Azərbaycanda sosial siyasət sahəsində həyata keçirilən bütün işlər vətəndaş məmnunluğunun təmin edilməsinə, onların sosial rifah halının yüksəldilməsinə xidmət edir. Amma təəssüf ki, bəzi dövlət məmurları sosial-ictimai sahədə baş verən müsbət yönümlü proseslərin qarşısını almağa çalışır, sosial müavinətlərin, maddi yardımların vətəndaşa çatmasına ciddi maneələr törədirlər. Bu hərəkətə yol verən bəzi məmurlar, icra orqanları rəhbərləri ifşa edilərək həbs edilib.
Prezident İlham Əliyev 2019-cu ilin yekunlarına həsr olunmuş müşavirədə bu aktual məsələni bir daha gündəmə gətirib, o bildirib ki, bu kimi cinayətlərə yol verənlər məsuliyyətdən yaxa qurtara bilməyəcəklər: “... İctimai ödənişli iş yerləri ilə bağlı bu təşəbbüs mənim tərəfimdən irəli sürüldü, o vaxt ki, dövlət investisiya xərcləri kəskin şəkildə aşağı düşdü. Bunu da biz məcburiyyət qarşısında etdik. Çünki neftin qiyməti dörd dəfə aşağı düşmüşdü, gəlirlərimiz azalmışdı və büdcəmiz ixtisar edilmişdi, o cümlədən, investisiya proqramı da böyük dərəcədə ixtisara uğradı. İşsizliyin qabağını almaq üçün mənim təşəbbüsümlə on minlərlə ödənişli ictimai iş yeri yaradılmalı idi. Ancaq əfsuslar olsun ki, biz bu proqramın icrasında çox böyük pozuntulara rast gəldik. Xüsusilə yerli icra orqanları tərəfindən vicdansızcasına bu vəsaitin talanması və ödəniş kartlarının yığılması, ondan sonra oradan pulun çəkilməsi, yaxud da öz yaxın adamlarının, bu işlərlə qohumlarının təmin edilməsi, əlbəttə ki, dözülməz faktdır və buna görə artıq bu pozuntulara yol verən şəxslər cəzalandırıldı və bu işlər davam etdiriləcək. Bu, hər kəsə dərs olmalıdır. Amma, eyni zamanda, elə bir mexanizm işlənməlidir ki, bu pozuntulara, ümumiyyətlə, imkan olmasın. Ona görə Əmək və Əhalinin Sosial Müdafiəsi Nazirliyinə tapşırıq verildi ki, onlar bu işin koordinasiyasını öz üzərinə götürsünlər və ödənişli ictimai işlərə götürülən vətəndaşlar məhz Əmək və Əhalinin Sosial Müdafiəsi Nazirliyi tərəfindən rəsmiləşdirilsin. İndi hazırda keçən il 38 min belə işlə təmin olunan şəxs var” - deyən ölkə başçısı bu çıxışı ilə də bu sahəyə məsul şəxslərə növbəti xəbərdarlığını etdi.
“İşində nöqsanlara, pozuntulara yol verən icra başçılarının da həbs ediləcəyi istisna deyil”
Professor Əhməd Qəşəmoğlu “Bakı-Xəbər”ə bildirdi ki, bu gün Azərbaycanda dövlətin vətəndaşların rifah halının yüksəlməsinə yönəlik siyasət həyata keçirməsi çox böyük nəticə verir. Ə.Qəşəmoğlu bununla belə hesab edir ki, bəzi məmurların, xüsusən də icra hakimiyyəti başçılalarının öz vəzifələrinə məsuliyyətsiz yanaşması və vətəndaşa aid vəsaiti talaması, mənimsəməsi olduqca pis nəticə verib. O qeyd etdi ki, bəzi məmurlar ünvanlı sosial yardımların verilməsindən tutmuş, müavinətlərin təyin edilməsinə və digər məsələlərə qədər müdaxilə edərək vicdansızcasına talançılıq ediblər. Mütəxəssisin fikrincə, Prezidentin təşəbbüsü ilə ərsəyə gətirilən sosial-ictimai proqramların icrasında pozuntuları törədən məmurlardır. “Məlum olduğu kimi, bir sıra məmurlar, icra başçıları həm dövlət büdcəsini talamaqda “mahir” olmaqla yanaşı, həm də ictimai-sosial proqramlar üzrə ayrılan vəsaitləri mənimsəyiblər. Son zamanlar açıq şəkildə məlum oldu ki, bəzi icra başçıları, məmurlar vətəndaşlara aid ödəniş kartlarını yığaraq oradan böyük məbləğdə vəsaiti çəkərək mənimsəyiblər. Əlbəttə, bu faktlar onlar tərəfindən vətəndaşın haqqının tapdanması, dövlət vəsaitinin talan edilməsidir. Bu istiqamətdə qanun pozuntularına yol verən icra hakimiyyəti başçıları, onların müavinləri cinayət məsuliyyətinə cəlb olundular, bu, başqalarına da dərs olmalıdır. Hesab edirəm ki, icra orqanlarında çalışan digər şəxslər də həbs edilən insanların yolunu getməməlidirlər, onların taleyindən nəticə çıxarmalıdırlar. Dövlət vəsaitini talayan, vətəndaşın müavinətinə, dövlət tərəfindən ona ayrılan vəsaitə hər hansı yolla göz dikən məmurlarla bağlı hüquqi müstəvidə ölçü götürülməsi müsbət haldır. İşində nöqsanlara, pozuntulara yol verən icra başçılarının da həbs ediləcəyi istisna deyil. Ölkə başçısı da çıxışında belələrinə qarşı barışmaz olduğunu bəyan edib”.
