Tehran yaxınlığında qəzaya uğrayan Ukraynaya məxsus “Boeing 737” təyyarəsi "insan səhvi" nəticəsində təsadüfən vurulub. Bu barədə İran Silahlı Qüvvələrinin Baş Qərargahının açıqlamasında deyilib.
İran Silahlı Qüvvələrinin Baş Qərargahı təyyarəni, İslam İnqilabı Keşikçiləri Korpusunun (SEPAH) hərbi obyektinin yaxınlığında uçduğu üçün vurduqlarını bildirib. İranın İRİB dövlət televiziya və radio şirkəti də məlumat yayıb ki, təyyarə bir insan səhvi və təsadüf üzündən vurulub.
İranın xarici işlər naziri Cavad Zərif öz növbəsində "Twitter" hesabında yazıb ki, "ABŞ avantürizmi tərəfindən ortaya çıxan böhran zamanı insan səhvi" qəzaya səbəb olub. O, eyni zamanda təyyarə qəzasında həlak olanların ailələrinə başsağlığı verərək üzr istəyib.
Xatırladaq ki, Ukraynaya məxsus “Boeing 737” təyyarəsi yanvarın 8-də qəzaya uğrayıb. Qəzada 176 nəfər - İran, Ukrayna, Kanada, İngiltərə, Almaniya, İsveç və Əfqanıstan vətəndaşları həyatını itirib.
Bir neçə gün idi ki, ABŞ və Kanada kəşfiyyatçılarının dediklərinə zidd olaraq İslam Respublikası təyyarəni vurduğunu inkar edirdi. Xatırladaq ki, Azərbaycana məxsus olan bəzi sərnişin təyyarələri də İran üzərindən uçuş həyata keçirir. Xüsusilə də blokada şəraitində olan Naxçıvana Bakıdan reallaşan sərnişin təyyarə reyslərinin hamısı İranın üzərindən aparılır. Belə olan təqdirdə, bizim sərnişin təyyarələri üçün də hər hansı təhlükə risqi yarana bilərmi?
Təhlükəsizlik məsələləri üzrə ekspert Arzu Nağıyev “Bakı-Xəbər”ə açıqlamasında bildirdi ki, artıq Tehran-Kiyev reysi ilə uçan təyyarənin raketlə vurulduğu tam təsdiqini tapıb: “İranın xarici işlər naziri Zərif buna görə özünün “Twitter” səhifəsində üzrxahlıq da edib. Hadisə baş verən andan onun vurulması ilə bağlı fikirlər səslənirdi. Kanada və Qərb dövlətləri ortaya dəqiq faktları qoyandan sonra İran bu etirafı etmək məcburiyyətində qaldı. Təəssüflər olsun ki, insan tələfatı ilə nəticələnən bu hadisə baş verib. İranın dediyinə görə, general Süleymaninin ölümündən sonra həmin ölkənin hərbi hava qüvvələri “nömrə bir” hazırlığı vəziyyətinə gətirilib. Məhz belə bir vaxtda, mülki bir təyyarənin vurulması həmin sistemin bərbad vəziyyətdə olmasından xəbər verir. Onlar elə başa düşüblər ki, həmin təyyarə ABŞ-a məxsus olan pilotsuz uçan qurğudur. İranın açıqlamasında insan faktoru nəticəsində baş verən səhvlik məsələsi də yer alır. Bütün bunlar İrana baş ucalığı gətirmir. Trampın da verdiyi sakit açıqlamalar müəyyən şübhələr üçün əsas vermiş olur. Artıq bir çox ölkələr İran üzərindən uçuşları dayandırıb. Əksər ölkələr bütün beynəlxalq uçuşları Azərbaycan üzərindən həyata keçirir. Azərbaycan məcburi qaydada Naxçıvana gedən reysləri İran üzərindən həyata keçirir. Bu, uçuş İran üzərində elə də böyük ərazini əhatə etmir və həmin hərbi obyektlərin üzərinə düşmür. Buna baxmayaraq, yenə də, təhlükəsizlik tədbirlərimizi görməliyik. Düşünürəm ki, bu istiqamətdə müəyyən addımlar atılıb. Belə müharibələr zamanı heç bir ölkə terror və başqa təxribatlardan sığortalana bilməz. Bu baxımdan da, təhlükəsizliyə təhdidin qarşısının alınması ilə bağlı tədbirlərimizi gücləndirməliyik. İran tərəf bu işdə günahını etiraf edirsə, mülki uçuşlarla bağlı məsuliyyətini daha da artırmış olacaq”.
Məhəmmədəli QƏRİBLİ
