Rusiya hökuməti "Şimal-Cənub" nəqliyyat dəhlizi ilə yük daşımalarının artırılması üçün Azərbaycan və İran dəmir yollarının birləşdirilməsi məsələsini mümkün qədər qısa zamanda həll etməyə çağırıb.
“Trend”in məlumatına görə, 9-cu Azərbaycan-Rusiya Regionlararası Forumu çərçivəsində keçirilən “Nəqliyyat və tranzit daşımaları sahəsində əməkdaşlığın möhkəmləndirilməsi” mövzusunda Dəyirmi masa zamanı Rusiya prezidentinin köməkçisi İqor Levitin belə deyib.
O bildirib: “Şimal-Cənub” dəhlizi hissə-hissə işləyə bilməz. Onu da qeyd edim ki, biz buraxılış məntəqələrinin, gömrük, sərhəd xidmətlərinin işini təkmilləşdirməliyik. Rəqəmsallaşma işləri üzrə də səyləri birləşdirmək lazımdır. “Şimal-Cənub” dəhlizi üzrə vahid rəqəmsal qaimə yaratmaq lazımdır”.
Onun sözlərinə görə, “Şimal-Cənub” layihəsinin üzv ölkələri dəniz nəqliyyatının daha fəal istifadə olunması barədə də fikirləşməlidir: “Əgər iritutumlu gəmilər hazırlansa, onlar digər beynəlxalq dəhlizlərdən avtomobil daşımalarının bir hissəsini Xəzərə keçirə bilər”.
Azərbaycanla Rusiya arasında dəmir yolu ilə daşımaların həcmi ötən illə müqayisədə 18 faiz artaraq 6 milyon tonu ötüb. Bunu isə Forum zamanı “Rusiya Dəmir Yolları” ASC-nin baş direktorunun birinci müavini Aleksandr Mişarin deyib. O bildirib ki, iki ölkə arasında avtomobil nəqliyyatı ilə daşımalar 31 faizdən çox artıb: "Aviadaşımaların həcmi də artacaq. Bizim müzakirə edilməli olan çox işimiz və yaxşı perspektivlər var".
"Şimal-Cənub" layihəsindən danışan A.Mişarin qeyd edib ki, bu layihəyə maraq artır:
"Hazırda Rusiya Azərbaycan vasitəsilə Türkiyəyə və digər ölkələrə kömür tədarükü imkanını nəzərdən keçirir".
9-cu Rusiya-Azərbaycan Regionlararası Forumu çərçivəsində keçirilən “Turizm sahəsində əməkdaşlığın inkişafı” mövzusunda Dəyirmi masa zamanı Rusiya Federal Turizm Agentliyinin rəhbəri Oleq Safonov deyib ki, rusiyalı turistlərin Azərbaycana səfərlərinin təşkili üçün turpaketlərin yaradılmasında maraqlıdırlar.
Rusiya-Azərbaycan İşgüzar Şurasının rəhbəri Aleksey Repik isə deyib ki, Rusiya və Azərbaycan arasında əlaqə - iqtisadiyyatın müxtəlif sahələrini əhatə edən strateji tərəfdaşlıq əlaqəsidir.
Azərbaycanın energetika nazirinin müavini Samir Vəliyev Bakıda IX Azərbaycan-Rusiya Regionlararası Forumu çərçivəsində keçirilən "Sənaye və energetika: ikitərəfli əməkdaşlıq perspektivləri" mövzusunda "dəyirmi masa"da çıxışı zamanı deyib ki, digər ölkələr də "Şimal-Cənub" enerji dəhlizi layihəsinə qoşula bilər. O qeyd edib: "Biz hesab edirik ki, Rusiya ilə əməkdaşlığın gücləndirilməsi üçün yeni elektrik ötürücü xətlərin tikintisi yaxşı olardı. İndi bu istiqamətdə danışıqlar aparılır. Bu layihə "Şimal-Cənub" yeni enerji dəhlizinin yaradılmasına xidmət edəcək".
S.Vəliyev xatırladıb ki, Azərbaycan, Rusiya və İranın nazir müavinləri bu məsələnin müzakirəsi üçün görüşüblər və müvafiq protokol imzalanıb.
Nazir müavini bunun çox perspektiv istiqamət olduğunu bildirib.
Rusiyanın iqtisadi inkişaf naziri Maksim Oreşkin Bakıda IX Azərbaycan-Rusiya Regionlararası Forumu çərçivəsində keçirilən Azərbaycan-Rusiya və Rusiya-Azərbaycan İşgüzar şuralarının genişləndirilmiş iclasında deyib: “Ticarətdə maneələrin aradan qaldırılması üzrə xüsusi mexanizm yaradılıb və bu çərçivədə biz Azərbaycan İqtisadiyyat Nazirliyi ilə işləyirik. Fəal ticarət-iqtisadi münasibətlər olan yerdə hər zaman suallar yaranır, ona görə də yeni format yaratmışıq. Bu format çərçivəsində hər ay toplanıb yaranan sualların nəzərdən keçirilməsi planlaşdırılır”.
M.Oreşkinin sözlərinə görə, əsas məqsəd Rusiya ilə Azərbaycan arasında məhsulların hərəkəti üçün “yaşıl dəhliz”lərin yaradılmasıdır.
Nazir əlavə edib ki, Azərbaycan və Rusiya təkcə mal tədarükünün genişləndirilməsi üçün deyil, həm də birgə müəssisələrin yaradılması üçün işləyəcək.
