Dünya siyasi gündəminin hələ də əsas aparıcı mövzusu ABŞ və İran arasında baş verənlər və bunun sonrakı gedişidir. Məhz belə bir vaxtda İran tərəfi olduqca diqqət cəlb edən bir açıqlama yayıb. İranın Baş Qərargahının mətbuat xidməti savaşın davam edəcəyini açıqlayıb:“ABŞ-ın İraqdakı bazalarına endirilən raket zərbələri ilə intiqam hücumlarımız başa çatmayıb”.
Açıqlamaya görə, Vaşinqton intiqam hücumlarının növbəti mərhələsinin irəlidə olduğunu bilməlidir:“Əvvəl həyata keçirilən hücumlarla intiqam cavabının başa çatdığını düşünmürük. Əsas intiqam elə səviyyədə olacaq ki, amerikalılar bölgədən çıxıb getmək məcburiyyətində qalacaqlar”. Açıqlamada qeyd olunub ki, son hücumlar ABŞ-ın müdafiə sistemlərinin istənilən səviyyədə olmadığını ortaya qoyub. İslam İnqilabı Keşikçiləri Korpusunun nümayəndəsi, əməliyyata komandanlıq edən generalın köməkçisi Abbas Nilfuruşan bildirir ki, ABŞ bazalarına endirilən raketlər hədəfi dəqiqliklə vurub. O qeyd edir ki, amerikalı hərbçilər texnologiyalar vasitəsilə raketlərin istiqamətini dəyişdirməyə cəhd etsələr də, nəticəsiz qalıb. Abbasın sözlərinə görə, mərmilər bir metr olsun belə hədəfdən yayınmayıb. Xatırladaq ki, raketlərin ABŞ bazalarını vurmadığı barədə iddialar var. Pentaqonun açıqlamasına görə, İran vəziyyətin daha da gərginləşməməsi üçün bilərəkdən raketləri boş ərazilərə endirib. Bu üzdən tələfatın olmadığı irəli sürülüb. Qeyd edək ki, Qərb mediasında İranın atdığı raketlərdən bir neçəsinin boş əraziyə düşdüyünə dair fotolar yayılıb. Amma yuxarıda səslənən fikirlərdən belə bəlli olur ki, tərəflərin savaşı davam edəcək. Xatırladaq ki, tərəflərin əsas savaş meydanı İraqdır. Belə ki, ABŞ İranı İraqda vurur. İran ABŞ-ı yenə də İraqda vurur.
İranın əsas niyyəti, əslində İraqdan ABŞ qüvvələrini çıxarmaqdır. Belə vəziyyətdən təkcə ABŞ yox, onun bölgədəki qüvavələri də ciddi narahatdır. Hətta Səudiyyə Ərəbistanının xarici işlər üzrə dövlət naziri Adil əl-Cubeyr bildirib ki, ölkəsi İraqda müharibəyə və qan tökülməsinə imkan verməyəcək:"Səudiyyə Ərəbistanı Krallığı İraqdakı vəziyyəti diqqət və narahatlıqla izləyir və bu ölkədə müharibə və zorakılığın baş verməməsinə çalışır". Adil əl-Cubeyr vurğulayıb ki, onlar İranın İraqda güclənməsinə qarşıdır. İsrail Baş Qərargah Rəisliyi də İraqda İranın güclənməsinə imkan vermək niyyətində olmadıqlarını açıqlayıb. Bura, həmçinin, Suriya da daxil edilib.
Məhz belə bir vaxtda İsrailin Pilotsuz Uçuş Aparatları İraq-Suriya sərhədindəki bəzi mövqelərə aviazərbələr endirib. Faktı təsdiq edən Suriya İnsan Haqlarını Müşahidə Şurası hücumda İranın dəstəklədiyi milislərin hədəf alındığını açıqlayıb. Bildirilib ki, bölgədəki şiə milislərinə aid depo və silahdaşıyan maşınlar partladılıb. Livanın “Əl-Mayadin” kanalı isə İsrailə aid PUA-ların Suriya-İraq sərhədində bəzi hədəfləri vurduğunu bildirib. İsrailin “Haaretz” qəzeti son zamanlarda İraqda bir sıra hücumların İsrailin adına yazıldığını, bunlardan bəzilərinin Suriya-İraq sərhədinə və Əbu-Kamal-Qətər keçidinə yaxın ərazilərdə olduğunu xatırladıb. “Haaretz”ə görə, hücumlar İran dəstəkli şiələri və silah daşıyan yük maşınlarını hədəf alır.
Qeyd edək ki, İsrailin baş naziri Benyamin Netenyahu general Qasım Süleymaninin öldürülməsi ilə bağlı ilk açıqlamasında ABŞ prezidenti Donald Trampa dəstək mesajı vermişdi “Prezident Tramp sürətli, güclü və qətiyyətli formada hərəkət etdiyi üçün hörmətə layiqdir. İsrail sülh, müdafiə və təhlükəsizlik mübarizəsində ABŞ-ın yanındadır”.
Bütün bunlardan belə görünür ki, ABŞ İraqda və Suriyada mövqelərini qorumaq üçün İsrail, Səudiyyə Ərəbistanı kimi ölkələrdən istifadə etməyi düşünür. Bunun əvəzində İranın İraqda və Suriyada ona bağlı qüvvələri daha aktiv hala gətirməsi proqnozlaşdırılır. Yəməndə husilərlə bağlı olan proseslərin daha kəskin, ciddi bir mərhələyə qədəm qoyması ehtimalı yüksəkdir. Livanda da vəziyyətin qarışması qaçılmaz sayılır. Bu durumda İranla açıq savaşa getməyin qarşısını almaq üçün ABŞ Konqresinin Nümayəndələr Palatası ölkə prezidenti Donald Trampın qanunvericilər tərəfindən müvafiq icazə olmadan İrana qarşı Silahlı Qüvvələrdən istifadə məsələsində səlahiyyətlərini məhdudlaşdıran qətnaməni bəyənib. Qətnamə prezidentin üzərinə ABŞ administrasiyasının Konqresdən müvafiq icazəni almayana qədər və ya "Birləşmiş Ştatlara silahlı hücum" olmayınca İrana qarşı və onun ərazisində hərbi hərəkətlərə başlamamaq öhdəliyi qoyur. Oxşar qətnamə respublikaçılar tərəfindən nəzarət edilən Senata göndərilib. Sənədin yuxarı palata tərəfindən qəbul olunacağı istisna edilmir. Ağ Evin mətbuat katibinin müavini Hoqan Qidli bildirib ki, ABŞ Nümayəndələr Palatasının Trampın İrana qarşı silahlı qüvvələrdən icazəsiz istifadə etməsini qadağan edən qətnaməsi Ağ Ev tərəfindən müsbət qiymətləndirilməyib. O, Trampın prezident olaraq ölkəni və amerikalıları terror fəaliyyətindən qorumaq hüququna sahib olduğunu vurğulayıb. Qidli qətnaməni ölkənin hərbi qüvvələrinin İranın terror fəaliyyətlərinin qarşısını almaq qabiliyyətinə xələl gətirəcək bir səhv adlandırıb.
Tahir TAĞIYEV
