Elşən Mustafayev: “Bununla Paşinyan, faktiki olaraq, sülh prosesinə ümidlərin tam itdiyini bəyan etmiş olur”
Ermənistan parlamenti hökumətin yeni proqramını təsdiq edib. Ermənistan mətbuatının verdiyi məlumata görə, iyunun 7-də səsverməyə qoyulan bu məsələ 62 səs lehinə, 39 səs əleyhinə olmaqla qəbul edilib.
Parlamentin sədri Ara Babloyan bu münasibətlə Nikol Paşinyanı təbrik edib və bildirib ki, onlar proqramda öz əksini tapan müddəaların reallıq olacağına ümid edirlər. Qeyd olunur ki, hökumətin elan etdiyi yeni proqram 29 səhifə, 7 bölümdən ibarətdir. Bura növbədənkənar parlament seçkilərinə hazırlıq, daxili və xarici təhlükəsizliyin təmin olunması, korrupsiya ilə mübarizə, azad və xoşbəxt vətəndaş, iqtisadiyyatın inkişafı və Ermənistan-diaspor münasibətlərinin tənzimlənməsi bölümləri daxildir. Çox maraqlıdır ki, təqdim olunan proqramda həm də deyilir ki, hökumətin xarici siyasətdə əsas məqsədi Ermənistanın müstəqilliyinin müdafiə və Qarabağın təhlükəsizliyinin təmin olunmasıdır.
Ermənistan hökumətinin Dağlıq Qarabağla bağlı elan etdiyi yeni kursu necə dəyərləndirmək olar?
Azərbaycan Milli İstiqlal Partiyasının funksioneri Elşən Mustafayev qəzetimizə açıqlamasında bildirdi ki, sözügedən proqram ölkə daxilində mövcud olan iqtisadi, siyasi problemlərin həll olunması istiqmətində fəaliyyət üçün nəzərdə tutulub, amma biz orada ciddi siyasi məqamlara da rast gəlirik: “Buna nə qədər nail olunacağını söyləyə bilmərəm, amma orada səslənin perspektiv planları həyata keçirməyə cəhdlər edəcəklər. Bu proqramda Dağlıq Qarabağla olan hissəyə diqqət edək. Orada deyilir ki, Qarabağ münaqişəsi ATƏT-in Minsk Qrupu formatında sülh yolu ilə həll olunmalı, hüquqi bərabərlik və “xalqların öz müqəddəratını təyin etmə” prinsipi əsas götürülməlidir. Bununla yanaşı, Ermənistan Dağlıq Qarabağın danışıqlarda tərəf kimi iştirakı məsələsini də proqrama daxil edib. Bildirilir ki, Qarabağ münaqişənin əsas tərəfi kimi danışıqlar prosesində həlledici səsə malik olmalıdır. Beləliklə, Ermənistan münaqişə zonasında müharibəyə səbəb olacaq məsələni rəsmiləşdirmiş olur. Yeni baş nazir Nikol Paşinyanın Qarabağla bağlı bu populist addımı onun özündən əvvəlkilərdən də radikal mövqedə olmasını sübut etmiş olur. Hesab edirəm ki, İrəvanın sülh prosesinin əleyhinə işləyən bu gedişi Azərbaycana öz torpaqlarını hərbi yolla azad etməkdən başqa yol qoymur. Çünki bununla Paşinyan, faktiki olaraq, sülh prosesinə ümidlərin tam itdiyini bəyan etmiş olur. Çox təhlükəli bir tendensiyadır. Hesab edirəm ki, Azərbaycan bu məsələyə mütləq sərt reaksiyasını verməlidir”.
Məhəmmədəli QƏRİBLİ
