Ramil Hüseynov: “Bu kimi amillər onu deməyə əsas verir ki...”
“Əgər Türkiyə vaxtilə zəruri gücə sahib olsaydı, Azərbaycan ərazilərinin işğalına imkan verməzdi”. Bunu Türkiyənin xarici işlər naziri Mövlud Çavuşoğlu deyib. M.Çavuşoğlu qeyd edib ki, Azərbaycan Türkiyə üçün mühüm strateji ölkədir. Türkiyəli ali diplomat eyni zamanda Ankaranın hər zaman rəsmi Bakını dəstəklədiyini və gələcəkdə də Azərbaycana dayaq olacaqlarını vurğulayıb.
Bəzi ekspertlərin fikrincə, indiki məqamda Türkiyə ordusu bir tərəfdən Suriya və İraqda terrorçuları küncə sıxışdırır, uğurlu hərbi əməliyyatlar keçirir və heç bir dövlət buna mane olmur. Bu arada, Azərbaycan Ordusu da ard-arda strateji yüksəklikləri ələ keçirir. Yəni həm Türkiyə, həm də Azərbaycan strateji hədəflərinə doğru irəriləyirlər.
Digər tərəfdən, Çavuşoğlunun sözləri Ermənistanın indiki hakimiyyətinə və beynəlxalq aləmə mesajdır. Məsələ ondadır ki, vaxtilə Ermənistan məqamdan istifadə edərək Azərbaycan torpaqlarını işğal etdi və Türkiyə səssiz qaldı. İndi isə bölgədə çəkisi artan Türkiyə ordusu hərəkətdədir, ölkə kənarında mühüm vəzifələri həyata keçirir. Ölkə kənarı isə geniş məfhumdur.
Ermənistanda Rusiya varlığı olmasaydı, Azərbaycan bu məsələni çoxdan həll etmişdi. Buna baxmayaraq, Azərbaycan Ordusunun addım-addım strateji yüksəklikəri geri qaytarması onu göstərir ki, proses torpaqlar tam azad olunana qədər davam edəcək. Heç bir qüvvə bu işdə bizə mane ola bilməz. Eyni zamanda, mövcud Türkiyə 25 il əvvəlki dövlət deyil. Bu məsələdə hər zaman Azərbaycanın yanındadır.
Maraqlıdır, Çavuşoğlunun məlum açıqlamasını ekspertlər necə dəyərləndirirlər?
Məsələyə münasibət bildirən VİP-in sədr müavini Ramil Hüseynovun sözlərinə görə, Çavuşoğlunun səsləndirdiyi fikirlərdə müəyyən qədər həqiqət payı var: “Məsələ ondadır ki, Azərbaycan torpaqları işğal olunanda Türkiyə indiki kimi güclü deyildi. Azərbaycan yeni müstəqil dövlət olduğuna görə o zaman iki ölkə arasında görüləsi işlər çox idi. O cümlədən, hərbi sahədə əlaqələrin genişləndirilməsi zaman tələb edirdi. Vaxt məhdud olduğundan, buna imkan yox idi. Ona görə də Ermənistan Rusiyanın birbaşa yardımı ilə xaincəsinə ərazilərimizi işğal etdi. Türkiyə həm də Rusiyadan çəkindiyi üçün erməni işğalını önləyə bilmədi. Digər tərəfdən, o dövrdəki siyasi-tarixi vəziyyəti də müəyyən mənada nəzərə almaq lazımdır. Həmin dövrlərdə Türkiyədə PKK terroru tüğyan edirdi. Türkiyə hərbi resurslarının əsas hissəsini sözügedən terrorçularla mübarizəyə yönəltmişdi. Qardaş ölkədə hakimiyyət indiki kimi monolit deyildi. Ölkəni zəif koalision hökumətlər idarə edirdilər və bu da bir sıra hallarda siyasi, iqtisadi böhranlara səbəb olurdu. Bu kimi amillər onu deməyə əsas verir ki, Türkiyə o vaxt böyük gücə malik deyildi. Həmin güc Türkiyədə olsaydı, o zaman bəlkə də torpaqlarımız işğal olunmazdı. İndi isə hesab edirəm situasiya fərqlidir. Türkiyə regionda kifayət qədər gücə sahibdir. Belə olan halda, yaranan hər hansı əlverişli vəziyyət Azərbaycana torpaqları geri qaytarmağa kömək edəcək və Türkiyə də bu işdə yanımızda olacaq”.
Vidadi ORDAHALLI
