Ermənistan mediası Prezident İlham Əliyevin müşavirə çıxışına müstəsna maraq göstərdi – marağın arxasında nə dayanır...

Məlum olduğu kimi, Prezident İlham Əliyev son müşavirədə Azərbaycanla Ermənistanı müqayisə edərək çoxsaylı fakt ortaya qoyub.

Prezident bildirib ki, əksər parametrlər üzrə ölkəmiz Ermənistanı üstələyir: “Ermənistanın baş naziri öz ölkəsinin dırnaqarası uğurları haqqında danışarkən Ermənistanı Azərbaycanla müqayisə edir. Onun gəldiyi qənaətə görə, Ermənistan Azərbaycanı bir çox parametrlər üzrə qabaqlayır. Bəri başdan bildirirəm və bunu heç sübut etməyə ehtiyac yoxdur ki, belə bir fərziyyənin heç bir əsası yoxdur. Azərbaycan Ermənistanı bütün əsas parametrlər üzrə böyük fərqlə qabaqlayır”.

Prezidentin çıxışından məlum olub ki, Azərbaycan 2011-ci ildə 155 ölkənin dəstəyilə BMT Təhlükəsizlik Şurasına qeyri-daimi üzv seçilib. Ancaq Ermənistanın quruma üzv olmaq niyyəti baş tutmayıb. Digər tərəfdən, güclü orduların reytinqində Azərbaycan 52-ci, Ermənistan isə 96-cı yerdədir. O cümlədən, hava gücü üzrə Azərbaycan 63-cü, Ermənistan 86-cı yerdədir. Dəniz gücü üzrə Azərbaycan 67-ci yerdədir, Ermənistanda dəniz yoxdur. Tank gücü üzrə Azərbaycan 32-ci, Ermənistan 78-ci yerdədir. 2019-cu ildə Azərbaycanın ümumdaxili məhsulu dollar ekvivalentində 47,6 milyard dollardır, Ermənistanda isə cəmi 13 milyard dollar. Adambaşına düşən ümumdaxili məhsul Azərbaycanda 4800 dollar, Ermənistanda 4500 dollardır.

Maraqlı məqamlardan biri odur ki, erməni mediası Prezident İlham Əliyevin son müşavirədə səsləndirdiyi fikirlərə yer verib. Bəzi KİV-də onun fikirləri öz əksini tapıb. Adətən, düşmən ölkə Azərbaycanla bağlı yalan və qərəzli xarakterli informasiyalara yer verir. O baxımdan ölkə başçısının çıxışının verilməsində maraq nədir? Sözügedən çıxışa niyə bu qədər yer ayrılır?

• “Erməni mətbuatı bununla özünü demokratik imicdə təqdim etmək istəyir”

Məsələyə münasibət bildirən şərqşünas Seyid Camal Əzimbəylinin sözlərinə görə, artıq bəzi erməni dairələri də Azərbaycandakı inkişafı etiraf etmək məcburiyyəti ilə üzləşiblər: “Əvvəllər Azərbaycan barəsində ancaq neqativ yüklü məlumatlara önəm verirdilər. Düşmən ölkə indi də bu iyrənc media siyasətini davam etdirir. Ancaq, görünür, indi bəzi erməni media orqanları bir qədər özünü fərqli göstərmək istəyirlər. Ona görə də burada bir neçə niyyət ola bilər. Biri odur ki, erməni mətbuatı bununla özünü demokratik imicdə təqdim etmək istəyir. Guya Ermənistan mətbuatı obyektivdir və qarşı tərəfin fikirlərinə də yer verir. Bununla dünya ictimaiyyətini aldatmaq niyyətindədirlər. Digər tərəfdən, Azərbaycanın iqtisadi sahədə əldə etdiyi uğurları beynəlxalq təşkilatlar da təsdiq edir. Hansı ki, müşavirədə səslənən rəqəmlər beynəlxalq hesabatlarda da yer alıb. Görünür, artıq Azərbaycanın əldə etdiyi uğurlara heç cür kölgə sala bilmirlər. Çünki Azərbaycanın bütün parametrlərə görə Qafqazda lider ölkə olduğu faktı ortadadır”.

Vidadi ORDAHALLI