Rauf Zeyni: “Belə məsələdə siyasi ayrıseçkilik etmək sərəncamdan faydalanan vətəndaşlara da hörmətsizlik sayılır” Əliməmməd Nuriyev: “Hər kəs bu sərəncamla bağlı fikirlər söyləyərkən çox diqqətli olmalıdır”
Mayın 24-də Prezident İlham Əliyev Azərbaycan Xalq Cumhuriyyətinin 100 illiyi, 28 May - Respublika Günü ilə bağlı genişmiqyaslı əfv sərəncamı imzalayıb. 634 məhbusun adının olduğu bu sərəncam müstəqillik illərində indiyə qədər verilən ən böyük əfv sayılır.
Siyahıda problemli məhbus siyahısında olan 12 nəfərin, habelə 38 nəfər xarici ölkə vətəndaşının adı da yer aldı. Problemli məhbus olduğu iddia edilən və azadlığa buraxılan şəxslər bunlardır:
Abdullayev Valeh (2012, “Eurovision” işi), Babayev Nadir (Tale Bağırzadə və Nardaran işi ),
Qasımov Əliağa (Nardaran), Cabbarov Hilal (Nardaran), Qurbanov Ələkbər (Nardaran), Şahbazov Fail (Nardaran), Şahbazov Natiq (Nardaran), Quliyev Məhəmməd (Nardaran),
Kərimov David (Hicab məhbusu), Rzayev Elşad (Hicab məhbusu), Fərəcov Elnur (Neftçala, AXCP üzvü), Şəkərov Saday (yazıçı).
Bəzi radikal dairələr əfvin əhatə dairəsini kənara qoyaraq, siyahıda onların istədikləri adamların adlarının olmamasını əsas gətirərək, sərəncamın mahiyyətini qaralayaraq, onun mükəmməl olmadığını yazırlar. Belə iddiaları nə dərəcədə əsaslı saymaq olar?
Ədliyyə Nazirliyindəki İctimai Komitənin üzvü, Milli Qeyri-Hökumət Təşkilatları Forumunun prezidenti Rauf Zeyni qəzetimizə açıqlamasında bildirdi ki, ölkə başçısının humanist addımına belə münasibət bildirmək yolverilməzdir: “Bilirsiniz ki, belə bir fərmanı imzalamaq ölkə başçısının öhdəliyinə aid deyil. Yəni bu məsələ Prezidentin müstəsna səlahiyyətinə aid olan məsələdir. Prezident neçənci dəfədir belə humanist addım atır və bundan minlərlə ailə sevinir. Mən Ədliyə Nazirliyindəki İctimai Komitənin üzvü kimi bu prosesin hansı səviyyədə şəffaf aparıldığının şahidi oluram. İnsanlar əfvə şox böyük ümid bağlayırlar. İndi kiminsə adının siyahıda olmamsı o demək deyil ki, bu nəcib təşəbbüsə kölgə salınmalıdır. Cənab Prezident bu siyahıya hansısa siyasi qüvvənin istəyinin nəzərə alınması üçün imza atmır. Bu sərəncam Azərbaycan vətəndaşlarına şamil olunur. Cənab Prezident bununla bir daha sübut edir ki, onun üçün Azərbaycan vətəndaşı anlamı hər şeydən üstündür. Bu, ölkə başçısının cəzaların humanistləşməsi istiqamətində apardığı siyasətin bir elementidir. Bilirsiniz ki, bu istiqamətdə kompleks tədbirlər planı həyata keçirilir. Həbslə bağlı olmayan, alternativ cəza növlərinin seçilməsi, probapsiya siyasətinin həyata keçirilməsi və s. işləri də bura aid edə bilərik. Bu baxımdan da hesab edirəm ki, imzalanan sərəncamların hamısı Azərbaycan vətəndaşlarının rifahı naminə edilir. Belə məsələdə siyasi ayrıseçkilik etmək sərəncamdan faydalanan vətəndaşlara da hörmətsizlik sayılır. Bundan əlavə, həmin dairələrin problemli məhbus saydığı adamların da adlarına bu sərəncamda rast gəlinirsə, belə mübahisələri etmək yersizdir. Əminəm ki, azadlığa qovuşanlar bir daha cinayət etməyəcəklər. Onları təbrik edirəm”.
Əfv Komissiyasının üzvü Əliməmməd Nuriyev isə hesab edir ki, Azərbaycanda müstəqillik əldə olunandan bu günə qədər belə genişmiqyaslı əfv olmayıb: “Bu sərəncam deyərdim ki, amnistiyaya bərabərdir. Hər zaman belə sərəncamlardan sonra bu tip müzakirələr olur. Bəziləri fikirləşirlər ki, bu sərəncam sifarişdir və olmalıdır. Unutmaq olmaz ki, bu əfv bir hüquqdur. Bunları etmək Prezidentin vəzifəsi deyil. Amma cənab Prezident bunu edir. Çünki o, hər bir vətəndaşa bu haqqı tanıdır ki, yeni bir şanslar verilsin. Belə fikirlərin meydana çıxması da normaldır. Hər kəs bilir ki, bizdə fərqli fikirlər mövcuddur. Hər kəs öz fikrini ifadə edə bilir. Niyə insanlar arasında ayrıseçkilik qoyulmalıdır? 634 nəfər azdır? Bu şəxslər azad olunmamalıdırlar? Hər kəs bu sərəncamla bağlı fikirlər söyləyərkən çox diqqətli olmalıdır. Azadlığa çıxan hər kəsin haqlarına hörmət etmək lazımdır. Hansısa bir təzyiqlərlə qərar qəbul olunmur. Qərarlar xalqın maraqları yönündə qəbul olunur. Heç kəs bu qərarların qəbulu üçün təzyiq metodu seçməməlidir. Təəssüflər olsun ki, ölkə daxilində və xaricində hələ də əməkdaşlığın necə qurulması barədə fəlsəfədən xəbərsiz insanlar var. İnanıram ki, həbsdə qalan digər şəxslər fəal və ya qeyri-fəal olmalarından asılı olmayaraq, tezliklə azadlığa çıxacaqlar. Bu sərəncamla azadlığa çıxan hər bir şəxsi təbrik edirəm. Onlara uğurlar arzulayıram. Digər məhbuslara da azadlıq arzulayıram”.
Məhəmmədəli QƏRİBLİ
