Əli Orucov: “Bütün bunlar bir daha onların mənfur xislətini ortaya qoyur”
Ermənistanın baş naziri Nikol Paşinyan Serj Sarkisyanın cinayətlərinin araşdırılması barədə göstərişlər verib. Belə ki, Paşinyan hökumətin proqramını deputatlara təqdim edərkən 2008-ci ilin 1 mart hadisələrini də xatırladıb. Baş nazir bildirib ki, hüquq-mühafizə orqanlarına həmin hadisələrin araşdırılıb cəmiyyətə təqdim olunması barədə tapşırıq verib. Paşinyan deyib ki, 1 mart hadisələri ilə bağlı ortaya qoyulan araşdırmalar qənaətbəxş hesab edilə bilməz.
Bu arada Ermənistan hüquq-mühafizə orqanları Daxili Qoşunların keçmiş rəhbəri general-mayor Qriqor Qriqoryanı dindiriblər. Bu barədə məlumatı “Jamanak” qəzeti yayıb. Qəzetin iddiasına görə, Qriqoryan dindirilmə zamanı etirazçılara atəş əmrini eks-prezident Robert Köçəryanın verdiyini etiraf edib. Qriqoryan Köçəryan prezident olduğuna görə onun əmrinə tabe olmaq məcburiyyətində qaldığını deyib. General şəxsi təhlükəsizliyi üçün Köçəryanın danışığını gizli şəkildə qeydə aldığını da söyləyib. O, səs yazısını istintaqa sübut kimi verə biləcəyini də vurğulayıb.
Qeyd edək ki, 2008-ci il martın 1-də prezident seçkisindən sonra saxtakarlığa etiraz edən etirazçılara açılan atəş nəticəsində 10 nəfər ölüb, 200 nəfər yaralanıb. Belə görünür ki, Sarkisyanın kadrlarını vurduqdan sonra Paşinyan onun özünü də həbs etdirməyi hədəfləyib.
2008-ci il martın 1-də Ermənistanda seçki saxtakarlığına qarşı əhalinin dinc etiraz aksiyasının dağıdılması, insanların gülləbaran edilməsi və nəticədə 10 nəfərin qətlə yetirilməsi bilavasitə R.Köçəryanın öz xalqına qarşı cinayətidir. Köçəryan-Sarkisyan cütlüyü bu illər ərzində Ermənistanda qanunsuzluğun hökm sürməsi, insan haqlarının kobud pozulması, iqtisadiyyatın hakim Qarabağ klanı tərəfindən mənimsənilməsi, Ermənistanda sosial və iqtisadi durumun acınacaqlı vəziyyətə düşməsi, insanların bu ölkədən baş götürüb getməsinə görə birbaşa məsuliyyət daşıyır. O cümlədən, katolikos ll Qaregin də 2008-ci il martın 1-də dinc etiraz aksiyasının gülləbaran edilməsində birbaşa məsuliyyət daşıyır. Məsələ ondadır ki, o, Ermənistanın o vaxtkı hakimiyyətinə belə cinayətkar addım atmaq üçün öz razılığını və xeyir-duasını verib. Ona görə də katolikos erməni xalqının bəlalarında heç də Sarkisyan və Köçəryandan az cavabdeh deyil. İşğalçılıq ideologiyasının, qondarma soyqırımı iddialarının əsas ilhamvericilərindən biri də məhz oldur.
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun sözlərinə görə, bütün bunlar Ermənistandakı keçmiş qaniçən rejimin iç üzünü açır: “Paşinyan sona qədər bu məsələnin üzərinə getsə, hesab edirəm ki, çox cinayətlərin üstü açılacaq. Reallıq ondan ibarətdir ki, 2008-ci ildə Sarkisyan seçkilərin nəticələrini saxtalaşdırmaqla, hakimiyyəti qamarladı. Ancaq o, prezident olandan və bütün resursları ələ keçirdikdən sonra Köçəryanla olan əvvəlki isti münasibətləri pozuldu. Bütün hallarda, Ermənistanda acınacaqlı sosial-iqtisadi vəziyyətin yaranmasının başlıca günahkarı Köçəryan və Sarkisyan cütlüyünün yaratdıqları rejim olub. Hansı ki, onların 20 illik hakimiyyəti dövründə səfalət daha da dərinləşib, Ermənistan əhalisi əsasən Rusiyaya köç edib. Bu illər ərzində onlar Dağlıq Qarabağ münaqişəsinin həllində hansısa kompromisə imkan verməyiblər. İstənilən halda, 10 il əvvəl Ermənistanda Köçəryan-Sarkisyan cütlüyü öz xalqına qarşı cinayət işlədib. Hazırkı hakimiyyətin bütün bunları nə dərəcədə obyektiv araşdıracağını demək çətindir. Katolikos ll Qaregin də onların cinayətlərinə ortaq olub. Bütün bunlar bir daha onların mənfur xislətini ortaya qoyur”.
Vidadi ORDAHALLI
