ABŞ “Cənub Qaz Dəhlizi” layihəsinin reallaşdırılmasını əvvəldən qətiyyətlə dəstəkləyir və bu dəhlizin Avropaya enerji ehtiyatlarının tədarükü marşrutlarının diversifikasiyalaşdırılmasında vacib rolunu başa düşür. “Trend”in məlumatına görə, bunu Bakıda “Cənub Qaz Dəhlizi” layihəsinin birinci mərhələsinin işə salınması mərasimi zamanı ABŞ Dövlət katibinin köməkçisinin enerji məsələləri üzrə müşaviri Sandra Oudkirk deyib.
O bildirib: “Mən Azərbaycan Prezidenti İlham Əliyevi və “Cənub Qaz Dəhlizi” layihəsi çərçivəsində səy göstərən bütün ölkə və şirkətləri təbrik edirəm”.
ABŞ Dövlət katibinin köməkçisinin enerji məsələləri üzrə müşaviri qeyd edib ki, “Cənub Qaz Dəhlizi” Xəzər regionu ölkələrinin daha geniş iqtisadi inteqrasiyası üçün yeni imkanlar təqdim edir: “ABŞ Prezidenti Donald Tramp dəfələrlə bu layihəni dəstəkləməsi barədə bəyan edib. Bir müddət əvvəl Azərbaycan Xalq Cümhuriyyətinin 100 illiyi şərəfinə Azərbaycan Prezidentinə ünvanladığı məktubda o, həmçinin vurğulayıb ki, “Cənub Qaz Dəhlizi” Avropanın enerji təhlükəsizliyini təmin etməyə imkan verəcək inanılmaz nailiyyətdir”.
Onun sözlərinə görə, “Cənub Qaz Dəhlizi” region ölkələri üçün əməkdaşlığın genişlənməsi, eləcə də Şərqi Aralıq dənizi, Mərkəzi Asiya və Qafqazdan Avropaya tədarük olunan qaz həcmlərini artırmaq imkanı təqdim edir: “ABŞ “Cənub Qaz Dəhlizi”nin uzunmüddətli uğurunun mənbəyi olan bütün iştirakçılarla əməkdaşlığı davam etdirməyi planlaşdırır”.
Baronessa Nikolson: “Biz birlikdə gələcəyə yönəlmiş uğurlu tərəfdaşlıq yaratmışıq…”
Neft-qaz sahəsi Böyük Britaniya və Azərbaycan arasında kommersiya münasibətlərində əsas hissə olaraq qalır. Böyük Britaniya baş nazirinin Azərbaycan, Türkmənistan və Qazaxıstanla ticarət üzrə xüsusi nümayəndəsi, baronessa Emma Nikolson Azərbaycan qazının Avropaya tədarükünü nəzərdə tutan "Cənub Qaz Dəhlizi"nin birinci mərhələsinin açılış mərasimində belə deyib.
E.Nikolson qeyd edib ki, neft-qaz sahəsi Böyük Britaniya ilə Azərbaycan arasında kommersiya münasibətlərinin də əsasını təşkil edir: “Biz birinci Xəzər neft və qaz sərgisinin keçirilməsindən sonra birlikdə çox iş görmüşük və bu il enerji əməkdaşlığımızın daha bir səhifəsini başa çatdırırıq. BP-nin “Şahdəniz 2” platformasından birinci qaz “Cənub Qaz Dəhlizi” ilə Türkiyəyə gedəcək. Bu, Avropada enerji təhlükəsizliyinin nail olunmasına yönəlmiş vacib addımdır. Biz birlikdə gələcəyə yönəlmiş uğurlu tərəfdaşlıq yaratmışıq”.
O həmçinin bildirib ki, Londonda BP və SOCAR arasında son sazişin imzalanması zamanı iştirak edib: “Daha dərin əməkdaşlıq təkcə bu iki ölkəyə yox, həm də digər tərəfdaşlara iqtisadi səmərə gətirəcək. Bu, əyani olaraq Böyük Britaniyanın artmaqda olan ikitərəfli kommersiya tərəfdaşlığına verdiyi önəmi əks etdirir”.