Ə.Qəşəmoğlu hesab edir ki, dövlətin hazırladığı sosial-ictimai yönümlü layihələrin icrasını ləngidən, yaxud icrasında müxtəlif pozuntulara yol verən şəxslərin qəlbində xalqa, dövlətə məhəbbət yoxdur, belə insanlar vəzifəyə yalnız gəlir mənbəyi kimi baxırlar. “Dövlət məmurunda vicdan, xalq, vətən sevgisi, humanistlik olmalıdır. Amma hər hansı bir məmurda maddi maraq öz xalqına olan maraqdan üstündürsə, o hər zaman bu cür pozuntulara yol verəcək. Çox təəssüf ki, həbs edilən icra başçılarında da, eləcə də hələ yol verdiyi pozuntuların miqyası tam aşkarlanmamış məmurlarda da xalqa sevgi yoxdur. Onların məqsədi yalnız daha çox var-dövlət əldə etməkdir. İcra orqanlarında çalışan məmurlar Prezidentə kömək etmək əvəzinə, onun irəli sürdüyü proqramların icrasına mane olurlar. Əslində, belə olmamalıdır, onlar Prezidentə kömək etməlidirlər. Çünki onlar Prezidentin yerlərdəki nümayəndələridir. Elə fəaliyyət göstərməlidirlər ki, Prezidentə kömək edə bilsinlər. Bu gün ölkəmizdə yeni ab-hava, yeni atmosfer formalaşıb. Bu baxımdan da məmurlar Prezidentin xəbərdarlıqlarından nəticə çıxarmalıdırlar. Məmurlar, icra başçıları yerlərdə təşəbbüslərlə çıxış etməlidirlər. Onlar elə mütəxəssislər, iş adamları tapıb prosesə cəlb etməli idilər ki, bu adamlar yeni iş yerləri yaratmaqda maraqlı olardılar. Amma bunlar iş adamlarının fəaliyyətinə mane olublar”.
Ə.Qəşəmoğlunun fikrincə, icra başçıları öz fəaliyyətlərində şəffaflığı təmin etmək istəyirlərsə, elmi təminatdan istifadə etməlidirlər. Lakin onların elmi təminatı idarəetməyə yaxın qoymadıqlarını deyən Ə.Qəşəmoğlu bildirdi ki, məmurların bir çoxu elmi yenilklərdən qorxur. “Amma indiki dövrdə elmi metodlarla yeni texnologiyalar yaratmadan işlək mexanizm qurmaq olmaz. Çünki bütün dünya elmin köməyindən istifadə edərək yeni texnologiyalar qurur. Mən öz tələbələrimə yerlərdə yeni texnologiyaların qurulmasını öyrədirəm. Amma mənim öyrətdiyim tələbələr hansısa bir icra hakimiyyətinə getsə, onu işə götürməyəcəklər. Halbuki, icra hakimiyyətləri özləri sosial sahəni, işi bilən, müasir metodlarla yeni texnologiyaların tətbiqini bacaran kadrlar yetişdirməlidirlər. İnandırıram sizi, yerli icra orqanları tərəfindən təşəbbüslər irəli sürülsə, yeni təkliflər edilsə, şəxsən cənab Prezident ona dəstək verər. Amma belə təşəbbüslər yoxdur” - deyə Ə.Qəşəmoğlu qeyd etdi.
İradə SARIYEVA
