Xəzər Teyyublu: “Azərbaycanın tərkibində qurulan separatçı rejimi onlarla eyni tədbirdə öz başına yığmaq Rusiyanın münaqişədəki tərəfsizliyini şübhə altına salır”
Abxaziyada separatçı qurumun yaradılmasının 25 illiyi ilə bağlı tədbirdə Azərbaycana qarşı təxribat olub. Qondarma rejimin rəhbəri Raul Xadjimba təbrik üçün regiona səfər edən Rusiya Xarici İşlər Nazirliyinin MDB ölkələri ilə əlaqələr üzrə 4-cü departamentinin direktoru Aleksey Pavlovski və qondarma “Dağlıq Qarabağ Respublikası"nın "xarici işlər naziri” Mais Mailyanı qəbul edib.
Qonaqları eyni zamanda qəbul edən Xacimba Azərbaycanın işğal altındakı ərazilərində yaradılan qondarma rejimin nümayəndəsinə və rusiyalı diplomata təşəkkürünü bildirib. Xatırladaq ki, XİN mətbuat xidmətinin rəhbəri Hikmət Hacıyev Abxaziya prezidenti kimi özünü təqdim edən Raul Xadjimbanın Rusiya XİN-nin 4-cü MDB idarəsinin rəisi Aleksey Pavlovski, Azərbaycanın işğal olunmuş ərazilərində yaradılmış qondarma rejim, Dnestryanı və Cənubi Osetiya rejimlərinin nümayəndələri ilə görüşünü regionda sülhə və təhlükəsizliyə ciddi zərbə kimi qiymətləndirib. Hikmət Hacıyev qondarma rejimin nümayəndəsinin Rusiya XİN-in nümayəndəsi ilə qarşı-qarşıya oturması ilə bağlı suala cavabında deyib: "Bu heç bir halda regionda davamlı sülh və təhlükəsizliyin təmin olunması üçün etimadın qurulmasına xidmət edən addım deyil. Əksinə, regionda ağır olan vəziyyətin daha da gərginləşməsinə xidmət edir".
Nazirlik rəsmisi bildirib ki, diplomatik kanallarla etiraz və ciddi narahatlıq Rusiya XİN-ə çatdırılıb. Rusiya Xarici İşlər Nazirliyindən isə bildiriblər ki, konkret beynəlxalq tədbirlərdə Azərbaycanın işğal edilmiş torpaqlarında yaradılan separatçı rejimin nümayəndələri ilə təsadüfən üz-üzə gəlmək kimi hadisələr Rusiyanın Dağlıq Qarabağ münaqişəsi ilə bağlı mövqeyinə heç bir təsir etmir.
Əslində, Rusiya Xarici İşlər Nazirliyinin mövqeyi yaranmış vəziyyətə dolğun izah vermir. Birincisi, Rusiya rəsmiləri həmin tədbirdə Dağlıq Qarabağı “təmsil” edən separatçılarla təsadüfən üz-üzə gəlməyiblər. Abxaziya kimi separatçı qurum faktiki olaraq Rusiyaya birləşdirilib. De-fakto Rusiyanın tərkib hissəsi sayılır. Hətta onlar yaxın zamanlarda Rusiya ilə eyni silahlı birləşmələri də yaratmağı düşünürlər. Belə tanınmamış qurumlarla təşkil olunan formata Dağlıq Qarabağ separatçılarının çağırılması və həmin görüşdə Rusiya rəsmisinin iştirakı təsadüfi xarakter daşıya bilməz. Belə qeyri-adi addımlar Rusiyanın Dağlıq Qarabağla bağlı tutduğu vasitəçilik missiyasına necə təsir edə bilər?
Kalssik Xalq Cəbhəsi Partiyasının funksioneri Xəzər Teyyublunun sözlərinə görə, bunu Rusiya düşünülmüş şəkildə edib: “Rusiya Dağlıq Qarabağ münaqişəsinin nizamlanması ilə bağlı vasitəçilik missiyasını üzərinə götürən üç dövlətdən biridir. Separatşı qurumların rəhbərlərini bir araya gətirmək bu missiyanı birbaşa sual altında qoyur. Bu, Rusiyanın separatçı quruma verdiyi önəmin birbaşa göstəricisidir. Həmin tədbirdə Rusiya XİN-in rəsmisinin də iştirakı vəziyyəti daha da pisləşdirir. Rusiya ora yığdıqlarını bir gözdə görürsə, onda bu olduqca təhlükəli tendensiyadan xəbər verir. Hələ illər öncə Rusiya Gürcüstandan müstəqilliyini elan edən tanınmamış Abxaziya Muxtar Respublikası ilə "İttifaq və Strateji Tərəfdaşlıq Sazişi" imzalayıb.
Rusiyanın Abxaziya ilə imzaladığı razılaşmanı hətta Krımdan sonra yeni bir ilhaq kimi də dəyərləndirirlər. Həmin müqavilədə Abxaziyanın tanınması istiqamətində Moskvanın səy göstərəcəyi kimi öhdəlik də var. Tərəflər arasında imzalanan anlaşmaya görə Rusiya Abxaziyanın beynəlxalq təşkilatlara üzv ola bilməsi üçün səy göstərəcək. Tərəflərdən birinə hücum olsa, digəri bunu özünə edilmiş sayıb hər cür yardımı edəcək. Rusiya və Abxaziya ortaq müdafiə birliyi meydana gətirmək haqda da razılıq əldə ediblər. Abxaziya ordusu Rusiya tərəfindən modernizə edilir. Abxazların Rusiya vətəndaşlığına keçmə proseduru asanlaşdırılıb. Abxaziya əhalisinin böyük bir qismi Rusiya pasportu daşıyır. Rusiyanın Abxaziyaya göstərdiyi bu “diqqət” sivil dünya tərəfindən pislənib. Mən Rusiyanın separatçı qurumlardan birinə göstərdiyi diqqətin müddəalarını diqqətinizə çatdırdım. Azərbaycanın tərkibində qurulan separatçı rejimi onlarla eyni tədbirdə öz başına yığmaq Rusiyanın münaqişədəki tərəfsizliyini şübhə altına salır”.
Məhəmmədəli QƏRİBLİ
