10 yanvar 2020-ci ildə Bişkek şəhərində Azərbaycan-Qırğızıstan Dostluq Parkının təməlqoyma mərasimi keçirilib.
Qırğızıstan mətbuatı xəbər verir ki, təməlqoyma mərasində Qırğız Respublikasının Prezidenti Sooronbay Jeenbekov, Azərbaycanın Qırğızıstandakı səfiri Hidayət Orucov, Qırğızıstanın Xarici İşlər naziri Çingiz Aydarbekov, Bişkek şəhərinin meri Əziz Surakmatov, Parlamentin deputatları, Bişkek şəhərinin Oktyabr rayonun icra başçısı Maksim Sitnikov, şəhər sakinləri və KİV nümayəndələri iştirak edib.
Prezident Sooronbay Jeenbekov və səfir Hidayət Orucov Azərbaycan-Qırğızıstan Dostluq Parkının və Heydər Əliyev adına məktəb binasının layihələri ilə tanış olduqdan sonra parkın təməlini qoyublar.
Mərasimi Bişkek şəhər meri Əziz Surakmatov açaraq Azərbaycan və Qırğızıstan dostluğunun simvolu olan parkın açılması münasibətilə mərasim iştirakçılarını təbrik etdi.
Prezidenti Sooranbay Jeenbekov Bişkek şəhərində məktəb kompleksinin tikilməsinə, paytaxtın ən görkəmli rayonlarından birində möhtəşəm parkın salınmasına göstərdiyi köməyə və verdiyi böyük dəstəyə görə Azərbaycan Prezidenti İlham Əlyevə təşəkkürünü bildirib, qeyd edib ki, Azərbaycan-Qırğızıstan Dostluq Parkı iki dövlət arasında münasibətlərin nə qədər yüksək səviyyədə olduğunun göstəricisidir.
Azərbaycanla Qırğızıstan arasında dostluğun tarixi köklərə dayandığını bildirən Prezident qeyd edib ki, burada 20 mindən çox azərbaycanlının yaşaması da bu münasibətlərin daim yüksələn xətlə inkişafına zəmin yaradır.
Sonra səfir Hidayət Orucov Azərbaycan Prezidenti İlham Əliyevin müraciətini mərasim iştirakçılarına çatdırıb. Vurğulaıb ki, xalqlarımızı etnik və tarixi bağlar, ortaq mədəniyyət, adət-ənənələr və dil bağlayır. Ölkələrimiz arasında sıx və səmərəli əməkdaşlıq üçün geniş imkanlar mövcuddur.
Gələcək nəsillərin bu əlamətdar hadisəni xatırlayacağına əminliyi ifadə edən səfir mərhum prezident Heydər Əliyevin "Manas" dastanının 1000 illiyinə həsr olunmuş təntənəli yığıncaqda çıxışından sitat gətirərək qeyd edib ki, "Manas" qırğız xalqının böyük mədəni və mənəvi sərvətidir, bütün dünya sivilizasiyasının, bəşəriyyətin dəyərli sərvətidir, türk dünyasının, türkdilli xalqların, İslam dünyasının böyük mənəvi sərvətidir. "Manas" eyni zamanda Azərbaycan xalqına məxsusdur, Azərbaycan xalqının da mənəvi, mədəni sərvətidir”- o deyib.
