Ramil Hüseynov: “Ümid edirik ki, bütün bunlar Azərbaycanın tezliklə öz ərazi bütövlüyünü bərpa etməsinə gətirib çıxaracaq”
“Azərbaycan ardıcıl siyasət aparmaqla istədiyinə nail olacaq, ölkənin ərazi bütövlüyünü bərpa ediləcək. Buna mənim şübhəm yoxdur”. Bunu Prezident İlham Əliyev müqəddəs Ramazan ayı münasibətilə təşkil olunan iftar mərasimində deyib.
Ölkə başçısı bununla bağlı kifayət qədər faktorların olduğunu bildirib və şərti olaraq 6 faktoru sadalayıb: “Həm tarixi həqiqətlər, hüquqi baza, BMT Təhlükəsizlik Şurasının qətnamələri, digər təşkilatların qərar və qətnamələri, bizim iqtisadi gücümüz, hərbi gücümüz və bölgədə mövcud olan real vəziyyət bunu deməyə əsas verir”.
Prezident onu da bildirib ki, Ermənistan-Azərbaycan Dağlıq Qarabağ münaqişəsi yalnız beynəlxalq norma və prinsiplər əsasında həll olunmalıdır: “Dağlıq Qarabağ bizim tarixi torpağımızdır, biz bunu, bu həqiqətləri bütün dünyaya çatdırırıq. Bir çox elmi əsərlər, kitablar nəşr edilib, bir çox tədbirlər keçirilib. Biz tarixi həqiqətləri çatdırmalıyıq və çatdırırıq. Dağlıq Qarabağın tarixən Azərbaycan xalqına məxsus olması artıq heç kimdə şübhə doğurmur. Hüquqi nöqteyi-nəzərdən Dağlıq Qarabağ Azərbaycanın ayrılmaz hissəsidir, bütün dünya Azərbaycanın ərazi bütövlüyünü tanıyır. Heç bir ölkə Dağlıq Qarabağda mövcud olan kriminal, qondarma rejimi tanımır və əminəm ki, tanımayacaq. Bu amillər, həm tarixi faktlar, həm beynəlxalq hüququn normaları, beynəlxalq təşkilatların qərar və qətnamələri nəinki bizim mövqeyimizi gücləndirir, eyni zamanda, münaqişənin həlli üçün əsas yaradır, hüquqi baza yaradır və biz yorulmaz fəaliyyət nəticəsində buna nail olmuşuq”.
Reallıq ondan ibarətdir ki, bütün parametrlərə görə Azərbaycan Ermənistanı üstələyir. Hüquqi, tarixi, iqtisadi, hərbi nöqteyi-nəzərdən Azərbaycanın imkanları qarşı tərəfi üstələyir. Bu baxımdan gec-tez Azərbaycan öz istəyinə nail olacaq.
Maraqlıdır, bəs siyasi ekspertlər bunu necə dəyərləndirirlər?
Sözügedən məsələni dəyərləndirən VİP-in sədr müavini Ramil Hüseynovun sözlərinə görə, Azərbaycanın Ermənistandan üstün mövqedə olması bir reallıqdır: “Nəzərə almaq lazımdır ki, postsovet məkanında bir sıra münaqişə ocaqları mövcuddur. Gürcüstanda Abxaziya ilə Cənubi Osetiya, Moldovada Dnestryanı bölgə. Sözügedən münaqişə ocaqlarının yaradıcısı Rusiyadır. Dağlıq Qarabağı çıxmaqla, postsovet məkanındakı digər münaqişə ocaqlarında Rusiya birbaşa tərəf kimi iştirak edir. Dağlıq Qarabağ məsələsində isə birbaşa tərəf deyil, Ermənistana gizli dəstək verir. Məhz bu səbəbdən separatçı qurum hələ də duruş gətirə bilir. Ancaq indiyə qədər heç bir ölkə, o cümlədən Ermənistana hər cür yardım edən Rusiya qondarma “DQR”in “müstəqilliyini” tanımayıb. Lakin bundan fərqli olaraq, Rusiya başda olmaqla, dünyanın bəzi dövlətləri separatçı Abxaziya və Cənubi Osetiyanı tanıyıblar. Bu günlərdə Suriya da analoji addım atdı. Bu baxımdan yaxşı haldır ki, Azərbaycan Dağlıq Qarabağ məsələsində bənzər təhlükə ilə üzləşməyib. Hətta Rusiyanın bir sıra politoloqları da açıq şəkildə bildiriblər ki, Rusiyanın Azərbaycanın ərazi bütövlüyünü tanıması önəmli amildir. BMT və digər beynəlxalq qurumların Azərbaycanın ərazi bütövlüyünü tanıması, Dağlıq Qarabağla bağlı bir sıra qətnamələrin qəbul olunması hüquqi baxımdan bizim xeyrimizədir. Azərbaycanın istər hərbi, istərsə də iqtisadi imkanlarının Ermənistanı üstələməsi bu gün danılmaz bir reallıqdır. Bununla yanaşı, Azərbaycanın regionda həyata keçirilən enerji və nəqliyyat layihələrində arbitr rolunu oynaması rəsmi Bakıya əlavə üstünlüklər yaradır. Sadəcə, hələlik Rusiya amilinə görə Azərbaycan torpaqların azad edilməsi ilə bağlı hərb yoluna əl atmağa tələsmir. Ancaq dünyada gedən proseslər get-gedə Rusiyaya qarşı yönəlir. Krımın ilhaqına görə Rusiyaya tətbiq olunan sanksiyalar, bu ölkənin Suriyada ilişib qalması, ümumilikdə, Kreml üçün yaxşı perspektiv vəd etmir. Bir məqamı da qeyd edim ki, Ermənistanda məlum son hadisələr və hakimiyyətin dəyişməsi Rusiyanın maraqlarına uyğun deyildi. O üzdən, Rusiya deməzdim ki, Paşinyana Sarkisyan qədər etibar edir. Ermənistanda hələ də sabitliyin bərqərar olmaması bundan xəbər verir. Ümid edirik ki, bütün bunlar Azərbaycanın tezliklə öz ərazi bütövlüyünü bərpa etməsinə gətirib çıxaracaq”.
Vidadi ORDAHALLI
