Prezident İlham Əliyev Vüqar Əhmədovu “Azərişıq” Açıq Səhmdar Cəmiyyəti sədrinin müavini vəzifəsindən azad edərək, “Azərişıq” Açıq Səhmdar Cəmiyyətinin sədri təyin edib. Ölkə başçısı Vüqar Əhmədovu bu vəzifəyə təyin olunması ilə əlaqədar qəbul edib.
Görüşdə çıxış edən Prezident İlham Əliyev vəzifəyə yeni təyin edilən məmura tapşırıqlar verib və ölkəmizin enerji təminatı ilə bağlı yaşadığı çətinliklərdən danışıb: “Bu çox məsuliyyətli vəzifədir və enerji təminatı hər bir ölkə üçün strateji sahədir. Son illər ərzində ölkəmizdə bu sahədə çox böyük işlər görülüb. Regionların sosial-iqtisadi inkişafına dair 2004-cü ildə qəbul edilmiş birinci Dövlət Proqramı çərçivəsində enerji güclərinin yaradılması nəzərdə tutulurdu. Artıq biz buna tam nail olduq. Bu gün bizim təqribən 1000 meqavatlıq əlavə enerji güclərimiz var ki, bu güclər həm ehtiyat təşkil edir, həm də ixrac potensialımızı genişləndirir. Keçən il ölkəmiz elektrik enerjisinin ixracından təqribən 60 milyon dollar civarında vəsait əldə edib”.
Ölkə başçısı bir vaxtlar Bakının enerji təminatı ilə məşğul olan “Barmek” adlı əcnəbi şirkətin yarıtmaz fəaliyyətindən də ətraflı bəhs edib: “...İndi bəziləri unudub, vaxtilə elektrik enerjisinin qıtlığına görə gecə saatlarında televiziya kanalları söndürülürdü. Bakının enerji təminatı tamamilə bərbad vəziyyətə düşmüşdü. Bakının enerji təminatını inhisara götürmüş “Barmek” şirkəti enerji təsərrüfatını tamamilə sıradan çıxarmışdı. İndi bir çoxları o dövrü unudub. Mən bunu yaxşı xatırlayıram ki, məhz mənim göstərişimlə və sərəncamımla xarici iş adamlarının yarıtmaz fəaliyyəti geniş təhlil edildi. Bakının enerji təminatı yenə dövlətə qaytarıldı və “Azərişıq” yaradıldı. “Azərişıq” Səhmdar Cəmiyyətinin adını da mən vermişdim. O gündən bu günə qədər dövlət bu sahəyə böyük vəsait ayıraraq ciddi dönüş yarada bildi. Bu gün Azərbaycanda enerji dayanıqlılığı tam təmin edilir”.
Göründüyü kimi, ölkə başçısı Azərbaycanda olduqca strateji sayılan bir sahəyə nəzarəti üzərinə götürən “Barmek” adlı xarici şirkətin yarıtmaz fəaliyyətindən ətraflı danışıb. Prezident səviyyəsində bildirilən fikirlərdən belə nəticəyə gəlmək olur ki, “Barmek”, faktiki olaraq, iqtisadi diversiya ilə məşğul olub. Çox maraqlıdır ki, bir vaxtlar bəzi dairələr “Barmek”in ölkəmizdən getməsinə təəssüflə yanaşırdılar. Hətta qeyd edirdilər ki, bu, xarici sərmayənin ölkəmizdə azalması, əldən çıxması anlamına gəlir. Ancaq illər sonra ən yuxarı səviyyədə verilən bəyanatların ruhundan bəlli olur ki, sən demə, iqtisadi sferada, mühüm strateji sahələrə nəzarəti ələ almış əcnəbi şirkətlərdən bəziləri, sözün həqiqi mənasında, sabotaj və iqtisadi diversiya ilə məşğul olublar. Onların belə cəhdləri hansı maraqdan irəli gələ bilərdi?
Aydın Hüseynov: “Şirkətin rəhbəri olan Hüseyn Arabulun səriştəsizliyi, şəxsi istəyinə uyğun olaraq davranışlar göstərməsi belə vəziyyəti yaratdı”
Millət vəkili Aydın Hüseynov “Bakı-Xəbər”ə açıqlamasında bildirdi ki, “Barmek”lə bağlı yaşananları bütün əcnəbi şirkətlərə aid etmək olmaz: “Bilirsiniz ki, Azərbaycanda çoxlu sayda əcnəbi şirkət fəaliyyət göstərir. Onlar ölkəmizin iqtisadiyyatına böyük fayda verirlər. Həmçinin, Azərbaycana məxsus olan çoxlu sayda şirkət xaricə qoyulan sərmayə layihələrində iştirak edir. Belə hal məqbuldur. Hesab edirəm ki, “Barmek”lə bağlı yaşananlarda həmin şirkətin təmsil olunduğu ölkə ilə heç bir əlaqəsi yoxdur. Çünki ölkəmizin bütün sahələrində fəaliyyət göstərən türk şirkətləri nümunəvi davranışları ilə yadda qalıblar. “Barmek”lə bağlı yaşananlar onun rəhbərindən qaynaqlanıb. Yəni şirkətin rəhbəri olan Hüseyn Arabulun səriştəsizliyi, şəxsi istəyinə uyğun olaraq davaranışlar göstərməsi belə vəziyyəti yaratdı. Məhz buna görə də, o, cinayət məsuliyyətinə cəlb edildi. Hesab edirəm ki, ən başlıca səbəb həmin şirkətin rəhbərinin məsuliyyətli adam olmamasıdır. Azərbaycan qanunvericiliyi çox mükəmməldir. Yəni hər hansı bir yerli və əcnəbi şirkət ona uyğun şəkildə fəaliyyət göstərsə, onun heç bir problemi olmaz. Bu qanunları pozanlar isə hüququn aliliyi qarşısında cavab verməli olurlar. Təəssüf ki, “Barmek” şirkətinin adı ölkəmizə qoyulan investisiya sahəsində qara zolaqla keçir. Ümid edirəm ki, əcnəbi şirkətlərin timsalında bir daha belə səhlənkarlığa yol verilməyəcək”.
Məhəmmədəli QƏRİBLİ
