Fikrət Sadıqov: “Beynəlxalq təşkilatlar Qarabağ məsələsində nəinki biganəlik göstərir, həm də tez-tez ikili standartlardan çıxış edirlər”
Ermənistanı işğal altındakı Qarabağla birləşdirəcək 3-cü alternativ yol çəkilir. 26 kilometrlik şosse yolu Kəlbəcərin rayon mərkəzindən Ermənistanın Qeqarkunik vilayətində yerləşən Zod kəndinə çəkiləcək.
Zod-Kəlbəcər yolunun 2020-ci ilin sonuna qədər istifadəyə verilməsi gözlənilir. Qeyd olunur ki, yolun inşasının hava şəraitinin istiləşməsi ilə yanaşı aparılması nəzərdə tutulub. Hava isinən kimi, yolun çəkilişi ilə bağlı işlərin sürətləndiriləcəyi deyilir.
Qeyd edək ki, bu Gorus-Xankəndi və Vardenis-Ağdərə yolundan sonra Ermənistanla Qarabağı birləşdirən sayca 3-cü yol olacaq. Artıq ermənilər heç nədən çəkinmədən 3-cü yolun çəkilişini reallaşdırırlar.
Maraqlıdır ki, ermənilərin Qarabağa üçüncü yol çəkməyə başlamasına və bundan əvvəl sözügedən niyyəti bəyan etmələrinə rəğmən, aparıcı beynəlxalq qurumlar, münaqişənin həllində vasitəçilik edən ATƏT-in Minsk Qrupu buna hansısa formada reaksiya vermir. Ən azından, etiraz edə bilərdilər ki, belə təşəbbüslər danışıqlar prosesinə zərər vurur. Ancaq, göründüyü kimi, beynəlxalq təşkilatlar bunu susqunluqla izləyir. Bununla susan dünya Azərbaycanı müharibə aparmağa bir növ vadar edir. Yoxsa belə olmasaydı, heç olmasa buna formal tərzdə etiraz edərdilər. Göründüyü kimi, beynəlxalq təşkilatlar bunu belə özlərinə rəva görmürlər.
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, beynəlxalq qurumların ermənilərin bu həyasızlığına göstərdikləri belə biganə münasibət Azərbaycanı münaqişənin həlli ilə bağlı başqa vasitələrə əl atmağa sövq edir: “Biz təzyiq siyasətimizi bundan sonra da gücləndirməliyik. Vasitəçilər, digər beynəlxalq strukturlar biganəlik nümayiş etdirməkdə davam edirlərsə, o zaman biz səylərimizi daha da artırmalıyıq. Həm siyasi, həm də hərbi müstəvidə. Hücumedici siyasət təkcə diplomatik müstəvidə yox, hərbi müstəvidə də həyata keçirilməlidir. BMT, Avropa Şurası və ATƏT mütləq buna diqqət yetirməlidir. Bizim sözügedən təşkilatlardakı diplomatik heyətlərimiz daha güclü şəkildə işləməlidirlər. Aydın məsələdir ki, sözügedən münaqişənin həlli tək onlardan asılı məsələ deyil. Biz eyni zamanda həmin təşkilatların Bakıdakı nümayəndəlikləri ilə də intensiv işləməliyik. Beynəlxalq təşkilatlar Qarabağ məsələsində nəinki biganəlik göstərir, həm də tez-tez ikili standartlardan çıxış edirlər. Məsələn, Krımla bağlı Qərb Rusiyaya qarşı sanksiyalar tətbiq edir, amma eyni vəziyyət Qarabağda yarananda bunu görməzdən gəlirlər. Hesab edirəm ki, bu yolverilməzdir. Ona görə də daima bu məsələni gündəmdə saxlamalıyıq. Bununla belə, hərbi təzyiqləri artırmalıyıq. İşğal olunmuş regionlara yaxın ərazilərdə hərbi təlimlər keçirilməli və güc nümayiş etdirilməlidir. Onlara sübut etmək lazımdır ki, əks halda bu hərbi texnika düşmənə qarşı yönələcək. Ona görə də hesab edirəm ki, siyasi-hərbi müstəvidə təzyiqlər paralel şəkildə aparılmalıdır”.
Vidadi ORDAHALLI
