Seyid Camal Əzimbəyli: “Məlum qərarı alqışlayıram”
Xəbər verildiyi kimi, Prezident İlham Əliyev Azərbaycanda dini qurumlara maliyyə yardımı göstərilməsi haqqında Sərəncam imzalayıb. Sərəncam ölkədə mövcud dini konfessiyaların dəstəklənməsi və fəaliyyətlərinin ahəngdarlığının təmin edilməsi məqsədilə imzalanıb.
Sərəncama əsasən, Azərbaycanda dini qurumlara maliyyə yardımı göstərilməsi üçün 2018-ci il dövlət büdcəsində nəzərdə tutulmuş Prezidentin ehtiyat fondundan Qafqaz Müsəlmanları İdarəsinə 1 milyon manat, Rus Pravoslav Kilsəsinin Bakı və Azərbaycan Yeparxiyası dini qurumuna 250 min manat, Bakı şəhəri Dağ yəhudiləri dini icmasına 250 min manat, Avropa yəhudilərinin Bakı dini icmasına 100 min manat, Azərbaycan Respublikasında Katolik kilsəsinin Apostol Prefekturası dini qurumuna 100 min manat və Azərbaycan Respublikasının Alban-Udi Xristian dini icmasına 100 min manat ayrılıb.
Sərəncamda deyilir ki, Azərbaycan xalqı öz təbiətindən gələn dərin insanpərvərlik və xoşməramlılıq duyğusu ilə uzun əsrlərdən bəri bütün digər xalqların dini-mənəvi dəyərlərinə daim ehtiramla yanaşıb. Ölkədə müxtəlif mədəniyyətlərə, dinlərə və dini cərəyanlara mənsub insanların heç bir maneəyə rast gəlmədən qarşılıqlı anlaşma şəraitində azad yaşamaları, eləcə də azsaylı xalqların öz etnik-mədəni dəyərlərini qorumaları və cəmiyyət həyatının istənilən sahəsində fəal iştirak etmələri üçün həmişə geniş imkanlar yaradılıb. Tolerantlıq səviyyəsinin və multikultural nailiyyətlərinin göstəricisi olub gələcək inkişafı üçün də zəmin təşkil edən hazırkı milli-mədəni rəngarəngliyi Azərbaycanın ümumbəşəri dəyərlər xəzinəsinə misilsiz töhfələrindəndir.
Ümumilikdə, Azərbaycan dövləti son illər ölkədəki bütün dini icmalara diqqət və qayğısını artırıb. Sözügedən məsələdə dini icmalara hansısa fərq qoyulmur. Bu baxımdan dini qurumlara edilən maliyyə yardımının Azərbaycan dövləti üçün strateji məzmun baxımından nə kimi əhəmiyyəti var?
Məsələyə münasibət bildirən şərqşünas Seyid Camal Əzimbəylinin sözlərinə görə, sözügedən addım strateji məzmun baxımından mühüm əhəmiyyət kəsb edir: “Əvvəla qeyd edim ki, Azərbaycan dövləti tərəfindən ölkədəki dini icmalara zaman-zaman belə yardımlar ayrılıb. Bir neçə dəfə dövlət bununla bağlı büdcədən vəsait ayrılması ilə bağlı qərar verib. Ardıcıl olaraq bu istiqamətdə ayrılan yardım Azərbaycan dövlətinin dünyəvi ölkə olaraq bu sahəyə göstərdiyi diqqətin nəticəsidir. Eyni zamanda, dövlət başçısının özünün şəxsən dini dəyərlərə və mədəni irsimizə təəssübkeşliyinin nümunəsidir. Düşünürəm ki, bu yardımlar Azərbaycanda dini dəyərlərin təbliğ olunmasında, maarifləndirmə işinin aparılmasında müstəsna rol oynayacaq. Bu həm də din və inanc adamlarına yaradılan şəraitin göstəricisidir. O üzdən, Prezident İlham Əliyevə ayrıca təşəkkür edirəm. Biz dünyəvi ölkə olsaq da, Azərbaycanda milli və mənəvi dəyərlərin həqiqi təəssübkeşi İlham Əliyevdir. Məlum qərar bunu bir daha sübut edir. Digər tərəfdən, məlum qərarın başqa bir əhəmiyyəti də var. Bu, Azərbaycanda ənənəvi dinlərdən kənar radikal düşüncə mərkəzlərinin ölkədə ayaq açmamasına da əlavə bir zəmin yaradır. Belə ki, hər bir Azərbaycan inanclısının, xüsusən də dini icmalarda təmsil olunanların iqtisadi baxımdan asılılığını aradan qaldırır. Ona görə də bu təqdir olunası və alqışlanası haldır. Hesab edirəm ki, bütün mənalarda, strateji məzmun baxımından bunun əhəmiyyəti böyükdür. Azərbaycanda din-dövlət münasibətlərinin tənzimlənməsində və yüksələn xətlə inkişaf etməsində öz töhfəsini verəcək. Çünki reallıq ondan ibarətdir ki, son illər bu yöndə bir sıra işlər görülüb. Ona görə də məlum qərarı alqışlayıram”.
Vidadi ORDAHALLI
