Rauf Zeyni: “Biz öz işimizi əvvəlki tempdə davam etdirməliyik ki, həmin narazıları “Sülh Platforması”na cəlb edə bilək”
2016-cı ildə Bakıda təsis olunan “Ermənistanla Azərbaycan arasında sülh naminə Platforma” müəyyən fasilədən sonra fəaliyyətini yenidən aktivləşdirib. Son günlər ermənilərin Azərbaycana səfərlərində də intensivlik müşahidə olunur. “Ermənistan-Azərbaycan Sülh Platforması” həm Ermənistan, həm də Azərbaycan qeyri-hökumət təşkilatları tərəfindən irəli sürülən nadir platformadır.
Dağlıq Qarabağ münaqişəsinin yaranmasından indiyədək olan müddətdə, ilk dəfə olaraq, Azərbaycanın və Ermənistanın vətəndaş cəmiyyətlərinin təmsilçiləri bir araya gəliblər və belə bir platformanın yaradılmasına qərar veriblər. Bu “Sülh Platforması” Ermənistan-Azərbaycan, Dağlıq Qarabağ münaqişəsinin sülh yolu ilə, beynəlxalq hüququn prinsipləri çərçivəsində həllini məqsəd kimi qarşıya qoyub.
“Sülh Platforması” ideyasını dəstəkləyənlər bildirirlər ki, burada əvvəlki xalq və yaxud vətəndaş cəmiyyəti diplomatiyasından fərqli olaraq, çox açıq, dəqiq prinsiplər müəyyənləşdirilib və problemin həlli ilə bağlı konkret mövqe ortaya qoyulub. Bu mövqe ondan ibarətdir ki, ilk növbədə BMT Təhlükəsizlik Şurasının qəbul etdiyi dörd qətnamə qeyd-şərtsiz, tam yerinə yetirilməlidir. Başqa sözlə, Azərbaycanın işğal olunmuş Dağlıq Qarabağ bölgəsi və ətraf yeddi rayonu qeyd-şərtsiz işğaldan azad olunmalı, azərbaycanlı qaçqın və məcburi köçkünlər o yerlərə qayıtmalıdırlar. Sonra Dağlıq Qarabağın hüquqi statusu müəyyənləşdirilməlidir. Bu hüquqi status Azərbaycanın ərazi bütövlüyü və beynəlxalq təşkilatlar tərəfindən tanınmış sərhədləri çərçivəsində müəyyən edilməlidir. Başqa sözlə, Dağlıq Qarabağa Azərbaycanın tərkibində muxtar respublika statusu verilməlidir.
Üçüncü mühüm prinsip isə Dağlıq Qarabağda yaşayan ermənilərin və azərbaycanlıların təhlükəsizliyinə tam şəkildə təminat verilməsidir. Bu prinsiplər bu gün üçün yeganə prinsiplərdir, beynəlxalq hüquqa söykənən normalardır. Çox sevindirici haldır ki, artıq bəzi ermənilər də azərbaycanlılarla birlikdə uzun müddət davam edən bu münaqişəyə, nəhayət, son qoymaq istəyirlər. Ermənistanda və Dağlıq Qarabağda cərəyan edən ciddi hadisələrin fonunda yaradılmış “Sülh Platforması” hansı addımları atmalıdır?
Sülh Platformasının fəallarından olan, Milli Qeyri-Hökumət Təşkilatları Forumunun prezidenti Rauf Zeyni qəzetimizə bildirdi ki, “Ermənistan-Azərbaycan Vətəndaş Sülh Platforması”nın indiyə qədər olan fəaliyyətini məqbul saymaq olar: “Siz gözəl bilirsiniz ki, bu təşəbbüslə bağlı 2016-cı ildə toplantı keçirildi. Dövlətimizin, vətəndaş cəmiyyətinin dəstəyi və səyilə bu platforma ərsəyə gəldi. Platformanın öz proqramı var və o istiqamətdə fəaliyyət davam edir. Hədəf budur ki, daha çox insan bura cəlb olunsun. Düşünmürəm ki, platforma hadisələrin arxasınca sürünməlidir. Amma hər bir hadisə diqqətlə izlənilməlidir. Platforma daha böyük uğurlara imza atmağı hədəf seçməlidir. Bu işlə yaxından tanış olan şəxs kimi deyə bilərəm ki, platforma daim aktiv olub. Bunun məqsədi sülhə nail olmaqdır. Hesab edirəm ki, bu prosesə daha çox və tanınmış sülhpərvər insanların cəmləşməsi münaqişənin həllinə müsbət təsir edə bilər. Hazırda Dağlıq Qarabağda və Ermənistanda baş verən gərgin hadisələrin Sülh Platformasının işinə o qədər də ciddi təsiri yoxdur. Vəziyyət mürəkkəbdir. Orada daxili çəkişmələr gedir və həmin hadisələrin fonunda platforma münasibətləri aydınlaşdıran qüvvələri o qədər də çox maraqlandırmır. Həmin hadisələrdə daha çox hakimiyyətə gəlmək və ya onu necə qorumaq aktualdır. Buna baxmayaraq, narazı qüvvələrin platformaya meyli daha da artacaq. Biz öz işimizi əvvəlki tempdə davam etdirməliyik ki, həmin narazıları “Sülh Platforması”na cəlb edə bilək”.
Məhəmmədəli QƏRİBLİ
