İlham Şaban: “İndiki bazar iqtisadiyyatı şəraitində cəlbedici faktorlar olmasaydı, deyilən ölkələr bizi seçməzdi”
Daha bir Avropa ölkəsi Azərbaycanın təşəbbüsü əsasında reallaşan “Cənub Qaz Dəhlizi” layihəsinə qoşulmaq istədiyini bəyan edib.
Qeyd edək ki, energetika naziri Pərviz Şahbazovun Macarıstanın xarici işlər naziri və ticarət naziri Peter Siyarto ilə görüşdə “Cənub Qaz Dəhlizi”nin icra vəziyyəti, genişləndirilmə perspektivləri və növbəti mərhələdə ötürücülük qabiliyyətinin artırılması məsələləri müzakirə edilib. P.Siyarto Macarıstanın gələcəkdə “Cənub Qaz Dəhlizi" layihəsində iştirakda maraqlı olduğunu diqqətə çatdırıb və iki ölkənin müvafiq nazirlikləri arasında dialoqun aparılmasının vacibliyini qeyd edib. Söhbət zamanı Azərbaycanla Macarıstan arasında enerji sahəsində əməkdaşlığın digər istiqamətləri ətrafında da fikir mübadiləsi aparılıb. Xatırladaq ki, Macarıstan bu qısa zaman ərzində “Cənub Qaz Dəhlizi" layihəsində iştirak etmək istədiyini bəyan edən ikinci Avropa ölkəsidir. Bundan əvvəl isə Xorvatiya Prezidenti ölkəsinin belə niyyətinin olduğunu bəyan etmişdi. Bu meyllər Azərbaycanın düzgün qaz strategiyası müəyyənləşdirdiyinin növbəti təsdiqi sayıla bilərmi?
Neft Araşdırmaları Mərkəzinin rəhbəri İlham Şaban “Bakı-Xəbər”ə açıqlamasında bildirdi ki, Azərbaycanın müəyyənləşdirdiyi istər neft, istərsə də qaz strategiyaları düşünülmüş olduğu üçün uğur qazana bilib: “Bu istiqamətlərdə bizim tutduğumuz yol inamlı olub. Biz, həmçinin, bu layihələr zamanı öz milli maraqlarımızla yanaşı, qonşu tranzit ölkələrin də maraqlarını dərindən nəzərə almışıq. Bununla da hər şey bitmir. Azərbaycan həm də istehlakçıların maraqlarına tam uyğun gələn siyasət yürüdür. Bax, bu prinsiplərə əsaslandığımız üçün bizim layihələr uğurlu alınır. İstər Bakı-Tiflis-Ceyhan boru kəməri vasitəsilə reallaşan neft strategiyamızı, istərsə də 2007-ci ildən başlayaraq “Şahdəniz” yatağından əsasını götürən ilkin qaz strategiyamızı və nəhayət, 2018-ci ilin 30 iyunundan Türkiyəyə TANAP vasitəsilə ixrac etdiyimiz qaz satışını buna misal göstərə bilərik. Bütün bunlar bir daha Azərbaycanın seçiminin doğru olduğunu müəyyənləşdirir. Enişli-yoxuşlu yollar keçsək də, bunu ərsəyə gətirməyi bacarmışıq”.
Ekspertin sözlərinə görə, Azərbaycan bu məsələlərdə yalnız öz maraqlarını önə çəkmədiyi üçün, cəlbedici ticarət partnyoru olaraq qəbul edilir: “Ölkəmiz məsələyə yalnız öz sərhədindən durub baxmır. Layihə ilə bağlı yaranan hər hansı bir problem zamanı biz yaxamızı kənara çəkməmişik. Biz hasilata aid olan bütün seqmentlər üzrə ticarət partnyorlarımızla yaxından əməkdaşlıq edirik və həmin ölkələrin də maraqlarını maksimum nəzərə alırıq. Təbii ki, belə strategiya bizi cəlbedici edir. Bunu görən və qaz almaqda maraqlı olan ölkələr bizi seçməli olurlar. İndiki bazar iqtisadiyyatı şəraitində cəlbedici faktorlar olmasaydı, deyilən ölkələr bizi seçməzdi. Heç bir sövdələşmə və ya niyyət boşdan yaranmır. Nəzərə almaq lazımdır ki, bizi dünyada qaz hasil edən yeganə ölkə deyilik. Ciddi rəqabət şəraitində seçim bizim üzərimizdə dayanırsa, demək ki, bu işi bacarmışıq. Növbəti etaplarda bizimlə qaz sahəsində əməkdaşlıq etmək istəyən ölkələrin sayı daha da çoxalacaq”.
Məhəmmədəli QƏRİBLİ
