27/01/2020 21:49
728 x 90

İranda təyyarə vurulmasına dair yeni faktlar çıxır - ölkədəki həbslərin pərdəarxası…

img

Ukrayna Baş Prokurorluğu Ukraynanın Beynəlxalq Hava Yollarına məxsus təyyarənin İranda  vurulması ilə bağlı cinayət işinin məzmununu dəyişdirib. İndi istintaq iki və ya daha çox insanın qəsdən öldürülməsinə və təyyarənin məhv edilməsinə görə məsuliyyət haqqında maddələrə uyğun olaraq davam edəcək. Bu qərar tərəfdaşların, habelə faciənin baş verdiyi yerdə işləyən ukraynalı mütəxəssislərdən alınan məlumatların yoxlanılması əsasında qəbul edilib.

Xatırladaq ki, Ukraynaya məxsus sərnişin təyyarəsi Tehran yaxınlığında raketlə vurulub, 176 nəfər həyatını itirib. İranın İslam Keşikçiləri Korpusu təyyarəni səhvən vurduğunu etiraf edib.  İranın Ədliyyə Nazirliyi 176 sərnişinli Ukrayna təyyarəsinin vurulması ilə bağlı həbslər edildiyini bəyan edib.

Bəyanat sərnişin təyyarəsinin vurulması və rəsmilərin qəzanın səbəblərini ört-basdır etməsi səylərinə etiraz olaraq, İranda günlərdir davam edən aksiyalar fonunda verilib.

İnternetdə yerləşdirilən videolarda görünür ki, Tehranda və İranın digər şəhərlərində nümayişlər keçirən etirazçılar hökumət əleyhinə şüarlar səsləndiriblər. Daha əvvəl təyyarənin vurulduğunu inkar edən rəsmi Tehran ötən şənbə günü təyyarənin vurulduğunu etiraf edib.

Bundan əvvəl İran Prezidenti Həsən Ruhani Ukrayna təyyarəsinin vurulmasına görə məsuliyyət daşıyanların cəzalandırılacağına söz verərək, insidenti "bağışlanılmaz" adlandırıb.

İran Dövlət Televiziyasında çıxış edən Ruhani xüsusi məhkəmənin yaradılmasına çağırıb və deyib ki, bütün dünya bunu izləyəcək: "Biz bu insidentin bütün tərəflərini araşdırmağa, buna görə məsuliyyət daşıyanları cəzalandırmağa və insanları bu kimi insidentlərin bir daha baş verməyəcəyinə əmin etməkdə davam edəcəyik" .

İran Prezidenti hökumətin qəza ilə əlaqədar İran xalqı və digər millətlər qarşısında məsuliyyət daşıdığını bildirib.

İran Baş Prokurorluğunun sözçüsü Qulamhüseyn İsmaili yaydığı açıqlamada qəza ilə əlaqədar bəzi şəxslərin saxlandığını bildirib. Lakin saxlananların kim və neçə nəfər olduğu məlum deyil. İranın İnqilab Keşikçiləri Korpusunun aviasiya şöbəsinin rəhbəri Əmir Əli Hacızadə təyyarənin vurulmasının tam məsuliyyətini üzərinə götürüb. O deyib ki, “kaş mən öləydim”.

Ukraynanın paytaxtı Kiyevə istiqamət alan təyyarədə 167 sərnişin və uçuş heyətinin 9 üzvü olub. Onlardan 82-si iranlı, 57-si kanadalı, 11-i ukraynalı olub. Sərnişinlərin bir çoxu ikili vətəndaşlığa malik olub. 1-i körpə olmaqla bir neçə uşaq hadisə qurbanları arasındadır. Təyyarə ilə bağlı yaşanan hadisələrin sonu nə ilə nəticələnə bilər?

  • Mehman Muradlı: “Hansısa yüksək rütbəli hərbçisini Ukrayna və ya Kanadaya verməyəcək ki, aparıb mühakimə etsinlər”

Hüquqşünas Mehman Muradlı qəzetimizə açıqlamasında bildirdi ki, bununla bağlı araşdırmalar uzun çəkəcək: “Ukraynada cinayət işi qaldırılıb. Hadisə zamanı hələk olanların arasında İrandan  sonra sayca ikinci Kanada vətəndaşları olub. Yəni gözləniləndir ki, həmin ölkədə də cinayət işi açılsın. İran artıq təyyarənin səhvən vurulduğunu etiraf edib. Həmin cinayəti həyata keçirənlər hərbçilərdir. İrandan başqa hadisə ilə bağlı cinayət işi açan ölkələr baş vərən cinayəti hərbi kateqoriyaya aid edib, ona beynəlxalq tribunalda baxılmasına çalışacaqlar. Təbii ki, İran bununla razılaşmayacaq. Özü də ən ali səviyyədə bəyan edir ki, işin obyektiv araşdırılmasına çalışacaq. Bu hadisə İranın imicinə böyük zərbə vurub. İslam ölkəsinin təməlində haqq-ədalət durmalıdır. İran bunu təmin edəcəyini deyir. Obyektiv qərarlar verməkdən başqa çarəsi yoxdur. Bu səbəbdən də maksimum işin obyektivliyini təmin edəcək. Ola bilər ki, Ukrayna və Kanada İrandakı istintaqla razılaşmasınlar, daha ali şəxslərin həbsini tələb etsinlər. İran yalnız özünün daxilində verilən qərarı ilə kifayətlənəcək. Yəni hansısa yüksək rütbəli hərbçisini Ukrayna və ya Kanadaya verməyəcək ki, aparıb mühakimə etsinlər. Bu da ölkələrin İranla münasibətlərində sərinləşməyə gətirib çıxara bilər”.

Məhəmmədəli QƏRİBLİ

Son xəbərlər