Ərdoğanın məktubu: “… qürur mənbəyidir”
Türkiyəyə və Avropanın digər ölkələrinə Azərbaycan qazını çatdıracaq Transanadolu təbii qaz boru kəmərinə ilk qazın verilməsi münasibətilə keçirilən bu mərasimin xeyirli olmasını diləyirəm. Türkiyənin Azərbaycandakı səfiri Erkan Ozoral tərəfindən Azərbaycan qazının Avropaya tədarükünü nəzərdə tutan "Cənub Qaz Dəhlizi"nin birinci mərhələsinin açılış mərasimində səsləndirilən Türkiyə Prezidenti Rəcəb Tayyib Ərdoğanın müraciətində belə deyilir.
Türkiyə Prezidentinin müraciətində deyilir: "İstər Azərbaycan ilə ikitərəfli, istərsə də regional əməkdaşlığımız baxımından örnək bir layihə olan TANAP-ın tamamlanması hamımız üçün qürur mənbəyidir.
Bundan əvvəl uğurla həyata keçirdiyimiz Bakı-Tbilisi-Ceyhan, Bakı-Tbilisi-Ərzurum boru kəmərləri və nəqliyyat sahəsində Bakı-Tbilisi-Qars dəmir yolundan sonra TANAP da bölgənin taleyini dəyişdirəcək əhəmiyyətə malik əməkdaşlığımızın bir başqa bəhrəsidir.
TANAP-ın reallaşmasında ABŞ-ın və Avropa İttifaqının dəstəyi də əhəmiyyətli olmuşdur.
Birlikdə atdığımız addımlar bu tarixi layihənin sürətlə və problemsiz başa çatdırılmasında önəmli rol oynamışdır.
Bundan sonrakı müddətdə Avropaya yeni bir mənbədən qaz nəqlini mümkün edəcək Cənub Qaz Dəhlizinin digər layihələrinin də vaxtında başa çatdırılması mühüm əhəmiyyət daşıyır".
Müraciətdə həmçinin qeyd olunur ki, bu gün TANAP boru kəmərinə ilk qazın verilməsindən sonra iyunun 12-də Əskişəhərdə böyük bir mərasimlə kəmərin açılışı olacaq.Bu tarixi anın şahidi olmaq üçün sizləri də Əskişəhərdə qəbul etməkdən böyük məmnunluq duyacağıq.
R.T.Ərdoğan müraciətdə həmçinin, bu il 25-ci dəfə keçirilən “Xəzər Neft və Qaz” sərgi və konfransının təşkilində əməyi olanları təbrik edib, bu mühüm tədbirin uğurlarının artmasını və davamlı olmasını diləyib: "Bu xoş fürsətdən istifadə edərək TANAP-ın başda Türkiyə və Azərbaycan olmaqla, bölgəmiz üçün xeyirli olmasını bir daha arzu edir, bütün iştirakçıları səmimi qəlbdən salamlayıram".
OPEC-in baş katibi “Şahdəniz”i “bütün dünyanın qürur duymalı olduğu layihə” adlandırdı
“Şahdəniz” qaz-kondensat yatağının işlənməsi layihəsi bütün dünyanın qürur duymalı olduğu layihədir. Bunu Bakıda “Cənub Qaz Dəhlizi” layihəsinin birinci mərhələsinin işə salınması mərasimində OPEC-in baş katibi Məhəmməd Sanusi Barkindo deyib.
Layihənin birinci mərhələsi “Şahdəniz” yatağından Cənubi Qafqaz, daha sonra Transanadolu (TANAP) boru kəmərləri ilə Türkiyənin Əskişəhər şəhərinə qaz nəqlini nəzərdə tutur.
