Daşdəmir Əliyev: “Müxtəlif tədbirlərdə bilik və təcrübələrini bölüşən Azərbaycan zabitləri digər ölkələrdən olan həmkarları üçün layiqli nümunədirlər”
NATO Azərbaycanla bütün sahələrdə əməkdaşlığın davam etdirilməsinin tərəfdarıdır. Alyansdan bildiriblər ki, NATO və Azərbaycanı uzun illərin əməkdaşlığı bağlayır:
"Biz NATO-nun rəhbərlik etdiyi "Qətiyyətli dəstək" missiyası çərçivəsində Azərbaycanın Əfqanıstanın təhlükəsizlik qüvvələrinə təlim, konsultasiya və yardım göstərilməsində müntəzəm töhfəsinə görə minnətdarıq. Azərbaycan qoşunları əla xidmət edirlər. Biz, həmçinin, Azərbaycanın NATO-nun Əfqanıstan Milli Ordusu üçün Məqsədyönlü Fondu vasitəsilə əfqan təhlükəsizlik qüvvələrinin maliyyə təminatına verdiyi töhfəyə görə də minnətdarıq". Alyansdan bildiriblər ki, Azərbaycan öz qoşunlarının NATO qüvvələri ilə, o cümlədən Fərdi Tərəfdaşlıq üzrə Əməliyyat Planı və Planlaşdırma və Analiz Prosesi çərçivəsində qarşılıqlı fəaliyyət səviyyəsinin yüksəldilməsi üzrə işi davam etdirir: "Bu gün bizim əməkdaşlığımız enerji təhlükəsizliyindən tutmuş, keçmiş sovet ordusunun partlamamış mina və döyüş sursatlarının təhlükəsiz məhv edilməsinədək bir çox sahələri əhatə edir. Biz Azərbaycanı öz təhlükəsizlik institutlarında islahatlar prosesini fəallaşdırmağa çağırırıq".
Təşkilatdan deyiblər ki, NATO Azərbaycanın BMT Təhlükəsizlik Şurasının 1325 saylı qətnaməsi üzrə 2018-ci ilin sonuna Milli Fəaliyyət Planının hazırlanmasının yekunlaşdırılması ilə bağlı işini alqışlayır və "Qadınlar, sülh və təhlükəsizlik" adlı ümumi gündəliyin həyata keçirilməsini davam etdirməyə çağırır: "Biz Azərbaycanla ölkə hakimiyyətinin seçdiyi bütün sahələrdə əməkdaşlığın davam etdirilməsinin tərəfdarıyıq".
Göründyü kimi, NATO onlarla əməkdaşlıq edən Azərbaycan hərbi kontingentinin hazırlıq səviyyəsindən razılığını ifadə edir. NATO-nun bu məmnunluğunu şərtləndirən cəhətlər nədən ibarətdir?
Hərbi ekspert Daşdəmir Əliyev qəzetimizə açıqlamasında bildirdi ki, NATO-nun bu razılığı Azərbaycan kontingentinin uzun illərdən bəri göstərdiyi nümunəvi xidmətdən qaynaqlanır: “Fikir verirsinizə, Azərbaycan kontingentinin Əfqanıstandakı xidməti xüsusi olaraq vurğulanır. Bu, Azərbaycan Ordusuna verilən yüksək dəyərin göstəricisidir. Bilirsiniz ki, bizim sülhməramlı kontingentin sayı bir necə dəfə dəyişib. Bu yeniləşmədə yalnız artım tempi müşahidə olunub. Belə bir tendensiyanın yaranmasında bir sıra faktorların böyük rolu vardı. Gəlin əvvəlcə bizim kontingentin Əfqanıstandakı missiyasından danışaq. Mən bunu ona görə açıq deyə bilirəm ki, mövzu barədə NATO-nun baş katibi cənab İlham Əliyevə təşəkkür edəndə bəhs edilib. Bizim kontingent bölük şəklində Türkiyə hərbi birləşməsinin tərkibindədir. Onlar Əfqanıstanda ən mühüm strateji obyekt sayılan Kabil aeroportunun mühafizəsilə məşğul olurlar. Onlara tapşırılan işin özü bizim sülhməramlılara güvən və etimadın hansı səviyyədə olmasından xəbər vermiş olur. İstər NATO-nun baş katibi, istərsə də bizim bölüyün tabe olduğu türk general dəfələrlə hərbçilərimizdən razılıq ifadə ediblər. Şükürlər olsun ki, onların xidmət keçdiyi dönəmdə heç bir hərbi itki verməmişik. Bu cür nümunəvi xidmətlə Azərbaycan əsgərləri sülhə, əminamanlığa, terrora qarşı olduqlarını bir daha təsdiqləmiş olurlar. Qeyd edək ki, Azərbaycan Əfqanıstanda beynəlxalq təhlükəsizliyin təmin olunması istiqamətində səylərdə 2002-ci ildən iştirak edir. Azərbaycanın bu ölkədəki hərbi kontingentinin çoxsaylı olması beynəlxalq təşəbbüsdə iştirak üçün böyük əhəmiyyət daşıyır. Sülhməramlı səylər, həmçinin, rəsmi Bakıya həmin missiyaya hərbçilər göndərən ölkələrlə, o cümlədən NATO ölkələri ilə əlaqələrin qurulmasında kömək edir. Qeyd edim ki, Azərbaycan hərbçilərinin NATO ilə əməkdaşlığı yalnız Əfqanıstanla bitmir. Bu yaxınlarda müdafiə nazirimiz də qeyd etdi ki, Azərbaycan Ordusunun hərbi qulluqçuları Alyansın müxtəlif proqramlarında, xüsusilə də Əfqanıstanda həyata keçirilən “Qətiyyətli dəstək” missiyasında daim iştirak edirlər. Bir sözlə, Azərbaycan zabitlərinin Alyansın qərargahlarında xidmət keçməsi, müxtəlif proqramlarında iştirakı yüksək qiymətlə layiqdir. Hesab edirəm ki, NATO-nun proqramları çərçivəsində keçirilən müxtəlif tədbirlərdə bilik və təcrübələrini bölüşən Azərbaycan zabitləri digər ölkələrdən olan həmkarları üçün layiqli nümunədirlər”.
Məhəmmədəli QƏRİBLİ
