09/07/2020 15:12
728 x 90

İki mindən artıq müşahidəçinin seçki şəffaflığını təmin edə biləcəyinə böyük inam var

img

Fevralın 9-da ölkəmizdə keçiriləcək növbədənkənar parlament seçkilərində iştirak edəcək müşahidəçilərin sayı məlum olub. Belə ki, parlament seçkiləri ilə əlaqədar müraciət edən yerli və xarici müşahidəçilərin sayı açıqlanıb. Mərkəzi Seçki Komissiyasının (MSK) sədri Məzahir Pənahov mətbuata bildirib ki, Milli Məclisə növbədənkənar seçkilərlə əlaqədar 2000-ə yaxın yerli və xarici müşahidəçi müraciət edib və onların, demək olar ki, əksəriyyəti müsbət cavab alıb.

MSK sədrinin sözlərinə görə, həmin müşahidəçilərin 1630-u yerlidir: “Xarici müşahidəçilərin sayı isə 70-ə yaxındır. ATƏT-in Demokratik Təsisatlar və İnsan Hüquqları Bürosunun, Müstəqil Dövlətlər Birliyi Parlament Assambleyasının müşahidə missiyası artıq fəaliyyətə başlayıb. İtaliya, Çexiya parlamentlərinin, Litva Seyminin müşahidəçiləri artıq akkreditasiyadan keçiblər. Moldova Mərkəzi Seçki Komissiyasının nümayəndələri də seçkiləri müşahidə edəcək. Xarici müşahidəçilərin qeydiyyatı prosesi hazırda sürətlə davam edir”.

Azərbaycanda keçiriləcək növbədənkənar parlament seçkilərini izləyəcək 2000 yaxın müşahidəçinin sayı yetərlidirmi?

  • Elçin Mirzəbəyli: “Zənnimcə, 2000-ə yaxın müşahidəçi seçkilərdə şəffaflığın təmin olunması üçün yetərlidir”

“Xalq cəbhəsi” qəzetinin baş redaktoru, politoloq Elçin Mirzəbəyli “Bakı-Xəbər”ə bildirdi ki, iki minə yaxın müşahidəçi seçki prosesini izləmək üçün yetərlidir: “Hesab edirəm ki, seçki prosesini izləyəcək müşahidəçilərin sayı yetərlidir. Yerli müşahidəçilərin də sayı çox olacaq. Faktiki olaraq deputatlığa namizədlərin də nümayəndələri seçki prosesini izləyəcəklər. Bu baxımdan da, zənnimcə, 2000-ə yaxın müşahidəçi seçkilərdə şəffaflığın təmin olunması üçün yetərlidir”.

  • Bəhruz Quliyev: “Seçki prosesini izləmək üçün qeydiyyatdan keçən 2000 müşahidəçi az deyil”

“Səs” qəzetinin və eyniadlı informasiya agentliyinin baş redaktoru, siyasi icmalçı Bəhruz Quliyev də hesab edir ki, bu rəqəm yetərlidir. Bununla belə, ekspertin fikrincə, müşahidəçilərin sayının artacağı ehtimal olunur. “Ümumiyyətlə, Azərbaycanda keçiriləcək növbədənkənar parlament seçkilərini izləmək üçün müraciət edən heç bir müşahidəçiyə maneə törədilmir, onlar maneəsiz qeydiyyatdan keçirlər, prosesi izləmək üçün vəsiqə alırlar. Məlum olduğu kimi, xarici müşahidəçilər də daxil olmaqla, 2000 müşahidəçi qeydiyyatdan keçib. Hesab edirəm ki, müşahidəçilərin sayı yenə də artacaq. Yəni müraciət edənlər yenə də olacaq. Digər tərəfdən, seçki prosesini izləmək üçün qeydiyyatdan keçən 2000 müşahidəçi az deyil, bu prosesi izləmək üçün kifayətdir. Seçkinin demokratik şəkildə keçirilməsi üçün ölkəmizdə kifayət qədər şəffaf mühit formalaşıb. Həm qanunvericiliyin mükəmməlliyi, həm texniki təsisat məsələsindəki problemsizlik, müşahidəçilərin qeydiyyatı məsələsindəki şəffaflıq, namizədlərin aktivliyi, onların təbliğatı üçün heç bir maneənin olmaması seçkilərin şəffaf keçiriləcəyinə təminat verir. Həm yerli, həm də xarici müşahidəçilər seçkini izləyəcəklər. Azərbaycanda artıq parlament seçkilərinin tam şəffaf və demokratik şəraitdə keçirilməsi üçün mühit formalaşıb. Yəni artıq yaradılan mövcud mühit bu şəffaflığı ortaya qoyub” -deyə B.Quliyev vurğuladı.

İradə SARIYEVA

Son xəbərlər