M.Barkindo bildirib: “Mənim üçün burada, Xəzər dənizinin Səngəçal terminalında olmaq və təkcə 25-ci yubiley Beynəlxalq neft və qaz sərgisinin açılışının yox, həm də “Cənub Qaz Dəhlizi” layihəsinin işə salınmasının şahidi olmaq böyük şərəfdir”.
Azərbaycan Prezidenti İlham Əliyevə müraciət edən M.Barkindo qeyd edib ki, “Şahdəniz” layihəsi dövlət başçısının uzaqgörən rəhbərliyinin bariz nümunəsidir: “Bu layihə çoxmilyardlı kapital yatırımlarını nəzərdə tutur və dünyada ən iri energetika layihələrindən biridir. Bu layihə Azərbaycan iqtisadiyyatına mühüm gəlirlər gətirəcək”. O əlavə edib ki, Azərbaycan neft hasilatının məhdudlaşdırılması haqqında OPEK+ sazişinin şərtlərini davamlı olaraq ən yüksək səviyyədə icra edən ölkələrdən biridir.
M.Barkindo qeyd edib ki, Azərbaycan OPEK-ə üzv dövlətlər və kartelə daxil olmayan ölkələr arasında neft hasilatının məhdudlaşdırılması haqqında sazişin əldə olunmasında aparıcı rol oynayıb: "Biz sizin bir neçə il əvvəl OPEK üzvləri və kartelə daxil olmayan ölkələrin səylərinin birləşdirilməsinin zəruri olduğu barədə görüşlərinizə görə gələcəkdə də minnətdar olacağıq. Mən sizə OPEK ilə əməkdaşlığınıza və hasilatın könüllü şəkildə dəyişdirilməsinə dəstəyinizə və sadiqliyinə görə də minnətdarlığımı bildirmək istərdim".
Baş katib vurğulayıb ki, OPEK Azərbaycanla əməkdaşlığın genişləndirilməsi üçün istənilən imkanlara baxmağa hazırdır.
Qaz İxracatçısı Ölkələrinin Forumu "Cənub Qaz Dəhlizi" ilə Azərbaycanın beynəlxalq qaz qovşağı kimi rolunun təsdiqləndiyini bildirdi – şübhəsiz, İlham Əliyevin hesabına…
"Cənub Qaz Dəhlizi" layihəsi Azərbaycanın beynəlxalq qaz qovşağı kimi rolunu təsdiqləyir. Qaz İxracatçısı Ölkələrinin Forumunun baş katibi Yuri Sentyurin "Cənub Qaz Dəhlizi"nin rəsmi açılış mərasimində çıxışı zamanı belə deyib.
O qeyd edib ki, Azərbaycan qaz qovşağı mövqeyini Prezident İlham Əliyevin yürütdüyü müdrik və məqsədəuyğun siyasət sayəsində əldə edib: "Təbii qaz bizim enerjiyə tələbatımızın təmin edilməsində əsas rol oynayacaq. "Cənub Qaz Dəhlizi", dünyada iri qaz layihələrindən biri kimi, Xəzər dənizindən Avropaya qaz tədarükünün təmin edilməsinə yönəlib. Bu layihə dövlət və özəl sektor arasında geniş əməkdaşlığı nəzərdə tutur. Bu gün 7 dövlət və 11 müstəqil şirkət bu iri layihəni başa çatdırmaq üçün birgə çalışır".
Y.Sentyurin əlavə edib ki, "Cənub Qaz Dəhlizi" tarixdə ilk dəfə olaraq Xəzər qazını Avropa bazarlarına çatdıraraq bütün regionun enerji xəritəsini dəyişməyə hesablanıb.
Baş katib bildirib ki, Avropa İttifaqı enerjiyə olan gələcək tələbatını təmin etmək üçün idxal imkanlarının gələcəkdə şaxələndirilməsinə ümid edir: "Azərbaycanın maliyyə və siyasi baxımdan sadiqliyi layihənin reallaşdırılmasında mühüm rol oynayır".
