Vüqar Qədirov: “Erməni lobbisinin təsirindən uzaqlaşmaqla onlar öz ölkələrinin maraqlarına daha da yaxınlaşmış olurlar”
ABŞ Senatının Missisipi ştatını təmsil edən respublikaçı üzvü, ABŞ Helsinki Komissiyasının sədri Rocer Uiker Azərbaycan Xalq Cümhuriyyətinin 100-cü ildönümü ilə bağlı bəyanatla çıxış edib.
Bəyanatda ABŞ-ın Azərbaycanın müstəqilliyini tanıyan ilk dövlətlərdən biri olduğu, 1920-ci ildə bolşeviklərin ölkəyə müdaxiləsilə ölkənin Sovet İttifaqının tərkibinə qatıldığı, lakin Sovet İttifaqının çökməsi ilə Azərbaycanın yenidən 1991-ci ildə müstəqilliyini bərpa etdiyi və ABŞ-ın yenidən Azərbaycanın müstəqilliyini tanıyaraq 1992-ci ildə diplomatik əlaqələr qurduğu vurğulanıb.
Həmçinin, Azərbaycanın təhlükəsizlik sahəsində ABŞ-ın aparıcı tərəfdaşı olduğu, 2002-ci ildən Azərbaycan qoşunlarının Əfqanıstanda xidmət göstərdiyi, ABŞ-a və NATO tərəfdaşlarına yardım göstərdiyi qeyd olunub. Azərbaycanın şimal paylayıcı şəbəkəsi vasitəsilə Əfqanıstana hərbi yüklərin daşınmasında mühüm tranzit rolu oynadığı, habelə Əfqanıstana gedən ABŞ hərbi heyətinin Azərbaycan hava məkanından istifadəsinə icazə verdiyi vurğulanıb.
Daha sonra bəyanatda ABŞ-ın güclü müttəfiqi olan İsraillə 25 ildən artıqdır diplomatik əlaqələri qoruyan və yəhudi icması ilə olduqca yaxşı münasibətlərə malik müsəlman ölkəsi olan dünyəvi Azərbaycanın nümunəvi bir dövlət olduğu vurğulanıb. Bundan əlavə, Azərbaycanın “Cənub Qaz Dəhlizi” vasitəsilə ABŞ-ın Avropadakı müttəfiqlərinin enerji təhlükəsizliyində mühüm rol oynayacağı və həmin qitənin Rusiya qazından asılılığını azaldacağı qeyd olunub. Sonda isə senator Azərbaycan Respublikasına və xalqına öz səmimi təbriklərini çatdırıb.
Bu təbriki təqdirəlayiq hesab etmək olar. Ancaq diqqətçəkən məqam budur ki, sözügedən təsisatın Azərbaycana qarşı münasibəti heç də birmənalı olmayıb. Biz indiyə qədər ABŞ Helsinki Komissiyasının ölkəmizlə bağlı qərəzli mövqeyinin də şahidi olmuşuq. Hətta açıqca bəyan etmişik ki, həmin qurumun bəzi üzvləri erməni diaspor təşkilatının təsiri altına düşərək Azərbaycana qarşı qarayaxma kampaniyası ilə məşğul olurlar. Ancaq bu təbrikin ruhundan aydın olur ki, sözügedən qurumda ölkəmizə qarşı fəqrli münasibət var. Bu da ABŞ Helsinki Komissiyasının daxilində olan ziddiyyətlərdən xəbər verir. Biz son təbrikdə ABŞ-ın dövlət maraqlarının ifadə olunmasını görürük. Bizim müsəlman ölkəsi kimi İsrail və yəhudilərlə normal münasibətimizin olması, Əfqanıstandakı NATO kontingenti tərkibindəki iştirakımız və xüsusilə də Avropanın enerji təchizatında oynadığımız rol daim ABŞ hakimiyyəti tərəfindən də təqdir olunur. Sanki Komissiyanın tərkibində ölkəmizlə bağlı ikili yanaşma mövcuddur. Biriləri ABŞ-ın dövlət maraqları kontekstindən çıxış edir, digərləri isə erməni lobbisinin təsiri altına düşərək mövqe ortaya qoyurlar. Bu ikili mövqeni necə izah etmək olar?
Politoloq Vüqar Qədirovun sözlərinə görə, ABŞ Helsinki Komissiyasının ölkəmizə qarşı qərəzli münasibəti olub: “Bu faktdır. Çox uzağa getməyək, ötən ay ABŞ-da Azərbaycanla bağlı təşkil olunan dinləmələri məhz bu komissiya keçirirdi. Həmin tədbirə Azərbaycan müxalifətinin təmsilçisi kimi siyasətlə əlaqəsi olmayan təsadüfi adamlar dəvət edilmişdi və onlar da Azərbaycan əleyhinə ağıllarına nə gəldi danışdılar. Bundan əvvələ bir qədər ekskurs etsək görərik ki, məhz bu komissiyanın sədri olmuş konqresmen Kris Smit hələ 2016-cı ilin dekabrında Azərbaycana qarşı sərt sanksiyaları nəzərdə tutan qanun layihəsi irəli sürmüşdü. Həmin layihənin müddəaları istər iqtisadi, istər siyasi, istərsə də hərbi sferada ABŞ-Azərbaycan münasibətlərini ciddi şəkildə korlamağa yönəlib. Bu həmin Smitdir ki, uzun müddətdir qondarma “erməni soyqırımı”nın ABŞ hökuməti tərəfindən tanınması üçün xüsusi canfəşanlıq göstərir. Bütün ölkələrə, xalqlara və konfessiyalara eyni münasibət sərgiləməli olan Smit özünün Ermənistana və erməni xalqına xüsusi sevgisinin olduğunu dəfələrlə etiraf edib. Təbii ki, bütün bunların fonunda, komissiyadan belə obyektiv dəyərləndirmə eşitmək bizə xoşdur. Daha doğrusu, bu təbrikdə Azərbaycanın roluna obyektiv, qərəzdən uzaq qiymət verilib. Hesab edirəm ki, bu mövqe ABŞ-ın milli, dövləti maraqları ilə uzlaşır. Biz əmin olmaq istərdik ki, bundan sonra Helsinki Komissiyası məhz bu istiqamət üzrə hərəkət edəcək. Erməni lobbisinin təsirindən uzaqlaşmaqla, onlar öz ölkələrinin maraqlarına daha yaxınlaşmış olurlar”.
Məhəmmədəli QƏRİBLİ
