Məlum olduğu kimi, Ermənistan dünya dövlətləri arasında ilk dəfə Krım yarımadası ilə qarşılıqlı müntəzəm uçuşlar təşkil edəcək. Məlumata görə, Ermənistan artıq bu ildən Krımla müntəzəm aviareyslərə başlayacaq. Qeyd edilir ki, İrəvanla Simferopol arasında müntəzəm reyslərə martda start veriləcək.
Uçuşları həyata keçirəcək aviaşirkət artıq bununla bağlı icazə alıb. Hazırda tərəflər arasında uçuş cədvəlinin uyğunlaşdırılması, həmçinin aeroportların razılaşdırılması prosesi həyata keçirilir. İlhaq edilmiş yarımadanın turizm, kurortlar və idman komitəsinin sədri Aleksey Çernyak da Rusiya Federal Hava Nəqliyyatı Agentliyinin (“Rosaviasiya”) 2020-ci ildə Simferopol (Krım) və İrəvan hava limanları arasında aviaəlaqənin açılmasını razılaşdırdığını bildirib: “Cari ilin mart ayından Krım və Ermənistan arasında müntəzəm aviareyslərin başlanması planlaşdırılır. “İkar” aviaşirkəti artıq müntəzəm uçuşlar üçün “Rosaviasiya”dan müvafiq icazə və təsdiq alıb. İndi məsələ uçuş cədvəlləri və hava limanları ilə razılaşmalar baxımından hazırlıq və razılaşdırma mərhələsindədir. Uçuşlar mart ayından həftədə iki dəfə planlaşdırılır. Daha sonra isə tələbatdan asılı olacaq, lakin həftədə yeddi dəfədən artıq olmayacaq”. Çernyak bu aviamarşrutun Krımın anneksiyasından sonra gerçəkləşdirilən ilk beynəlxalq reys olduğunu deyib. Separatçıların nümayəndəsi müntəzəm uçuşların açılmasının Krıma beynəlxalq uçuşların başlamasını və Simferopol hava limanının beynəlxalq statusunu daha da gücləndirəcəyini vurğulayıb.
Bütün bunlar Ermənistanın separatçılığa növbəti dəstəyi, eyni zamanda Ukraynaya da xəyanəti sayılır. Hesab edilir ki, reyslərin həyata keçməsinə başlandıqdan sonra Kiyev və İrəvan arasında ciddi diplomatik qalmaqal başlanacaq. Ukrayna onsuz da Ermənistanın Krımla bağlı siyasətindən ciddi narazılıq ifadə edirdi. Belə ki, bir müddət əvvəl Ukrayna Xarici İşlər Nazirliyi Ermənistan vətəndaşlarının və rəsmi nümayəndələrinin Krım bölgəsinə qanunsuz səfəri ilə bağlı rəsmi İrəvana xəbərdarlıq edib. Ermənistan isə beynəlxalq hüquqa məhəl qoymamaq siyasətini davam etdirir. Elə bu günlərdə Krımda istirahət edən “xarici turistlərin” 16 faizini Ermənistan vətəndaşlarının təşkil etdiyi məlum olub. Bunu səyahətçilər üçün fəaliyyət göstərən “Biletix” internet-servisinin məlumatları da sübut edir.
Ukrayna Ali Radasının Milli Təhlükəsizlik və Müdafiə Məsələləri üzrə Komitəsinin üzvü İrina Vereşçuk da bildirir ki, baş verənlər normal vəziyyət deyil. O, “media” portalına açıqlmasında bildirir: “Bu vəziyyət elə Krımın anneksiyasının lap əvvəlindən anormaldır. Ermənistanın BMT-də necə səs verdiyini xatırlayırıq. Mən artıq Ermənistanın Ukrayna ərazisi olan Krımın ilhaqını dəstəkləməklə düzgün davranmadığını demişəm və deməyə davam edəcəm. İndi də Ukraynaya münasibətdə öz siyasətinin davamında ermənilər xoşagəlməz fəaliyyətini sürdürür. Lakin bu, Ukrayna üçün qəbuledilməzdir. Çünki bizim Ermənistanla diplomatik, ticarət münasibətlərimiz var. Bütün bunlara baxmayaraq, Ermənistan vətəndaşları Ukrayna sərhədlərini qanunsuz keçirlər. Onları cinayət məsuliyyətinə cəlb etmək olar. Bizdə qanun pozucularına qarşı üç ilə qədər azadlıqdan məhrumetmə cəzası nəzərdə tutan 2018-ci ildə qəbul edilmiş qanun var. Bu qanun, həmçinin, xarici vətəndaşlara da aiddir. Bu vəziyyət həm Xarici İşlər Nazirliyinin, həm də parlamentin xüsusi diqqətini tələb edir. İrəvandan Simferopola birbaşa uçuşlar Ermənistanın Ukraynaya təcavüzü dəstəklədiyi anlamına gələcək. Ermənistanın Ukraynaya qarşı bu cür xoşagəlməz hərəkətlərə son qoyması üçün bütün qanuni vasitələrdən istifadə edəcəyik”. Ukraynalı diplomat və politoloq Vadim Tryuxan bildirib ki, Rusiya üçün Krım hava limanları və Sevastopoldan müntəzəm birbaşa beynəlxalq aviaəlaqələrin təşkil olunması prinsip məsələsidir: “Ənənəvi olaraq Rusiyaya yönələn Ermənistan, çətin ki, belə bir təhlükəli presedentin yaradılmasına getsin. Düşünürəm ki, ukraynalı diplomatlar Ermənistan rəhbərliyinə belə bir hipotetik qərarın faydalarının onun mümkün nəticələrilə nisbətdə müqayisəolunmaz şəkildə az olacağını izah edə biləcəklər. Bu yaxınlarda Ukraynanın İrəvandakı səfirliyinə təcrübəli ukraynalı diplomat - İvan Kuleba rəhbərlik edib. Ukraynada gözəl bilirlər ki, Rusiya öz maraqları naminə bu yarımasılı ölkədən istifadə etməyə çalışacaq. Buna görə də bu və buna bənzər vəziyyətlərdə Ukrayna qabaqlayıcı tədbirlər görəcək”. Ekspert bildirib ki, Ermənistan aviaəlaqəni yaratmaq qərarına gəlsə, bu zaman Qərb Ermənistana qarşı sanksiyalar tətbiq edə bilər. Ukraynalı politoloq, hər şeyə rəğmən, Ermənistanın Krımla aviaəlaqə yaratmaq qərarının qəbul edilməsi ilə bağlı özünə hesabat verəcəyinə ümid etdiyini, əks halda rəsmi İrəvanın mümkün fəsadlarla qarşılaşa biləcəyini bildirib. Hələlik isə hesab olunur ki, iki aydın sonra Ermənistandan Krıma həqiqətən də aviareyslər başlasa, Ermənistan buna görə təkcə Ukrayna yox, bir sıra digər dövlətlər, o cümlədən Qərb dünyası ilə də ciddi problem yaşayacaq. Dünya bir daha Ermənistanın separatçı siyasətinin nə qədər təhlükəli xarakter daşıdığını aydın görəcək.
Nahid SALAYEV
