Son vaxtlar Ermənistan bəzi ərəb ölkələri ilə yaxınlıq etməyə cəhdlər edir. Bu günlərdə Ermənistanın xarici işlər naziri Zöhrab Mnasakanyan İordaniya Haşimilər Krallığının xarici işlər naziri Ayman Safadi ilə telefon danışığı etdiyi bildirilir. Qeyd olunur ki, telefon danışığında ölkələrin gələcək əməkdaşlıq perspektivləri müzakirə edilib. Qərara alınıb ki, hər iki ölkənin vəzifəli şəxslərinin qarşılıqlı səfərləri təmin olunsun. Həmsöhbətlərin regional məsələləri də müzakirə etdiyi qeyd olunur.
Müsəlman ölkələrinin İslam dəyərlərinə qarşı vandallıq edən Ermənistan kimi ölkə ilə dostluq etməsinə bizim münasibətimiz mənfidir. Ölkə başçısı da dəfələrlə bu mövzuya toxunub. İlham Əliyevin sözlərinə görə, Ermənistan 30 ilə yaxındır ki, beynəlxalq hüququn norma və prinsiplərini kobud şəkildə pozaraq Azərbaycana qarşı işğalçılıq siyasətini davam etdirir: “İşğal olunmuş ərazilərdə etnik təmizləmə siyasəti aparılıb, bir milyondan artıq soydaşımız qaçqın və məcburi köçkün vəziyyətinə düşüb. Həmin ərazilərdə Azərbaycan xalqına məxsus tarixi-mədəni irs, İslam abidələri və məscidlərimiz dağıdılıb və məhv edilib. Ermənistan çalışır ki, müsəlman ölkələri ilə sıx əməkdaşlıq qursun. Ancaq dünya müsəlmanları üçün müqəddəs olan məscidləri dağıdan Ermənistan müsəlman ölkələri ilə dost ola bilməz. Dinimizə qarşı edilən bu vandallıq Ermənistanın islamofob xislətini nümayiş etdirir. Dağlıq Qarabağ Azərbaycanın tarixi və əzəli torpağıdır, Azərbaycanın ayrılmaz hissəsidir. Münaqişə beynəlxalq hüququn norma və prinsiplərinə uyğun olaraq Azərbaycanın ərazi bütövlüyü çərçivəsində həll olunmalıdır. Türkdilli Dövlətlərin Əməkdaşlıq Şurasının Zirvə görüşlərinin yekun bəyanatlarında da dövlətlərin ərazi bütövlüyü, suverenliyi və sərhədlərinin toxunulmazlığına dəstək davamlı olaraq təsbit edilir”.
Bəzi müsəlman ölkələrində olan erməni sevgisi nə ilə izah edilə bilər?
Tural İrfan: “Biz müsəlman ölkələrini bu amillərə riayət etməyə səsləməliyik”
İlahiyyatçı Tural İrfan “Bakı-Xəbər”ə açıqlamasında bildirdi ki, bəzi ərəb ölkələrinin Ermənistanda əlaqələr qurması danılmaz faktdır: “Mən bunu tarixi köklərlə izah edərdim. Müsəlman ölkələrinin içərisində ermənilərlə əməkdaşlığa daha çox maraq edənlər ərəblərdir. Osmanlı İmperiyası dağılandan sonra ingilislərin dəstəyilə daha çox ərəblər türklərə qarşı mübarizəyə istiqamətləndirildi. Həmin təbliğatın nəticəsi hələ də bəzi ərəb ölkələrinin qulağında qalır. Biz bunu tez-tez müşahidə edirik. Təəssüf edirik ki, bu sırada İordaniya da yer almağa başlayıb. Çünki həmin ölkənin Azərbaycanla da çox yaxşı münasibətləri var. Ölkə başçımız müsəlman ölkələrinin Ermənistanla niyə dostluq etməməsinin səbəbini çox sadə izah edib. Çünki Ermənistan dini dəyərlərimizi təhqir edir, məscidlərimizi yandırır. Biz bu istiqamətdə ciddi işləməliyik. Xüsusilə İslam dini üzərində fəaliyyətini quran təşkilatlarımız belə hallara etirazını bildirməlidirlər. Qafqaz Müsəlmanları Ruhani İdarəsi kimi nüfuzlu qurum bu mözvulara bir qədər həssaslıqla yanaşmalıdır. Sizi inandırıram ki, bu yöndə olan sərt bəyanatlar bəzi ölkələri Ermənistanla əməkdaşlıqdan çəkindirə bilər. Təbii ki, bizdə din dövlətdən ayrıdır. Bu bizə irad bildirilə bilməz. Ermənistan praktikasına fikir verək. Orada əksər məsələlər dini xadimlərin əli ilə qabardılır. Bizdə niyə olmasın? Bizim din xadimlərimiz belə mövzulara həssaslıqla yanaşmalı, əlaqələrindən istifadə edib, müsəlman ölkələrini düşmən ölkə ilə yaxınlıqdan çəkindirməlidirlər”.
Ekspertin sözlərinə görə, İslam müsəlmanın başqa müsəlmana dayaq durmasını diqtə edir. İordaniya dövlətinin adı Haşimilər Krallığı kimi qeyd edilir. Haşimilər də Məhəmməd Peyğəmbərin nəsli hesab olunur. Peyğəmbərimiz də həmişə zalımın yox, haqqı tapdalanın yanında olmağı buyurub. Bu, Qurani-Kərimdə də bu cürdür. Biz müsəlman ölkələrini bu amillərə riayət etməyə səsləməliyik. İordaniyanın şeyxinə dövlət xəttilə yanaşı, həm də dini cameə adından etiraz olunmalıdır. Qabaqlayıcı tədbirlər kimi, bütün ərab və müsəlman ölkələrinin nüfuzlu ruhanilərinə bizim düçar olduğumuz Qarabağ konflikti barədə məlumat verilməlidir. Hər halda, nüfuzlu ruhanilərin dövlətə təsirləri güclü olur. Gözləməyək ki, başqa bir müsəlman ölkəsi ilə belə əməkdaşlıq qurulsun və biz ona etiraz edək”.
Məhəmmədəli QƏRİBLİ
