçirən struktur kimi deyil, qarşısında həm də döyüş vəzifələrinin yerinə yetirilməsi görəvi dayanan tammiqyaslı döyüş vahidi kimi görmək lazımdır. Ona görə də biz arxayın olmalı deyilik ki, sərhədin şimal-şərq hissəsində daha sakitlik olacaq”.

Tahir TAĞIYEV

Son xəbərlər