Cari ilin əvvəlindən etibarən Ermənistanda yenə ciddi narazılıq predmetinə çevrilən məqamlardan biri də ölkədə diktatura meyllərinin güclənməsidir. “Qraparak” qəzetinin məlumatına görə, bu hal özünü indi ən müxtəlif məqamlar üzrə göstərir. Məsələn, qeyd olunur ki, Ermənistanda kənd icmalarına qarşı kampaniya yenidən geniş vüsət alır.
Qəzet yazır ki, əvvəllər Ermənistan rəhbərliyi “narazılar” qrupunun arzuolunmaz rəhbərlərinə qarşı icmalarda etiraz aksiyaları təşkil etməklə onların istefasına nail olurdusa, son zamanlar başqa metodlar işə salınıb: “Böyük şəhərlərin merləri ilə ərazi idarəetməsi və inkişaf naziri Suren Papikyan “danışıqlar aparır” - əvvəlcə “xoşluqla” anladır ki, onunla çalışmağı məqsədəuyğun hesab etmir və getməyi daha yaxşı olar.
Kiçik icmaların rəhbərləri ilə isə qubernatorlar “işləyir”. Müqavimət göstərənlər kriminal olaylara cəlb olunur. Bir neçə gün bundan əvvəl Dilican meri Armen Santrosyana qarşı vəzifə səlahiyyətlərindən sui-istifadə və 75 milyon dram dəyərində zərərvurma ittihamı ilə cinayət işi qaldırılıb. İcevanın keçmiş meri də analoji yolla vəzifəsindən kənarlaşdırılıb. Yayılan məlumatlara görə, bu mənada növbəti “qurban” Cermuk şəhərinin meri olacaq. Bunlar Paşinyan diktaturasının yeni idarəetmə qaydalarıdır. Belə vəziyyət ölkəni əsl xaosa sürükləyir”.
Helsinki Vətəndaş Assambleyası Vanadzor ofisinin rəhbəri, hüquq müdafiəçisi Artur Sakunts da bu mövqeni bölüşür. Onun sözlərinə görə, mövcud konstitusiya Serj Sarkisyanın timsalında prezidentlikdən baş nazirə keçid zamanı dövlətin işğalının davam etməsini təmin etmək üçün qəbul edilib:“Şəxsiyyətin dəyişdirilməsi burada vacib deyil, kim olursa olsun, bu Konstitusiya “sabit siyasi çoxluq” anlayışına sahib olduğu üçün dövlətin işğalına xidmət edən bir Konstitusiyadır. Yəni məzmununda bu, təkpartiyalı bir siyasi sistemin Konstitusiyasıdır və məhz Dövlətin İşğal Konstitusiyası adlanır. Paşinyan bundan imtina etmir və ona qarşı çıxanları ən sərt formada məhv edir”. Ermənistan parlamentinin sabiq vitse-spikeri, Respublika Partiyasının mətbuat katibi Eduard Şarmazanov da vəziyyətin sürətlə pisləşdiyini vurğulayır:“Paşinyan diktaturası fonunda 2020-ci ildə Ermənistanın üzləşəcəyi əsas problemlər ölkənin təhlükəsizliyi, Qarabağ məsələsində hakimiyyətin perepektivsiz siyasəti, konsepsiyasının olmamasından ibarət olacaq”. Onun sözlərinə görə, son iki ildə cəmiyyətin qaralara və ağlara bölünməsi, inkarçı siyasət və nifrət təbliğatı bu çağırışların ayrılmaz hissəsi olub: “Sözün düzü, bu, neobolşevik hakimiyyətidir. Yəni bir tərəfdən Azərbaycan və Türkiyə qarşısında xarici problemlərimiz var, digər tərəfdən son 30 ildə hər gün müharibə ilə üzbəüz qalan bir çox xarici problemlərə sahib bir dövlət var. Birlik təbliği əvəzinə cəmiyyət parçalanıb və bütün bunlar çox narahatedicidir. Bundan çıxmağın iki yolu var, ya demokratiya, həm də milli dəyərlər, ya da zülm üstünlük təşkil etməlidir”. O qeyd edib ki, onların bütün mübarizəsi Respublika Partiyasının hakimiyyətə qayıtması və parlamentdə yer alması üçün yox, Paşinyanın timsalında hakimiyyətin dayanması və ayıq olması üçün gedir:“Əvvəllər yalnız Respublikaçılar və Köçəryanın bir neçə tərəfdarı bu sözləri söyləyirdisə, bu gün bir zamanlar Paşinyanın yanında olanlar eyni fikirdədir. Məsələn, Milli Təhlükəsizlik Xidmətinin keçmiş rəhbəri Artur Vanetsyan da ayılmağa və dayanmağa çağırış edib”. Şarmazanovun fikrincə, ölkəni diktatura vəziyyətinə gətirməmək üçün 2020-ci ildə növbədənkənar parlament seçkiləri keçirilməlidir, çünki Ermənistan Respublikası müstəqillik qazandıqdan bəri ilk dəfə səslərin beşdə üçünün bir nəfərin cibində cəmləşdiyi bir parlament formalaşıb, həmin şəxs də nə istəyir onu da edir: “Respublika Partiyası, Çiçəklənən Ermənistan Partiyası, “İşıqlı Ermənistan” və ya Köçəryanların olmasından və ya kim olacağından asılı olmayaraq, bu vəziyyətdə müxalifətin dövlət naminə qərar qəbul edilməsinə hər hansı təsiri yoxdur. Bu gün Ermənistanda müxalifət hakimiyyətə qarşı çıxmır, dövlətimiz və siyasi sistemimiz raxit vəziyyətindədir. Bir insandan asılı olan bir hakimiyyət var və hakimiyyətin iştahını ölçmək və ya tarazlaşdırmaq üçün heç bir vasitəsi olmayan orta müxalifət var. Mən həmrəylik, dövlət düşüncəsindən uzaq olan məmurlar, dövlətçilik arzulayıram, vətənlərində daxili düşmən axtarmağın nankor bir məşğuliyyət olduğunu başa düşsünlər. Həmçinin arzu edirəm ki, 2020-ci ildə erməni xalqı populist hakimiyyətdən azad olunsun”. Rus analitik Vitali Arkov isə bildirir: “Ermənistandakı vəziyyət indi gördüyümüz eyni ssenariyə uyğun olaraq inkişaf edərsə, Paşinyan və komandasının hakimiyyəti əllərində saxlaması getdikcə daha çətin olacaq. Artıq növbəti parlament seçkilərində acınacaqlı şəkildə uğursuzluğa düçar ola bilərlər. Əlbəttə, seçkilər ədalətli və şəffaf olarsa. Ancaq Paşinyan hökumətinin azadlıq və demokratiya ilə bağlı gəlişi gözəl sözləri deyil, həqiqi hərəkətləri ölkənin mövcud rəhbərliyinin demokratiya prinsiplərinə sadiqliyini getdikcə şübhə altına alır. Getdikcə aydın olur ki, Ermənistan klassik bir sxemlə inqilabdan diktaturaya doğru gedir”.
Nahid SALAYEV
