Əli Əlirzayev: “İqtisadiyyata qoyulan 250 milyard dollarlıq sərmayə hesabına böyük iqtisadi layihələr həyata keçirilib”
“2003-2018-ci illərdə ölkə iqtisadiyyatına 250 milyard dollar investisiya qoyulmuşdur. Müstəqillik dövründə Azərbaycana yatırılan sərmayənin 93 faizini təşkil edən həmin investisiyanın təxminən yarısı daxili mənbələrin payına düşür”. Bu fikirlər Azərbaycan Respublikası Prezidentinin ictimai-siyasi məsələlər üzrə köməkçisi-şöbə müdiri, professor Əli Həsənovun Prezident İlham Əliyevin dövlət başçısı kimi fəaliyyətinin 15 illiyinə həsr olunmuş “On beş illik prezidentlik dövrünün möhtəşəm zəfər salnaməsi” adlı məqaləsində qeyd olunub.
Yazıda qeyd olunur ki, Prezident İlham Əliyevin hakimiyyəti illərində siyasi sferada olduğu kimi, iqtisadi sahədə də ciddi uğurlar qazanılıb: “Onun rəhbərliyi ilə son 15 ildə həyata keçirilmiş ardıcıl və məqsədyönlü iqtisadi siyasət nəticəsində ölkədə planlı sosialist iqtisadiyyatından bazar iqtisadiyyatına keçid prosesinin başa çatması təmin edilmişdir. Bu dövrdə ÜDM-də özəl sektorun payı 80 faizi ötmüş, makroiqtisadi sabitlik möhkəmləndirilmiş, rəqabətqabiliyyətliliyinə görə Azərbaycan iqtisadiyyatı MDB məkanında birinci yerə yüksəlmişdir. 2004-2018-ci illər ərzində iqtisadiyyatın şaxələndirilməsi, qeyri-neft sektorunun və bölgələrin davamlı yüksəlişi məqsədilə regionların sosial-iqtisadi inkişafına dair üç dövlət proqramı icra olunmuşdur. Hazırda dördüncü proqramın qəbul edilməsinə hazırlıq görülür.
Ötən dövr ərzində qeyri-neft sənayesi ardıcıl şəkildə inkişaf etdirilmiş, ölkə iqtisadiyyatı üçün mühüm əhəmiyyət kəsb edən və müasir texnologiyalara əsaslanan minlərlə yeni müəssisə fəaliyyətə başlamışdır. 2014-cü ilin dekabrında təsdiq edilmiş “Azərbaycan Respublikasında sənayenin inkişafına dair 2015-2020-ci illər üçün Dövlət Proqramı”na uyğun olaraq, ölkə ərazisində çoxsaylı sənaye parkı və məhəllələri, texnoparklar (Sumqayıt, Balaxanı, Mingəçevir, Qaradağ, Pirallahı, Neftçala, Masallı və s.) yaradılmış, istehsal sahələrinin genişləndirilməsi, qeyri-neft sənayesinin ixrac imkanlarının artırılması və innovativ istehsalın inkişaf etdirilməsi istiqamətində ciddi tədbirlər görülmüşdür”.
Bütün bu deyilənlərin fonunda, son 15 il ərzində iqtisadiyyata qoyulan 250 milyard dollarlıq sərmayə ölkənin inkişafında necə rol oynayıb? Nə kimi inkişaf yarada bilib?
Məsələyə münasibət bildirən iqtisadçı-alim Əli Əlirzayevin sözlərinə görə, qoyulan böyük sərmayələr hesabına Azərbaycan iqtisadiyyatı dinamik inkişaf edib: “Son 15 ildə Azərbaycan iqtisadiyyatı davamlı inkişaf edib. İlham Əliyevin siyasəti ulu öndər Heydər Əliyevin uzaqgörən, praqmatik siyasətinin davamıdır. Yəni gələcəyi görmə deməkdir. Bu gələcəyi görmək də müəyyən mexanizmlər üzərində qurulub. Bu nədən ibarətdir? Ölkənin xarici ölkələrlə iqtisadi, siyasi əlaqələrini gücləndirməkdən, davamlı əlaqələri təmin etməkdən ibarətdir. Bu aspektdə də təbii ki, konseptual yanaşmanın hədəfləri var. Bu hədəflərə də Azərbaycan çatır. Son 15 ildə ölkə iqtisadiyyatı dinamik olaraq inkişaf edib. Prezident İlham Əliyev istəyir ki, əhalinin rifah halı daha da yüksəlsin. Aparılan siyasət də bu yöndə qurulub. Ötən 15 ildə ölkə iqtisadiyyatına qoyulan 250 milyard dollarlıq sərmayə hesabına böyük iqtisadi layihələr həyata keçirilib. Bazar iqtisadiyyatı əhəmiyyətli dərəcədə formalaşıb. Əhalinin gəlirləri artıb, sosial təminat yaxşılaşıb. Sərmayələr sayəsində çoxsaylı yeni iş yeri açılıb. Bir sözlə, ölkənin dayanıqlı inkişafı təmin edilib. Azərbaycanın regionları inkişaf edib. Kənd təsərrüfatının bir sıra sahələri yenidən dirçəldilib. İnnovasiyalı iqtisadiyyat qurulur. Ölkə iqtisadiyyatında, idarəçiliyində çevik mexanizmlərin yaradılmasını özündə ehtiva edən islahatlar aparılır”.
Vidadi ORDAHALLI
