24/02/2020 11:17
728 x 90

Misir polisindən azad türk mediası üzərinə misilsiz repressiya yürüşü – “Anadolu” agentliyinin "suçu nə"...

Məhəmməd Əsədullazadə: “İki ölkə arasında baş verən bu gərginlik fonunda, mətbuata qarşı bu cür siyasət dözülməzdir”

img

Məlum olduğu kimi, Misir polisi yanvarın 14-də axşam saatlarında “Anadolu” agentliyinin (AA) Qahirədəki ofisində reyd keçirib. Reyd zamanı agentliyin dörd əməkdaşı, o cümlədən, Türkiyə vətəndaşı saxlanıb. Qeyd edilir ki, saxlananlar naməlum istiqamətə aparılıb.

Polis əməkdaşları yerli vaxtla təxminən saat 18:00-da agentliyin Qahirədəki ofisinə daxil olublar. Hüquq-mühafizə orqanlarının əməkdaşları ofisdə müşahidə kameralarının fəaliyyətini dayandırıb, internet şəbəkəsini kəsib. Ofisdə axtarışlar yanvarın 15-i səhərə qədər davam edib. Agentliyin əməkdaşlarının şəxsiyyət vəsiqələri, mobil telefonları və kompyuterləri götürülüb, agentliyin mərkəzi ofisi və əməkdaşların ailə üzvləri ilə əlaqə saxlamaq cəhdlərinin qarşısı alınıb. Bununla belə, polis agentliyin Qahirə ofisinin vəkilinə hər hansı informasiya verməkdən imtina edib. Vəkil ofisdən çıxarılıb, axtarış davam etdirilib.Agentliyin dörd əməkdaşı, o cümlədən, Türkiyənin bir vətəndaşı ofisdə səhərə qədər saxlanıb.

Türkiyənin müvafiq diplomatik qurumları vəziyyəti izləyirlər. Agentliyin vəkilləri və Türkiyənin Qahirədəki Səfirliyi Misir hakimiyyətindən agentliyin Qahirə ofisinin əməkdaşlarının olduğu yer haqqında informasiya verməyi tələb edib.

Misirin Türkiyə ilə münasibətlərinin gərgin olması bəllidir. Misirin sabiq prezidenti Məhəmməd Mursinin 2013-cü ilin iyununda devrilməsindən sonra iki ölkənin əlaqələri pisləşib. Rəsmi Ankara “Müsəlman Qardaşlar”ın önəmli şəxslərini himayə edərək qoruyacağını bildirməsi ilə Misirdə çevrilişçilər Türkiyənin Qahirədəki səfirini geri göndərib, bununla da ikitərəfli əlaqələr daha da kəskinləşib. Sonra münasibətlər nisbətən düzəlsə də, tərəflər arasında gərginlik qalmaqdadır. Ancaq buna baxmayaraq, Misir hakimiyyətinin Türkiyəni təmsil edən media orqanına qarşı bu cür repressiv davranışı heç bir məntiqə sığmır. Görünən odur ki, Misir polisi azad türk mediası üzərinə misilsiz repressiya yürüşü edir. Hansı ki, medianı iki ölkə arasında olan siyasi münasibətlərə görə sıxışdırmaq heç bir məntiqə uyğun deyil.

  • “Hazırda Aralıq dənizinin şərq sahilində Qahirə Ankaraya qarşı düşmənçilik siyasəti aparır”

Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, Misirlə Türkiyə arasında Yaxın Şərqdə baş verən proseslərlə bağlı ciddi problemlər yaşanır: “Xüsusilə Misirdə general Sisi hakimiyyətə gəldikdən sonra Ankara ilə münasibətləri gərgin olub. Çünki Sisi hərbi çevriliş edərək Ankaranın dəstək verdiyi Mursi hakmiyyətini devirib. Bundan əlavə, Sisinin Türkiyə əleyhinə regionda fəaliyyəti iki ölkə arasında böhranı dərinləşdirib. Hazırda Aralıq dənizinin şərq sahilində Qahirə Ankaraya qarşı düşmənçilik siyasəti aparır. Həmçinin, Liviyada bu istiqamətdə general Haftarı dəstəkləyir. Bu gərginlik fonunda, Türkiyənin orada fəaliyyət göstərən “Anadolu” agentliyinə qarşı təzyiqlərin edilməsi mətbauta qarşı bir savaşdır. Hesab edirəm ki, antidemokratik bir sistem olan Sisinin bu siyasətinin qarşısı mütləq alınmalıdır. Ölkədə demokratik bir sistemə qarşı hərbi çevriliş həyata keçirən bir hakimiyyətin Türkiyə mətbuatına qarşı repressiya həyata keçirməsi gözləniləndir. İki ölkə arasında baş verən bu gərginlik fonunda, mətbuata qarşı bu cür siyasət dözülməzdir. Ən başlıcası, bu, beynəlxalq hüquq qaydalarına ziddir. Ankaraya qarşı Sisinin bu siyasəti uğursuzluğa məhkumdur və regional güc olaraq Türkiyənin oyunçuluğunu qəbul edəcək. Misir Qərbdən asılı bir ölkədir və müstəqil siyasəti yoxdur. Ona görə də Türkiyəyə qarşı bu siyasət təsadüfi deyil”.

Vidadi ORDAHALLI

Son xəbərlər