Akif Nağı: “R.İbrahimbəyov niyə belə bir filmi çəkməsinə aydınlıq gətirmək əvəzinə...” Əli Əliyev: “Əlbəttə, onu vasitə kimi başına çıxaran müxalifət kəsiminin də günahı az deyil”
Milli Şuranın fəxri sədri Rüstəm İbrahimbəyovun ermənilərin dəyirmanına su tökən “Qafqaz üçlüyü” filminə Azərbaycan ictimaiyyətinin ən müxtəlif təbəqələrini təmsil edən şəxslər reaksiya verirlər.
Qeyd edək ki, filmdə Azərbaycan xalqı vəhşi, qəddar, riyakar, mədəniyyətsiz, milli kökləri olmayan obrazda, ermənilər isə alicənab, sülhsevər kimi təqdim olunub. Filmin rejissorları Eldar Şengelaya və Fuad İbrahimbəyovdur. Beş il öncə qınaqla qarşılanan yazıçı Əkrəm Əylislinin “Daş yuxular” romanından heç də fərqlənməyən “Qafqaz üçlüyü” filmi ilə R.İbrahimbəyovun ermənilərin dəyirmanına su tökdüyü göz önündədir. Ancaq çox maraqlıdır ki, Milli Şuranın fəxri sədrinin bu xəyanəti qarşısında bu qurumun rəhbərliyi və R.İbrahimbəyovun özü hələ də susqun mövqe sərgiləyirlər.
Milli Şura sədri Cəmil Həsənli isə açıqlamasında canını “Qafqaz üçlüyü” filminə baxmamışam kimi yayındırıcı cavabla qurtardığını zənn edib. Cəmil Həsənli deyir ki, baxmadığı film haqqında necə danışsın axı? Belə olan halda, maraqlı sual yaranır: hörmətli Cəmil müəlim, bəs o filmə niyə indiyə kimi baxmayıbsınız? Axı bu yaranmış səs-küyün fonunda həmin filmə baxmaq ilk növbədə sizin borcunuzdur. Siz bu ssenarini yazanı ölkə prezidenti etmək istəyirdiniz. Bəlkə də baxıbsınız, amma fikir bildirməkdən utanırsınız. “Yuxarı baxıram bığ, aşağı baxıram saqqal” məsələsində olduğu kimi. Siz özünüzü ziyalı sayırsınızsa, mütləq bu məsələyə münasibət bildirməlisiniz. Ya R.İbrahimbəyovu müdafiə edin, ya da onu lənətləyin. Belə məsələdə susqunluq heç də yaxşı rəy yaratmır.
R.İbrahimbəyovun özünün və onun təmsil olunduğu Milli Şuranın bu məsələyə reaksiya verməməsini normal saymaq olarmı?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, bu məsələyə mütləq mənada münasibət olmalıdır: “Biz müxtəlif adamların reaksiyasını görürük. Sizi maraqlandıran adamlarla bağlı isə onu deyə bilərəm ki, hər halda, vətəndaş mövqeyi mütləq ortaya qoyulmalıdır. Mən Cəmil Həsənlinin açıqlaması ilə tanış oldum. Deyib ki, filmə baxmayıb. İndi biz onu filmə baxmağa məcbur edə bilmərik ki? Amma düşünürəm ki, bu elə də çətin bir iş deyil. Cəmi iki saat vaxt aparır. R.İbrahimbəyov isə niyə belə bir filmi çəkməsinə aydınlıq gətirmək əvəzinə, redaksiyalarla bağlı fikir söyləyib və deyib ki, çoxları filmə baxmadan danışır. İstənilən halda, bu mövqeləri yetərli saymaq olmaz”.
Vətəndaş və İnkişaf Partiyasının sədri Əli Əliyev isə hesab edir ki, yəqin həm Milli Şuranın, həm də R.İbrahimbəyovun deməyə sözü yoxdur və ona görə də danışmırlar: “İbrahimbəyov prezidentlik eşqinə düşməsinin səbəbi barədə danışanda demişdim ki, bunun davası qarın davasıdır. Əks halda, nədən qəflətən xalq yadına düşdü, YAP-ın qüsurlarını görməyə başladı? Müxalifətə simpatiyası İlham Əliyevdən qisas almaq, sahibi Putinin əlinə oynamaq istəyindən yaranmışdı. O dövrdə az adamlardan idim ki, İbrahimbəyovun, bütövlükdə, Milli Şuranın üzərinə gedirdim. Çətin idi. Amma bilirdim ki, Putinin planına ayaq vermək olmaz. O proje baş tutmadı. Nəyə təəccüb edirik ki? Öz mədəsi üçün yaşayan, obyektlərini işə salmaq üçün başqasının aləti olmağa müntəzirin, ölkəni təslim etməkdən ötrü əldən gedən birisinin belə ssenarisinə nədən təəccüb edirik? Əlbəttə, onu vasitə kimi başına çıxaran müxalifət kəsiminin də günahı az deyil. Bir sözlə, İbrahimbəyov nümunəsi bir daha göstərir ki, kosmopolitizm təhlükəli ünsürdür. Belələrinə səlahiyyət vermək olmaz”.
Məhəmmədəli QƏRİBLİ
