Məhəmməd Əsədullazadə: “1998-ci ildən hərbi cinayətkarların hakimiyyətdə olması bu ölkədə sosial-iqtisadi və siyasi sahələrdə ciddi problemlərə yol açıb”
“Mən dünyanın ən ali kürsüsündən - BMT kürsüsündən Ermənistanın əvvəlki kriminal rejimini ifşa etmişəm”. Bu fikirləri Prezident İlham Əliyev müqəddəs Ramazan ayı münasibətilə təşkil olunan iftar mərasimində deyib.
Ölkə başçısı çıxışında illər öncə Ermənistandakı mənfur rejimi ifşa etdiyini qeyd edib və bunu bir sıra arqumentlərlə əsaslandırıb: “Mənim illər ərzində dediyim sözləri indi erməni xalqı deyir. Mən dünyanın ən ali kürsüsündən - BMT kürsüsündən Ermənistanın əvvəlki kriminal rejimini ifşa etmişəm. Onları öz adları ilə çağırmışam. Onları Xocalı soyqırımında ittiham etmişəm, hərbi cinayətlərdə ittiham etmişəm. Ermənistanın əvvəlki hakimiyyətini qaniçən, kriminal, quldur rejim adlandırmışam. Bütün bunlar həqiqətdir. Mən həqiqəti demişəm, indi bu həqiqəti erməni xalqı deyir. Nəhayət, indi erməni xalqı anlayıb ki, onlara 20 il ərzində kriminal xunta rejimi rəhbərlik edib. O kriminal xunta rejimi ki, ancaq öz maraqlarını güdür, o rejim ki, onun yarıtmaz və cinayətkar fəaliyyəti nəticəsində Ermənistan bu acınacaqlı vəziyyətə düşüb. Mən dəfələrlə demişdim ki, Ermənistanda iqtisadi böhran, demoqrafik böhran yaşanır, ölkə boşalır, hər il on minlərlə insan o ölkəni həmişəlik tərk edir, Ermənistanda inkişaf üçün heç bir perspektiv yoxdur”.
Dövlət başçısının fikrincə, Azərbaycan öz istəyinə nail olacaq: “Demişəm ki, Azərbaycan Ermənistanı dalana çevirib, iqtisadi, siyasi, nəqliyyat dalanına çevirib. Nəyə görə? Ona görə ki, Ermənistan torpaqlarımızı işğal edib. İndi bütün bunları erməni xalqı deyib və deyir. Bu bir daha onu göstərir ki, bu münaqişədə Azərbaycan öz istədiyinə nail olacaq, həqiqəti, ədaləti bərpa edəcək”.
Göründüyü kimi, illər öncə ölkə başçısı böyük uzaqgörənliklə Ermənistanda hakimiyyətdə olan əvvəlki rejimi ifşa edərək onun iç üzünü açıb. O zaman Ermənistan cəmiyyəti bütün bunların fərqində olsaydı və bunu anlasaydı, bəlkə də əvvəlki cinayətkar rejim bir belə hakimiyyətdə qalmazdı.
Ümumilikdə, ölkə başçısının bu dəyərləndirməsini ekspertlər necə şərh edirlər? Məsələyə münasibət bildirən politoloq Məhəmməd Əsədullazadənin sözlərinə görə, Prezidentin bununla bağlı səsləndirdiyi fikirlər reallığı əks etdirir: “Ermənistanda işğalçı ölkə olaraq daim cinayətkarlar hakimiyyətdə olub. 1998-ci ildən hərbi cinayətkarların hakimiyyətdə olması bu ölkədə sosial-iqtisadi və siyasi sahələrdə ciddi problemlərə yol açıb. Xüsusilə Serj Sarkisyanın hakimiyyəti dövründə bu ölkədə terrorun dəstəkçiləri daxildə avtoritar sistem yaratmaqla erməni xalqını quldurcasına istismar ediblər. Dövlət başçısı İlham Əliyevin qeyd etdikləri bu gün həqiqətən öz təsdiqini tapdı. Erməni xalqı 20 il ərzində cinayətkar xuntadan canını qurtardı. Dağlıq Qarabağ konfliktinin dalana dirənməsi və münaqişə ətrafında müsbət nəticələrin olmaması məhz Sarkisyan rejiminin siyasətinin nəticəsidir. 20 il ərzində Ermənistanda demoqrafik problem kəskinləşib. Əhalinin Ermənistanı tərk etməsi, 4 milyon əhalidən 2 milyonun ölkədə qalması kriminal rejimin apardığı siyasətin bariz nümunəsidir. Ölkə iqtisadiyyatı və infrastrukturu bu gün Rusiyanın inhisarındadır. Məhz Sarkisyanın hakimiyyətində ölkəni Kreml forpost adlandırdı. İndiki məqamda baş nazir Nikol Paşinyanın ölkəni bu ağır durumdan xilas etməsi çox çətin olacaq. İqtisadi maraqlar toqquşacaq və ölkədə oliqarxiyanın savaşı başlaya bilər. Hesab edirəm ki, Paşinyan Ermənistanda daxildən Sarkisyan klanı tərəfindən təzyiqlərlə üzləşəcək”.
Vidadi ORDAHALLI
