Seyid Camal Əzimbəyli: “Azərbaycan dövlətinin dinlə bağlı yürütdüyü siyasətdə Prezidentimizin islam dininə olan inamı və ehtiramı da böyük rol oynayır”
Azərbaycan Prezidenti İlham Əliyev müqəddəs Ramazan ayı münasibətilə təşkil olunan iftar mərasimində etdiyi çıxışı zamanı maraqlı fikirlər səsləndirib.
Prezident bildirib ki, artıq bu formatda görüşün keçirilməsi bir ənənəyə çevrilib: “Hər il olduğu kimi, biz bu il də mübarək Ramazan ayında iftar məclisində görüşürük. Bu gözəl ənənə yaşayır və yaşamalıdır. Bu, Azərbaycanda dövlət-din əlaqələrinin nə qədər yüksək səviyyədə olmasından xəbər verir. Dövlət-din münasibətlərinin formalaşmasının təşəbbüskarı ulu öndər Heydər Əliyev olmuşdur. Bu gün Azərbaycanın uğurlu inkişafı məhz bu konsepsiyanın icrası nəticəsində mümkün olmuşdur. O cümlədən dövlət-din münasibətlərinin qurulması, yaradılması işində Heydər Əliyevin böyük xidmətləri olmuşdur. O, hakimiyyətə gələnə qədər Azərbaycanda bu münasibətlər tənzimlənmirdi və böyük boşluq yaranmışdı. Biz keçən ay ulu öndərin anadan olmasının 95-ci ildönümünü qeyd edərkən, əziz xatirəsinə hörmətimizi ifadə edərkən onun xalq qarşısında gördüyü böyük xidmətlər haqqında danışmışıq, onun fəaliyyətini yada salmışıq. Bu gün də şeyx həzrətlərinin təşkil etdiyi iftar məclisində ulu öndərin dövlət-din münasibətlərinin tənzimlənməsində gördüyü işlər və oynadığı rol haqqında danışırıq və bu təbiidir. Şeyx həzrətlərinin bu məsələlərin uğurla həlli işində fəaliyyətini mən çox yüksək qiymətləndirirəm”.
İlham Əliyev əlavə edib ki, Azərbaycanda bütün dinlərin nümayəndələri bir ailə kimi yaşayırlar: “Bugünkü iftar məclisimizdə səslənən fikirlər, ənənəvi dinlərin rəhbərlərinin çıxışları bir daha bunu göstərir. Azərbaycanda həm dövlət-din əlaqələri, həm dinlərarası əlaqələr nümunəvi xarakter daşıyır. Bilirəm ki, bu məsələlərlə bağlı Azərbaycan modeli bu gün artıq dünyada bir çox yerlərdə öyrənilir. Bu bizim uğurlu inkişafımız üçün lazımdır. Bu, dövlət siyasətimizin təzahürüdür. Eyni zamanda, bu, cəmiyyətimizin vəziyyətini, cəmiyyətdə mövcud olan ab-havanı əks etdirir”.
Göründüyü kimi, ölkə başçısı çıxışında Azərbaycanda təşəkkül tapmış dövlət-din modelinin üstünlükləri və inkişaf templərindən danışıb. Ölkə başçısı hətta bu amili uğurlu inkişafımızın təzahürü kimi də dəyərləndirib. Azərbaycan dövlət-din münasibətlərinin tənzimlənməsi və inkişaf etdirilməsi sahəsində qazandığı uğura nəyin hesabına nail ola bilib?
Şərqşünas Seyid Camal Əzimbəyli qəzetimizə açıqlamasında bildirdi ki, ölkə başçısının ənənəvi olaraq belə tədbirdə iştirakı çox təqdirəlayiq haldır: “Prezidentin çıxışına diqqətlə qulaq asdım. Çox məzmunlu və əhatəli nitq söylədi. Xüsusilə də Ramazanın son 10 günlüyündə onun adından belə iftar məclisinin verilməsi ölkəmizin yürütdüyü siyasətlə həmahənglik təşkil edir. Azərbaycan dünyəvi ölkə olsa da, islam dininə bağlılıq və onun təəssübünü çəkmək baxımından hətta teokratik idarəetməyə malik olan ölkələrdən geri qalmır. Prezident bizim dövlət-din münasibətləri kontekstində əldə etdiyimiz nailiyyətlərdən geniş bəhs edib. Əlavə olaraq onu qeyd edim ki, ölkəmiz bu nailiyyətə düzgün surətdə yürüdülən balanslı siyasət hesabına nail olub. Azərbaycan dövləti konkret olaraq hansısa təriqət maraqlarını deyil, islam dinini bütöv qəbul edir. Öz fəaliyyətində hansısa məzhəbə simpatiya bəslədiyini göstərmir. Məhz buna görə də vətəndaşlarımız da dini ayrıseçkilik salmağa meylli görünmürlər. Çünki vətəndaşın tərbiyəsi ilə ilk növbədə dövlət məşğul olur. Biz Yaxın Şərq regionunda dövlət başçılarının hansısa təriqətə açıq dəstək verməsinin fəsadını görmüşük. Həmin ölkələrdə dini zəmində vətəndaş qarşıdurmaları yaranır, ölkələr qan çəlləyinə çevrilir. Hesab edirəm ki, Azərbaycan dövlətinin dinlə bağlı yürütdüyü siyasətdə Prezidentimizin islam dininə olan inamı və ehtiramı da böyük rol oynayır. Müxtəlif dinlərin və təriqətlərin nümayəndələrinin yaşadığı bir ölkədə belə modelin qurulması doğrudan da bütün dünya üçün örnək sayıla bilər. Biz mənəviyyat və din adamları olaraq duamızı Prezidentimizin üstündən əskik etməməliyik ki, o, gələcəkdə də gözəl şəkildə təşəkkül tapmış dövlət-din modelini inkişaf etdirə bilsin”.
Məhəmmədəli QƏRİBLİ
