Erməni mətbuatı Türkiyə ilə yanaşı, Rusiyanı da kəskin tənqid etməyə başlayıb. Son vaxtlar Putinə yönəlik ittiham xarakterli tənqidi yazılar artıb.
Məlum olduğu kimi, Rusiya Prezidenti Vladimir Putin “Türk axını” kəmərinin açılışı ilə əlaqədar Türkiyədə səfərdə olub. Səfər çərçivəsində Putin türkiyəli həmkarı Ərdoğanla görüşüb. Son görüşdən narahat olan erməni mətbuatı yazır ki, 100 il əvvəl Rusiya ilə Türkiyə Ermənistanı necə böldülərsə, indi də Suriya ilə Liviyanı bölürlər: “Suriyada Putinlə Ərdoğan arasında kürdlərin məskunlaşdığı bölgələrin bölünməsi ilə bağlı razılıq əldə edildiyi deyilir. Eyni şeyin Liviyada da tezliklə baş verə biləcəyinə işarə edirlər. Putinlə Ərdoğan 100 il əvvəl Rusiya və Türkiyənin erməni torpaqlarını öz aralarında bölüşdürdükdə etdiklərini indi Suriya və Liviyada etməyə çalışırlar”.
Daha sonra qeyd edilir ki, Rusiya nə qədər çalışsa da, ABŞ dünyada ən güclü dövlətdir. O səbəbdən ABŞ bölgədən geri çəkilməyəcək. Bunu həm də onunla əsaslandırmağa çalışırlar ki, ABŞ Rusiyaya Sankt-Peterburqda yeni il üçün hazırlanan terror aktları barədə məlumat verdi: “Bu məlumat o qədər vacib idi ki, Putin şəxsən Trampa zəng edib təşəkkür etdi. Bu o deməkdir ki, ABŞ Rusiya haqqında FSB-dən daha çox şey bilir”.
Göründüyü kimi, ermənilər bu dəfə Putini fərqli formada ittiham edirlər. Maraqlıdır, bütün bunların arxasında nə dayanır?
“Son illər Türkiyə-Rusiya əlaqələrinin strateji cəhətdən inkişaf etməsi Ermənistanda ciddi narahatlıq yaradır”
Məsələyə münasibət bildirən politoloq Məhəmməd Əsədullazadənin sözlərinə görə, erməni mətbuatında Putinə yönəlik ittihamların artması təsadüfi deyil: “Son illər Türkiyə-Rusiya əlaqələrinin strateji cəhətdən inkişaf etməsi Ermənistanda ciddi narahatlıq yaradır. Çünki işğalçı ölkə tarix boyu regionda Türkiyə və Azərbaycana qarşı Moskvanın əlində alət olub. Ancaq Moskva öz regional və beynəlxalq siyasətini məhz İrəvanın maraqlarına uyğun atmır. Ona görə də Türkiyə ilə siyasi-iqtisadi, hərbi-texniki əlaqələri genişləndirir. Xüsusilə son vaxtlar enerji sahəsində uğurlu əməkdaşlıq regionda yeni dəyişikliklərə yol açır. Bu da Ermənistanın bir dövlət kimi əhəmiyyətini ciddi surətdə heçə endirir. Hesab edirəm ki, İrəvanın bu acizanə narahatlığı Moskva tərəfindən ciddi qəbul olunmur. Regional oyunçu olan Türkiyənin geosiyasi proseslərdə rolu Kremli daha diqqətli siyasət yürütməyə sövq edib. Putin bütün bunların fərqindədir. Xüsusilə Suriya və Yaxın Şərqdə gərginlik fonunda iki ölkə arasında münasibətlərin yüksək səviyyədə saxlanması, bundan sonra da davam etdirilməsi ermənilərin yaxın perspektivdə Moskva üçün bir önəminin qalmamasına gətirə bilər. Hərçənd, Moskvanın buna getməsi mümkün ola bilər. Ermənistan mətbuatının Rusiyaya qarşı informasiya müharibəsi Paşinyanın Kreml tərəfindən daha da iqnoruna gətirəcək. Moskva bu kimi məsələlərə ötəri yanaşmır. Rusiyanın Ermənistana verdiyi dəstək yalnız Qarabağ məsələsindədir. Bu münaqişə həll edilərsə, Ermənistan-Rusiya münasibətləri tam qırılar. Türkiyə-Rusiya əlaqələrinin Qarabağ münaqişəsinin nizamlanmasında mühüm rol oynaması mümkündür”.
Vidadi ORDAHALLI
