Yeganə Hacıyeva: “Çirkin kampaniyalara platforma olması bu qurumu nüfuzdan salır və onun gələcəyi üçün çoxlu açıq sual yaradır”
Avropa Şurası Parlament Assambleyasının büro iclasında Azərbaycanda “siyasi məhbus” məsələsi ilə bağlı məruzəçi təyin edilməsi haqda qərar qəbul edilib. AŞPA-nın mətbuat xidmətinin yaydığı məlumata görə, məruzəçi iyunun 25-dən 29-dək Fransanın Strasburq şəhərində keçiriləcək sessiyada təyin ediləcək.
Qeyd edək ki, Azərbaycanda “siyasi məhbuslar” üzrə hesabatın hazırlanması və yeni məruzəçinin təyin edilməsi təklifini 2 ay əvvəl deputat Pieter Omtzigt başda olmaqla AŞPA-nın 24 deputatı irəli sürüb. Onu da qeyd edək ki, bu, AŞPA deputatlarının analoji təkliflə çıxış etdikləri ilk hal deyil. Belə ki, hələ 2013-cü ildə AŞPA-nın almaniyalı deputatı Kristofer Ştrasser Azərbaycanda siyasi məhbuslarla bağlı hesabat hazırlamışdı. Amma o rədd edildi. Azərbaycan rəsmiləri ölkədə “siyasi məhbus” olması ilə bağlı fikirləri qəbul etmirlər. Onlar deyirlər ki, “siyasi məhbus” olduğu iddia edilən şəxslər törətdikləri konkret əməllərə görə məsuliyyətə cəlb olunublar. Maraqlıdır ki, son vaxtlar AŞPA-da güclü anti-Azərbaycan əhval-ruhiyyəsi müşahidə olunur. Təkcə onu xatırlatmaq kifayətdir ki, təxminən bir ay əvvəl Azərbaycanın AŞPA-dakı nümayəndə heyətinin başçısı barəsində sanksiyalar qəbul edilib. Digər diqqətçəkən məqam isə belə bir təşəbbüsün kimin tərəfindən irəli sürülməsidir. Təşəbbüsün müəllifi olan Pieter Omtzigt adlı deputat bütün fəaliyyəti ərzində qatı anti-Azərbaycançı mövqeyi ilə tanınıb. Bu cür faktorların fonunda, Azərbaycanla bağlı belə təşəbbüsün irəlü sürülməsi nəyin göstəricisi sayıla bilər?
Beynəlxalq məsələlər üzrə ekspert Yeganə Hacıyeva qəzetimizə açıqlamasında bildirdi ki, qrup bu təşəbbüslə aprel ayında çıxış edib və keçən iki ay ərzində bu layihənin lobbiçiliyini aparıb: “Nətiçə kimi cəmi 24 deputatın imzası ilə bu sənəd keçən həftə müzakirə üçün büröya təqdim edildi. Təşəbbüs qrupu AŞPA-nın iki ay öncə müstəqilliyi və obyektivliyi çoxlu sual doğuran Müstəqil Araşdırmalar Qrupunun aprel ayında yaydığı korrupsiya ilə bağlı sənədə istinad edib. Əvvəlcə qeyd edim ki, istər qəbul olunan korrupsiya layihəsi, istərsə də indiki “siyasi məhbus” məruzəçisi ilə bağlı layihənin təşəbbüsü erməni lobbisi və iqtisadi dairələrin maraqlarına xidmət edir. AŞPA-da bu qrupun eyni mövzu üzrə daha öncəki təşəbbüsləri Azərbaycan nümayəndə heyəti üzvləri və AŞPA-nın digər ədalətli üzvləri və ölkəmizin dostlarının fəaliyyəti nəticəsində rədd edilib. Yuxarıda haqqında danışdığımız anti-Azərbaycan qrup, növbəti addım kimi, daha öncəki fəaliyyətinin uğursuz nəticəsindən "dərs" götürərək, istintaq qrupunun formalaşmasına və iki ay öncə adi səsvermədə obyektivliyi şübhə doğuran korrupsiya sənədinin qəbul edilməsinə nail oldu. Bunun da nəticəsində Azərbaycanın Avropa Şurası Parlament Assambleyasındakı nümayəndə heyətinin rəhbəri Səməd Seyidova və Azərbaycanın dostları sayılan bir neçə şəxsə qısamüddətli sanksiyalar tətbiq edildi. Biz sizinlə bu sanksiyaları təhlil edərkən, qərarın Avropa Şurası Parlament Assambleyasındakı anti-Azərbaycan qrupunun növbəti addımları üçün münbit şərait yaradacağı haqqında fikirlər irəli sürmüşdük. Belə ki, sanksiyalar Azərbaycanın Avropa Şurası Parlament Assambleyasındakı nümayəndə heyətinin rəhbəri Səməd Seyidova iki il ərzində AŞPA-da məruzəçi olmağı, seçkilərin monitorinqlərində iştirak etməyi, komitə və alt komitələrin sədri seçilməyi, üçüncü tərəflərin tədbirlərində assambleyanı təmsil etməyi və ən əsası, AŞ Nazirlər Komitəsinə sorğular göndərməyi qadağan edir. Məhz bu hadisədən sonra anti-Azərbaycan fəaliyyəti daha da genişlənib və bu proses irəlidəki ilyarım ərzində daha da dərinləşəcək.
Bir neçə kəlmə də Azərbaycanda “siyasi məhbuslar” üzrə hesabatın hazırlanması və yeni məruzəçinin təyin edilməsi təklifinin müəllifi Pieter Omtzigt haqqında danışmaq istəyirəm. O, Avropa Şurası Parlament Assambleyasında lobbi qruplarının muzdlu deputatı reputasiyasını qazanıb, kəskin anti-Azərbaycan və anti-Türkiyə mövqeyi ilə seçilir. Pieter Omtzigt hələ keçən il öz ölkəsində Donetsk üzərində vurulan “Boeing” təyyarəsində həlak olmuş həmvətənlərinin ailə üzvlərinin istintaq qrupu ilə görüşünə yalançı şahidin gətirilməsi və bu şahidin ifadəsini şəxsən onun mobil telefonundan mesajla ötürməsi qalmaqalı ilə yadda qalıb. O zaman nüfuzlu Holland mediası Pieter Omtzigt haqqında öz ölkəsində kənar qüvvələrin nüfuz agenti başlıqlı yazılar verdi. Son olaraq qeyd etmək istəyirəm ki, AŞPA-nın bu qədər qalmaqallı, şübhəli fəaliyyətli şəxslərin rəhbərliyi ilə, azsaylı iştirakçı olan sessiyalarda adi səsvermə ilə qəbul olunan hesabatlar əsasında ölkəmizə qarşı aparılan çirkin kampaniyalara platforma olması bu qurumu nüfuzdan salır və qurumun gələcəyi üçün çoxlu açıq sual yaradır”.
Məhəmmədəli QƏRİBLİ
