AŞPA-nın qış sessiyasının gündəliyinə “Azərbaycanda siyasi məhbuslarla bağlı məlumatlar haqqında iş” məsələsi daxil edilib. Azərbaycanda siyasi məhbuslar üzrə məruzəçi, islandiyalı deputat Torhildur Sunna Evarsdottirin tərtib etdiyi müvafiq qətnamə layihəsi yanvarın 27-də müzakirə olunacaq.
Məruzədə Azərbaycanda “sistemli xarakter” daşıyan siyasi məhbus problemi ilə bağlı ciddi narahatlıq ifadə olunub. Bildirilir ki, hələ 2001-ci ildə Azərbaycan Avropa Şurasına daxil olarkən AŞPA Bakını "siyasi məhbusları azad etməyə və ya onların işlərinə məhkəmə qaydasında yenidən baxmağa" çağırıb. AŞPA-nın bu məsələ ilə bağlı bir neçə qətnaməsinə baxmayaraq, guya sözügedən problem indiyədək qalmaqdadır.
Hansı ki, Azərbaycan Avropa Şurasına üzv qəbul olunandan sonra bu məsələ öz həllini tapıb. Nəticədə bütün “siyasi məhbus” adlandırılan şəxslər azad edilib. Bundan başqa, ölkə qanunvericiliyi daha da təkmilləşdirilib. Söz və ifadə azadlığı məsələsində yeni-yeni imkanlar yaranıb. Ancaq görürük ki, bəzi dairələr süni şəkildə siyasi məhbus məsələsini qabartmağa çalışırlar. Hər seçki ilində bənzər ənənəvi təzyiqləri işə salırlar. Çox güman ki, bu da onlardan biridir. Təzə “yanaşma” ortaya qoyurlar. Guya Azərbaycanda siyasi məhbus məsələsi “sistem xarakterli”dir.
“Bunlardan siyasi manipulyasiya məqsədilə istifadə edirlər”
Məsələyə münasibət bildirən media eksperti Azər Həsrətin sözlərinə görə, “sistem xarakterli” siyasi məhbus problemi bir uydurmadır: “Özü də AŞPA-nın uydurması. Zamanlamanın indi seçilməsi təsadüfi deyil. Məlum olduğu kimi, Azərbaycan parlament seçkilərinə hazırlaşır. Yanvarın 17-də təşviqat kampaniyasının aktiv dövrü başlayır. Parlament üzvlərinin xeyli hissəsi, xüsusən də AŞPA-da təmsil olunanlar deputatlığa namizəddirlər. Onların başı seçkiyə qarışıb. Alınan qərara görə, onlar gedib AŞPA-da toplantıya qatıla bilməyəcəklər. Faktiki olaraq, Azərbaycanın iştirakı olmadan sözügedən məsələ müzakirə ediləcək. Çox güman ki, yanvarın 27-ni seçənlər bunu da nəzərə alıblar. O mənada ki, Azərbaycan həmin müzakirələrdə iştirak edə bilməsin. Ona görə də guya Azərbaycanda “sistem xarakterli” siyasi məhbus probleminin olduğunu demək absurddur. Çünki Azərbaycanda, ümumiyyətlə, dövlətin siyasi mənsubiyyətinə görə insanları həbs etməsi kimi bir praktika yoxdur. Sadəcə olaraq müəyyən səbəblərdən həbsə düşən adamlar iddia edirlər ki, guya onlar siyasi mənsubiyyətinə görə həbs olunublar. Hətta elə adamlar içərisində şəxsən tanıdıqlarımız da olur. Məsələn, sənəd saxtalaşdırdığına görə həbsə düşən bir şəxs var idi. Götürüb onu siyasi məhbus elan ediblər. Deməyim odur ki, bunlardan siyasi manipulyasiya məqsədilə istifadə edirlər. AŞPA kimi qurumlar da həmin manipulyasiyanın aləti olurlar. Bu da səbəbsiz deyil. Çünki bizim AŞPA-da işləyən deputat kontingentimiz yetərincə bu işləri idarə edə bilmir. Əvvəlki deputat heyətimiz bu cür platformalarda gözlədiyimiz fəallığı göstərə bilməyib. Ancaq, istənilən halda, biz Azərbaycan vətəndaşı olaraq bu cür məsələlərə biganə qalmayacağıq. İstənilən beynəlxalq qurum bizi ədalətsiz tənqid edəcəksə, cavabını alacaq”.
Vidadi ORDAHALLI
