Fikrət Sadıqov: “Paşinyan hakimiyyəti nə qədər tez bu reallığı dərk etsə, bu bir o qədər onların xeyrinə olacaq”
“Ümid edirəm ki, Ermənistanın yeni rəhbərliyi əvvəlki hakimiyyətin səhvlərini təkrarlamayacaq və münaqişənin tezliklə həll olunması üçün ciddi işlər görəcək”. Məlum olduğu kimi, bunu Azərbaycan Prezidenti İlham Əliyev Qafqaz Müsəlmanları İdarəsinin sədri şeyxülislam Allahşükür Paşazadənin müqəddəs Ramazan ayı münasibətilə öz iqamətgahında verdiyi iftar süfrəsində çıxışı zamanı bildirib.
Ölkə başçısı sözügedən məsələ ilə bağlı çıxışında bir sıra məqamlara toxunub: “Ümid edirəm ki, Ermənistanın yeni rəhbərliyi əvvəlki hakimiyyətin səhvlərini təkrarlamayacaq və münaqişənin tezliklə həll olunması üçün ciddi işlər görəcək və imitasiya naminə yox, real danışıqlar prosesinə start veriləcək. Beləliklə, məsələ öz həllini tapa bilər və Qafqaza sülh gələ bilər. Biz bunu istəyirik, biz münaqişənin həllini tələb edirik, bizim buna haqqımız çatır. Ümid edirik ki, bu məsələ danışıqlar yolu ilə tezliklə öz həllini tapa bilər”.
Həqiqətən də Dağlıq Qarabağ münaqişəsinin tənzimlənməsində Ermənistandakı yeni hakimiyyətin əvvəlki hakimiyyətin bu istiqamətdə səmərəsiz fəaliyyətindən ciddi nəticə çıxarmasına ehtiyac var. Çünki Ermənistanda 20 il hakimiyyətdə olan əvvəlki klan Dağlıq Qarabağ münaqişəsinin tənzimlənməsi ilə bağlı olduqca destruktiv və barışmaz siyasət həyata keçirdi. Nəticədə münaqişə öz həllini tapmadı və ən başlıcası isə Ermənistan regionda təcrid vəziyyətinə düşərək bütün enerji və nəqliyyat layihələrindən kənarda qaldı. Bu isə işğalçı ölkədə sosial-iqtisadi vəziyyəti daha da pisləşdirdi və nəticədə əvvəlki hakimiyyət biabırçı formada iqtidardan getdi. O üzdən, yeni hakimiyyətin bütün bunlardan ciddi nəticə çıxarmasına ehtiyac var. O mənada ki, əvvəlkilərin səhvlərini təkrar etməsinlər. Çünki münaqişə nə qədər tez həll olunsa, bu bir o qədər Ermənistanın inkişafına müsbət təsir göstərə bilər.
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Ermənistanda yeni hakimiyyət əvvəlki hakimiyyətin səhvlərini təkrarlasa, onların aqibəti pis olacaq: “O cümlədən, bu, Ermənistan üçün də yaxşı perspektiv vəd etmir. Ona görə də Prezident İlham Əliyevin bununla bağlı çağırışı tamamilə düzgündür. Ermənistanda mövcud hakimiyyət keçmiş hakimiyyətlə mübarizə aparıbsa, deməli, öz siyasətində müəyyən düzəlişlər də etməlidir. Başa düşməlidirlər ki, biz əbədi olaraq bu danışıqlar prosesində ola bilmərik. Lakin bunu etmək üçün Paşinyan və onun ətrafı tərəfindən sağlam düşüncəli yanaşma tələb olunur. Çox təəssüflər olsun ki, hələlik bunun elementləri özünü göstərmir. Paşinyan növbəti dəfə bəyan edib ki, separatçı qurum danışıqlarda tərəf olaraq iştirak etməlidir. Bu isə, bütün mənalarda, səfeh və sarsaq çağırışlardır. Çünki Dağlıq Qarabağdakı erməni separatçıları danışıqlarda tərəf olmaq istəyirlərsə, o zaman Azərbaycan icması ilə danışıqlar aparmalıdırlar. Onlar Dağlıq Qarabağ və ətraf rayonlarda etnik təmizləmə siyasəti aparıblar. Belə olan halda, onların münaqişənin tənzimlənməsi ilə bağlı danışıqlarda tərəf olmasından söhbət belə gedə bilməz. Təəssüflər olsun ki, Paşinyanın bəyanatlarında çox absurd fikirlər səslənir. Bunlar Azərbaycanın mövqeyini sadəcə olaraq inkar edirlər və özlərini reallığa uyğun aparmırlar. Belə siyasət davam edərsə, o zaman Ermənistan hakimiyyəti məsuliyyət daşıyacaq və bu da onlar üçün yaxşı nəticələnməyəcək. Paşinyan hakimiyyəti nə qədər tez bu reallığı dərk etsə, bu bir o qədər onların xeyrinə olacaq. Yoxsa, bu nə onların hakimiyyəti, nə də Ermənistan üçün yaxşı perspektiv vəd etmir”.
Vidadi ORDAHALLI
