Human Rights Watch (HRW) hüquq-müdafiə təşkilatı dünyada insan hüquqlarının vəziyyətinə dair növbəti illik hesabatını açıqlayıb.
Hesabatın Azərbaycanla bağlı hissəsində təşkilat növbəti dəfə qərəzli yanaşma sərgiləyib. Qeyd edilir ki, guya 2019-cu ildə ölkə hakimiyyəti əsas insan hüquq və azadlıqlarını sərt şəkildə məhdudlaşdırmaqda davam edib. Həmin dövrdə hakimiyyəti kəskin tənqid edən 50-yə yaxın hüquq müdafiəçisi, jurnalist və vətəndaş fəalı həbsdən azad edilib. Ancaq eyni zamanda daha 30 belə tənqidçi həbs olunub. Təşkilatın iddiasına görə, guya ölkədə işgəncə, qeyri-insani rəftar, sərbəst toplaşma və birləşmə azadlığının pozulması, KİV hüquqlarının və söz azadlığının məhdudlaşdırılması halları davam edir.
Saxta və qərəzli mövqeyi ilə ictimai fikri çaşdırmağa çalışan bu təşkilatın hesabatları artıq ciddi qəbul olunmur. Çünki ölkədə insanların fundamental azadlıqları tam təmin edilir. Artıq ictimaiyyətə də bəllidir ki, Azərbaycanın dünya birliyindəki mövqelərinin getdikcə möhkəmlənməsi Human Rights Watch təşkilatını çox ciddi narahat edir. Human Rights Watch təşkilatının Azərbaycanda insan haqları ilə bağlı növbəti yalanla dolu hesabatı bir daha göstərdi ki, təşkilat məqsədli şəkildə belə qərəzli hesabatlar yayır. Görünür, sözügedən təşkilat belə qərəzli hesabatı təqdim edərkən Azərbaycanda insan hüquq və azadlıqlarının qorunması istiqamətində həyata keçirilən tədbirləri görməzliyə vurub.
Sözügedən məsələ ilə bağlı fikirlərini “Bakı-Xəbər”lə bölüşən media eksperti Azər Həsrətin sözlərinə görə, Human Rights Watch təşkilatının Azərbaycanla bağlı sərgilədiyi qərəzli mövqe “ənənə” halını alıb: “Bir daha bəlli olur ki, bu kimi təşkilatlar hansı məzhəbə qulluq edirlər. Bu təşkilat Qərbin Azərbaycan kimi demokratik ölkəyə təzyiq rıçağıdır. Bu təşkilat məqsədli şəkildə Azərbaycanı qaralamağa çalışır. Olmayan yerdən problemlər axtarır, uydurmalar ortaya atır. Guya Azərbaycanda insan haqları ilə bağlı vəziyyət pisdir, bu sahədə problemlər aşıb-daşır. Tənqidə görə insanlar həbs edilir, təzyiqə məruz qalır. Bütün bu deyilənlər əsassızdır və reallığı əks etdirmir. Yalan üzərində hesabat hazırlayıb dərc edirlər. Zatən birinci dəfə deyil ki, Human Rights Watch belə qərəzli mövqe ortaya qoyur. Bizə bəllidir ki, hesabatda Azərbaycanla bağlı deyilənlər saxta olduğu üçün reallığı əks etdirmir. Təəssüflər olsun ki, illərdir belə yalan informasiyalar yayılmaqda davam edir. Bunun bir səbəbi həmin təşkilatın siyasi sifarişlərlə işləməsi ilə bağlıdırsa, digər səbəbi bizim bunun qarşısını ala bilməməyimizlə bağlıdır. Ona görə də biz növbəti illərdə elə bir formada bu kimi təşkilatların üzərinə getməliyik ki, saxta informasiyalar əsasında Azərbaycan barədə qərəzli rəy yarada bilməsinlər. Fikrimcə, xarici dilləri, təcrübəni bilən, öz həyatında bu işlərlə məşğul olan insanları önə çəkmək lazımdır. Peşəkar insanlar bu işlə məşğul olsa, bu işin xeyrinə olar”.
Vidadi ORDAHALLI
