Aqşin Əliyev: “Belə ziddiyyətli məqamlarla bağlı həmin ölkədəki səfirliyimiz Xarici İşlər Nazirliyi adından öz etirazını bildirməlidir”
Mayın 22-də Avstraliyanın Rayd şəhər şurası Azərbaycanın işğal altındakı torpaqlarında qondarma separatçı-terrorçu qurumun “müstəqilliyinə” dəstək verən qətnamə qəbul edib. Bu haqda erməni nəşrləri məlumat yayıb. Qətnamədə Avstraliya dövlətindən qondarma Dağlıq Qarabağ rejiminin “müstəqilliyinin” tanınması və işğal altındakı torpaqlardakı ermənilərlə əlaqələri möhkəmləndirmək haqda açıq çağırış yer alıb.
Avstraliya İttifaqının general-qubernatoru Piter Kosqrouv isə Azərbaycan Respublikasının Prezidenti İlham Əliyevə ünvanladığı təbrik məktubunda bildirib ki, Avstraliya ilə Azərbaycan arasında səmimi dostluq münasibətləri mövcuddur: “Avstraliya Azərbaycanın suverenliyini və ərazi bütövlüyünü həmişə qətiyyətlə dəstəkləyib və biz gələcəkdə də bu dəstəyimizi davam etdirəcəyik. Mən, həmçinin, bu il müstəqilliyinin 100 illiyini qeyd edən Azərbaycan dövlətini təbrik edirəm.
Ölkələrimiz arasında parlamentlər səviyyəsində və siyasi münasibətlər sahəsində çox sıx əməkdaşlıq mövcuddur. Əminəm ki, xüsusilə dövlətinizin öz iqtisadiyyatını şaxələndirməsi istiqamətində səylər göstərməkdə maraqlı olduğu bir dönəmdə qarşıdakı illərdə Avstraliya ilə Azərbaycan arasında ticarət və investisiya qoyuluşu sahələrində əməkdaşlığımızı daha da artıra bilərik”.
Əslində, Avstraliyadan səslənən bu iki mövqe arasında kəskin ziddiyyət var. Həmin ölkənin şəhərlərindən birinin administrasiyası Azərbaycanın ərazi bütövlüyünə həqarət edən bir mövqe ortaya qoyur. Ölkə adından danışan yuxarı çinli bir şəxsin Prezidentimizə ünvanladığı məktubda isə Azərbaycanın ərazi bütövlüyünə hörmət ifadə olunur. Avstraliyadan qaynaqlanan bu ziddiyyəti necə izah etmək olar?
Ekspert Aqşin Əliyevin sözlərinə görə, işğal altında olan Azərbaycan əraziləri ilə bağlı Avstraliya şəhərlərindən birinin mövqeyi beynəlxalq qanunların pozulmasıdır və bunun adı cinayətdir: “Ermənilər uzun illərdir işğal altında saxladıqları Azərbaycan torpaqlarında qanunsuz əməllər törətməklə məşğuldurlar. Bunun kökü də məhz ermənilərdən qaynaqlanır. Bir müddət əvvəl biz bəzi ölkələrdəki şəhərlərin separatçı qurumun işğal altında saxladığı doğma şəhərlərimizlə “qardaşlaşmasının” şahidi olurduq. Hətta həmin ölkələrin sırasında Dağlıq Qarabağ münaqişəsinin nizamlanmasında vasitəçilik missiyasını üzərinə götürən Fransanın da adı vardı. Əvvəl hansısa yerli bələdiyyə belə bir qərar verir. Sonra Azərbaycan ona etiraz edir və proses dayanır. Ermənilər bu mexanizmi bilərəkdən tətbiq edirlər. Bilirlər ki, bunun sonu yaxşı olan məsələ deyil. Ancaq, görünür, bu taktika onlara çox sərf edir. Fikir verin, bu sayaq problemlər yarananda qondarma qurumun adı nə qədər hallanmış olur? Bununla ermənilər qondarma qurumun adını şüurlara oturtmaq, dünyaya çatdırmaq istəyirlər. Hansısa ərazi subyektlərinin bu qərarları mərkəzi hakimiyyət tərəfindən dəstəklənmir. Avstraliya ilə bağlı yaşanan hadisədə biz bunu bir daha görürük. Ölkənin yüksək rəsmiləri adından göndərilən təbrikdə biz Azərbaycanın ərazi bütövlüyünün həmin ölkə tərəfindən dəstəkləndiyinin şahidi oluruq. Ancaq hansısa bir şəhər qondarma qurumun “müstəqilliyini” tanıdığını bəyan edir. Yenə həmin taktikadır. Görün, bu mövzu ilə bağlı nə qədər materiallar dərc olunacaq? Ermənilər bu üsulla separatçı qurumu reklam edirlər. Təsəvvür edin ki, Ermənistanın özü separatçı qurumun “müstəqilliyini” tanımadığı halda, dünyanın ən ucqar ölkəsinin, ən ucqar bir şəhəri separatçı rejimi tanımağa cəhd edir. Belə ziddiyyətli məqamlarla bağlı həmin ölkədəki səfirliyimiz Xarici İşlər Nazirliyi adından öz etirazını bildirməlidir. Onların atdığı addımın nəticəsi olmasa da, hər halda, narahatlıq yarada bilən bir hadisədir”.
Məhəmmədəli QƏRİBLİ
