ABŞ-ın Müdafiə Nazirliyinin məlumatına görə, İraqda ABŞ qoşunlarının yerləşdiyi iki aviabazaya çoxlu ballistik raket zərbələri endirilib. İranın dövlət televiziyası hücumun ölkənin ən yüksək hərbi komandiri Qasım Süleymaninin ABŞ Prezidenti Donald Trumpın göstərişi ilə Bağdadda pilotsuz təyyarə vasitəsilə vurularaq öldürülməsinə cavab olduğunu bildirib.
Pentaqon İraqın İrbil və Əl-Əsəd bölgələrində iki yerə hücum edildiyini bildirib: "ABŞ-ın İraqdakı obyektlərinə hücum məlumatları barədə xəbərdarıq. Prezidentə məlumat verilib, vəziyyəti yaxından izləyir və milli təhlükəsizlik komandası ilə məsləhətləşir”.
İran İnqilab Keşikçiləri hücumun cümə günü baş verən Süleymaninin ölümünə cavab olduğunu deyiblər: "Biz onun terrorçu ordusuna bazalarını verən bütün ABŞ müttəfiqlərinə İrana qarşı hər hansı təcavüzkar hərəkətlərin başlanğıc nöqtəsi olan hər bir ərazinin hədəfə alınacağı ilə bağlı xəbərdarlıq edirik".
İranın Xarici İşlər naziri Cavad Zərif “Twitter” hesabında hücumun özünümüdafiə xarakteri daşıdığını və vəziyyətin müharibəyə çevrilməsini istəmədiyini yazıb.
Bir müddət sonra ABŞ Prezidenti Donald Tramp "hər şey yaxşıdır" yazıb, əlavə edib ki, hələlik itki ehtimalları qiymətləndirilməyib.
Faktiki olaraq, tərəflər arasında raket müharibəsinə start verilib. Güman edilir ki, ABŞ da İran ərazisindəki bəzi obyektlərə raket zərbələri endirə bilər. Bizə məsafəcə yaxın olan ölkəyə atıla biləcək raketlərin trayektoriyadan çıxıb ərazimizə düşmə ehtimalı nə dərəcədədir? Məlumdur ki, Azərbaycan heç bir hərbi blokda təmsil olunmur və bütün sərhədlərini müstəqil qoruyur. Belə olan təqdirdə, trayektoriyasını azmış və ərazimizə düşmə ehtimalı olan raketlərin zərərsizləşdirilməsi üçün Azərbaycanın hərbi hava hücumundan müdafiə sistemlərinin gücünü yetərli saymaq olarmı?
“Həmin obyektlərin də böyük əksəriyyəti Azərbaycan sərhədindən uzaqdadır”
Hərbi-siyasi ekspert Azad İsazadə “Bakı-Xəbər”ə açıqlamasında bildirdi ki, belə ehtimalları inkar etmək olmaz: “Bizim yaxın qonşumuzda belə böyük hadisə yaşanırsa, təbii ki, bunun bütün aspektlərini təhlil etməliyik. ABŞ-la İran arasındakı gərginlik yeni deyil. Bir neçə ildir belə qarşıdırma yaşanır. Medaiada belə məlumatlar da gedib ki, ABŞ-ın dəstəyilə bizim cənub sərhədlərini qorumaq üçün müasir radiolokasiya stansiyaları quraşdırılıb. Hesab edirəm ki, həmin stansiyalar cənub istiqamətindən gələn zərbələri fiksə etməyə qadirdir. Problem ondadır ki, ABŞ İran ərazisinə zərbə vuracağını bəyan edib. Bu xüsusda 52 obyektin adı çəkilib. Həmin 52 obyektdən hansısa bizim sərhədə daha yaxın ərazidə yerləşirsə, raketlərin trayektoriyasını azıb, bizim əraziyə də düşmə ehtimalı ola bilər. Təxmin edə bilərik ki, ABŞ-ın əsas hədəfində İranın nüvə obyektləri, neft sənayesi və raket bazaları olacaq. Həmin obyektlərin də böyük əksəriyyəti Azərbaycan sərhədindən uzaqdadır. Burada bizim üçün ola biləcək daha mühüm bir təhlükə var. Bilirsiniz ki, İranda çoxlu sayda bizim soydaşımız yaşayır. İrana raket zərbələrinin endiriləcəyi təqdirdə həmin ölkənin daxilində böyük panika yaşanacaq. Bunun da nəticəsində çoxlu sayda qaçqın ordusu bizi əhatə edə bilər. Yəni İranda yaşayan soydaşlarımızın böyük əksəriyyəti bura pənah gətirməyə can atacaq. Bu amil ölkəmiz üçün daha ciddi problemə çevrilə bilər”.
Məhəmmədəli QƏRİBLİ
