Ermənistanın iqtisadiyyat naziri Tiqran Xaçatryan 2019-cu ilin yekunları ilə bağlı keçirdiyi mətbuat konfransında qeyd edib ki, ötən il ölkənin kənd təsərrüfatında azalma müşahidə olunub. Onun sözlərinə görə, ötən ilin 9 ayının göstəricilərinə görə, kənd təsərrüfatında 4 faiz azalma qeydə alınıb: “Ötən ilin rəqəmləri tam açıqlanmasa da, 2019-cu ildə 2018-ci illə müqayisədə daha aşağı göstəricilərimiz olacaq”.
O bunu iki amillə əsaslandırmağa çalışıb. Birincisi, bu sahədə qeydiyyatla bağlı problemlərin olduğunu deyib. İkincisi, kənd təsərrüfatında qısa müddət ərzində yüksək artım templərini əldə etmək üçün effektivlik yoxdur.
Ancaq Ermənistandan fərqli olaraq, ötən ili Azərbaycanın kənd təsərrüfatı artımla başa vurub. Prezident İlham Əliyev 2019-cu ilin yekunlarına həsr olunmuş müşavirədə çıxışı zamanı deyib ki, kənd təsərrüfatı təxminən 7 faiz artıb: “Xüsusilə bitkiçilikdə bu artım daha böyük olmuşdur - 10 faizdən çox. Bu da görülmüş işlərin nəticəsidir. Bizim ənənəvi sahələrimiz inkişaf edir və bərpa olunur və yeni kənd təsərrüfatı sahələri fəaliyyətə başlayır. Burada kənd təsərrüfatının birbaşa sənaye ilə uzlaşması var. Misal üçün, keçən il meyvə-tərəvəz istehsalı böyük dərəcədə artıbdır. Üzümçülük 25 faiz artıb və 190 min tondan çox üzüm yığılıb”.
Baramaçılığın inkişafından danışan dövlət başçısı deyib ki, 2015-ci ildə cəmi 200 kiloqram barama yığılıb. Ancaq keçən il barama yığımı 630 tona yüksəlib. Pambıq istehsalı keçən il rekord həddə - 294 min tona çatıb.
Göründüyü kimi, digər sahələrdə olduğu kimi, aqrar sahədə də Azərbaycan Ermənistandan öndədir. Azərbaycanda bu sektorda artım qeydə alındığı halda, Ermənistanda tənəzzül yaşanır.
“Halbuki, Paşinyan hakimiyyətə gəldikdən sonra ilk vaxtlar bəyan edirdi ki, ölkənin kənd təsərrüfatı inkişaf edəcək”
Sözügedən məsələyə münasibət bildirən ekspert Rəsul Cahangirlinin sözlərinə görə, Ermənistanın aqrar sektorda tənəzzül yaşaması bu ölkə hakimiyyəti üçün böyük utancdır: “Nəzərə almaq lazımdır ki, Ermənistan təbii resurslarla zəngin olmayan ölkədir. Düzdür, qonşu Gürcüstan da sözügedən resurslara malik deyil. Ancaq Ermənistandan fərqli olaraq, Gürcüstanda iqtisadiyyat inkişaf edir. Aqrar sektorda məhsul istehsalı azalmır, əksinə, artır. Azərbaycana gəldikdə isə, ölkə iqtisadiyyatının istər sənaye, istərsə də kənd təsərrüfatı sahəsi sürətlə inkişafdadır. Bunu əvvəlki illərlə müqayisədə statistik rəqəmlər də əyani şəkildə sübut edir. Hansı ki, ilin yekunları ilə bağlı müşavirədə bir daha bu təsdiqləndi. Bütün bunlar onu göstərir ki, Ermənistanda, digər sahələrdə olduğu kimi, aqrar sektorda da idarəçilik düzgün qurulmayıb. Paşinyanın populist açıqlamaları fonunda ortaya atdığı ideyalar reallığa söykənmir. Halbuki, Paşinyan hakimiyyətə gəldikdən sonra ilk vaxtlar bəyan edirdi ki, ölkənin aqrar sektoru inkişaf edəcək. Deyirdi ki, əvvəlki hakimiyyətin vaxtında kənd təsərrüfatında məhsul istehsalının uçotu düzgün aparılmayıb. O zaman ortaya sual çıxır: bəs indi nə baş verir? İki ilə yaxındır ölkədə yeni qüvvələr hakimiyyətdədir, amma aqrar sektorda nə artıma nail olublar, nə də tənəzzülün qarşısını ala biliblər. Bir məqamı da qeyd edim ki, aqrar sahənin inkişafına nail olmaq üçün həm də böyük subsidiyalara ehtiyac var. Əksər ölkədə büdcədən bununla bağlı vəsait ayrılır. Ermənistanın isə belə bir imkanı yoxdur. Üstəlik, xarici maliyyə qurumları da Ermənistana bununla bağlı kredit ayırmaqda maraqlı deyillər. Çünki, ümumən, Ermənistan iqtisadiyyatı onları cəlb etmir”.
Vidadi ORDAHALLI
