21/09/2020 23:47
728 x 90

Bu dairədə kimin deputat olmaq şansı getdikcə durulur…

img

Parlament seçkilərinin təbliğat-təşviqat mərhələsi də qızğın fazasına qədəm qoyub. Əsas təbliğatın sosial şəbəkələr vasitəsilə aparıldığı nəzərə çarpır. Namizədlərin istifadə etdikləri digər təbliğat vasitələri də sosial şəbəkələrdə ictimailəşdirilir. Bura keçirilən görüşlərin, posterlərin yapışdırılmasının video və fotoçəkilişlərinin də namizədlərin səhifələrində paylaşılması faktını  aid edə bilərik.

Elə sosial şəbəkələrdə aparılan təbliğatdan hansı dairədə gərgin mübarizənin getdiyi barədə təəssürat yarana bilir. Biz də belə fəal dairələrlə bağlı öz mülahizələrimizi qeyd etmək qərarına gəldik. Bundan əvvəl də təhlil etdiyimiz dairələrlə bağlı maksimum obyektivliyə söykənmişik. Fəal seçki marafonunun aparıldığı fəal dairələrdən biri də 79 saylı İmişli Seçki Dairəsidir. MSK-nın rəsmi saytında həmin dairədən 20 nəfərin namizədliyinin qeydə alındığı göstərilir. Qeyd edək ki, bundan əvvəlki çağırışda dairəni Milli Məclisdə təmsil edən tanınmış iş adamı Əsabil Qasımov bu seçkilərə qatılmayıb. Seçkilərdən əvvəl onun oğlunun dairədən seçkilərə qatılmaq niyyətinin olduğu haqda söhbətlər gəzsə də, son anda belə bir qərarın verilmədiyinin şahidi olduq. Bu faktorun özü, yəni rayona təsir gücü olan bir namizədin seçkidə maraqlı tərəf kimi çıxış etməməsi digər namizədlər üçün şansı artırıb. Bundan əlavə, hakim Yeni Azərbaycan Partiyası da həmin dairədən çox da tanınmış olmayan bir namizədlə çıxış edir ki, bu da namizədlərə seçilmək şansı ilə bağlı əlavə ruh verir. Siyahıdan görünür ki, namizədlərin daha çox qeydə alındığı dairələrdən biridir. Hazırda mandat uğrunda 20 namizəd mübarizə aparır. Paytaxtdan uzaq dairə olsa da, siyahıda respublika səviyyəsində tanınan adamların olduğunu görürük. Əkbərli İltizam Nizam oğlu bundan əvvəlki seçkilərdə Müsavat Partiyasının üzvü kimi mandat qazanmış şəxsdir. 2015 seçkilərində iştirak etdiyinə görə onun məsələsinə partiyada baxılıb. Partiyadan xaric edilməsi və ona töhmət verilməsi təklifləri səsə qoyulub. Səs çoxluğu ilə İltizam Əkbərliyə töhmət verilməsi barədə qərar qəbul olunub.

Siyahıdakı namizədlərin böyük əksəriyyətinin öz təşəbbüsü ilə irəli sürüldüyünü görürük. Yalnız iki namizəd istisnadır. Onlardan biri YAP-ın təmsilçisi olan, Kürdəmir Regional Mədəniyyət İdarəsi İmişli Rayon üzrə Nümayəndəliyinin baş məsləhətçisi Əzimov Nazim Abdulrəhim oğludur. Digəri isə AMİP tərəfindən irəli sürülən, partiyanın İmişli rayon təşkilatının sədri Həsənov Tapdıq Həsən oğludur. Hər iki şəxsin seçilmə şansı elə də yüksək qiymətləndirilmir. Seçkidə iştirak edənlərin sırasında tanınmış siyasətçi Razi Nurullayevin də adı var. Maraqlıdır ki, onun adı siyahıda işsiz və bitərəf kimi göstərilir. Ola bilər ki, bu, Razi Nurullayevin rəhbərlik etdiyi və AXCP adına iddialı olan partiyanın dövlət qeydiyyatının olmaması ilə bağlıdır. Siyasətçinin seçkinin əsas favoritlərindən olduğu bildirilir. Əslən həmin rayondan olması və bir çox resurslardan aldığı dəstək onun seçilmə şansını mümkün edir. Ancaq Razi Nurullayev üçün istədiyi qələbənin elə də asan olmadığı qənaətinə siyahıda Hüseynli İlqar Qəşəm oğlunun adını gördükdən sonra gəlmək olar. İlqar Hüseynli Sosial Strateji Tədqiqatlar və Analitik Araşdırmalar İctimai Birliyinin sədridir. Yerli və xarici medianın tez-tez müraciət etdyi tanınmış ekspertdir. Onun da şansı çox yüksək qiymətləndirilir. Hesab edilir ki, seçkinin favoriti məhz Razi Nurullayevlə İlqar Hüseynlidir. İlqar Hüseynli bundan əvvəlki parlament seçkilərinin rəsmi nəticələrinə görə Əsabil Qasımovdan sonra ikinci nəticəni göstərib. Lakin o bununla razılaşmayıb, hətta Avropa Məhkəməsinə qədər şikayət edib. Aparılan təbliğatın keyfiyyəti və instrumentlərindən görünür ki, seçkinin həlledici mərhələsində önə məhz respublika səviyyəsində tanınan bu iki şəxs çıxa bilər. Təbii ki, son sözü seçicilər və rəsmi nəticələrin elan olunması deyəcək.

Məhəmmədəli QƏRİBLİ

Son xəbərlər