Daşdəmir Əliyev: “Belə yalanlarla öz hakimiyyətlərinin ömrünü bir qədər də uzatmaq istəyirlər”
Ermənistan Müdafiə Nazirliyinin Günnüt kəndinin Azərbaycan Ordusu tərəfindən işğaldan azad edilməsi ilə bağlı yaydığı bəyanatın yalan olmasını Ermənistanın daxilindəki qüvvələr də etiraf etmək məcburiyyətində qalıb.
Qeyd edək ki, bəyanatda Ermənistan Müdafiə Nazirliyinin mətbuat katibi Artsrun Ovanisyan iddia edib ki, guya Azərbaycan tərəfi iyunun 6-sı və 7-də İrəvana müraciət edərək, insanların Günnüt kəndində yerləşən qəbiristanlığı ziyarət etməsinə şərait yaradılmasını xahiş edib. Ovanisyan Azərbaycan tərəfinin belə bir xahişi ilk dəfə etdiyini bildirib. Bundan sonra Ovanisyan guya Ermənistanın hər zaman humanitar normalara sadiq olduğunu və buna görə də vətəndaşların qəbiristanlığa girməsinə izn verildiyini vurğulayıb:
“Günnüt neytral zonada yerləşir. Dinc sakinlərə buraya yaxınlaşmağa izn verilib. Ermənistan ordusu situasiyaya tam nəzarət edir”.
Ovanisyan, görünür, növbəti dəfə söylədiyi yalanlarla az öncə verdiyi bəyanatı tutuşdurmağı “yaddan çıxarıb”. Belə ki, Naxçıvan Əlahiddə Ümumqoşun birliklərinin fəallaşmasıyla bağlı informasiyaları ilk dəfə məhz elə Ermənistan mətbuatı yaymışdı. “Razm.info” saytı mayın ortalarından etibarən sözügedən yüksəkliklərin alınmasını xəbər vermişdi. Maraqlı məqam odur ki, Ovanisyan həm Günnütü Azərbaycan ərazisi adlandırır, mayın 30-da Azərbaycanın bu ərazidə yeni mövqelər yaratmaq haqqına sahib olduğunu deyir, sonuncu açıqlamasında isə azərbaycanlıların dədə-baba Günnüt qəbiristanlığını ziyarətini “ermənilərin razılığı ilə” izah etməyə çalışır. Erməni fəallar sosial şəbəkələrdə Müdafiə Nazirliyinin yalan danışdığını konkret faktlarla üzə çıxarıblar. “Facebook” sosial şəbəkə istifadəçisi Siranuş Tumanyan Arpa kəndi yaxınlığında Azərbaycanın yeni mövqelər tutması barədə görüntünü yayaraq, altında bu şərhi yazıb: "Areni kəndinin (ermənilər Arpa kəndini belə adlandırırlar - red.) yaxınlığında Azərbaycan tərəfinin yeni mövqeləri. Fotoları elə bu an Areni kəndinin bağlarından çəkmişəm. Kənd onlar tərəfindən tamamilə müşahidə edilir. Hazırda bizim mövqelər daha aşağı səviyyədə qalıb. Kənddə çaxnaşmadır. İnanmayanlara və inkar edənlərə, xahiş edirəm ki, Areni kəndinə gəlib əmin olsunlar” .
Qeyd edək ki, Ermənistan Müdafiə Nazirliyi iki il əvvəl olan aprel döyüşlərində də Azərbaycanın qazandığı uğurları ört-basdır etmək məqsədilə yalan danışmağa məcbur olmuşdu. Hətta keçmiş prezident Sarkisyan səviyyəsində işğaldan azad edilən ərazilərin həcmi rəqəmlərlə 3 dəfə az ifadə edilmişdi. Ermənistan Müdafiə Nazirliyinin uydurduğu yalanların arxasında nə dayanır?
Hərbi ekspert Daşdəmir Əliyev qəzetimizə açıqlamasında bildirdi ki, erməni tərəfi deməyə söz tapa bilməyəndə bu taktikaya əl atır: “Yəqin gördünüz ki, Günnüt və onun ətrafında baş verənlərlə bağlı erməni mətbuatı bir müddət susqunluq nümayiş etdirdi. Sanki həmin məlumatı ört-basdır etmək istəyirdilər. Amma bilirsiniz ki, informasiya-kommunikasiya texnologiyalarının bu dərəcədə inkişaf etdiyi vaxtda belə böyük bir hadisənin gizlədilməsi mümkün deyil. Dərələyəz mahalının Arpa adlı kəndindən çəkilən fotoları ermənilər sosial şəbəkələrdə paylaşandan sonra onlar rəsmi açıqlama verməyə məcbur oldular. Onların verdikləri rəsmi məlumatdan da hiss edilir ki, deməyə söz tapa bilməyiblər. Buna görə də belə bir çiy münasibət açıqlayıblar. Ermənilər nə vaxtdan belə humanist olublar ki, əhaliyə ata-baba qəbirlərini ziyarət etməyə imkan versinlər? İkinci bir tərəfdən isə, Azərbaycan tərəfi öz ərazisini ziyarət etməklə bağlı heç vaxt Ermənistandan analoji icazəni istəməz. Məsələnin kökündə ictimai fikri aldatmaq durur. İstəyirlər ki, bu məğlubiyyətdən xalqın xəbəri olmasın. Guya postlarda möhkəm dayanmaları haqda bir fikir formalaşdırmağa çalışırlar. Uzun illər səngərdə qulluq etmiş bir zabit kimi deyə bilərəm ki, onların vəziyyəti hələ illər əvvəl çox acınacaqlıydı. Azərbaycan Ordusunun maddi-texniki təminatı onlarla müqayisəolunmaz dərəcədə yüksəkdir. Bunu onlar gözəl bilirlər. Eyni zamanda, onlardakı hərbi-psixoloji mühit də acınacaqlıdır. Erməni generallar düşünürlər ki, belə xəbərlərin onlar tərəfindən duyulması ordudakı vəziyyəti daha da acınacaqlı edə bilər. Buna görə də belə yalanlarla öz hakimiyyətlərinin ömrünü bir qədər də uzatmaq istəyirlər. Qürur hissi ilə qeyd edə bilərəm ki, artıq ordumuz işğalda olan torpaqlarımızın hissə-hissə azad olunmasına nail olur. Yəqin ki, bu taktikanı davam etdirəcəyik. Sülh yolu səmərə vermirsə, ermənilər danışıqlardan boyun qaçırırlarsa, biz bu taktikanı davam etdirməliyik”.
Məhəmmədəli QƏRİBLİ
