Ermənistanda baş verən son olaylar bu ölkədə həm xaotik vəziyyətin daha da dərinləşəcəyini, həm də hakimiyyət uğrunda mübarizənin bir qədər də kəskin xarakter alacağını göstərir. “Sasna tsrer” silahlı qruplaşmasının üzvləri ilə bağlı məhkəmə prosesi isə hadisələrin inkişafını sürətləndirəcək əsas məqamlardan sayılır. Qeyd edək ki, bu qruplaşma ilə bağlı yaşananlar hazırda cəmiyyətlə hakimiyyət arasında yeni ziddiyyət mənbəyinə çevrilib.
Qruplaşmanın tərəfdarları bu həftədən çoxdur ki, etiraz aksiyası keçirərək tutulanların azadlığa buraxılmasını istəyir. “Sasna tsrer”in tərəfdarları həbs olunan qruplaşma üzvlərinin siyasi məhbus hesab edirlər. Ermənistanın baş naziri Nikol Paşinyan əvvəlcə bu şəxslərin azadlığa çıxacağını bildirsə də, sonradan fikirindən vaz keçib. Bu isə artıq Paşinyana qarşı aksiyalara rəvac verib. Yaranmış vəziyyətdə Serj Sarksiyanın nəzartəində qalan Respublika Partiyası isə etirazların miqyasının daha da genişlənməsinə çalışır. Xatırladaq ki, “Sasna tsrer" qruplaşması 2016-cı il iyulun 17-də İrəvanda post-patrul xidmətinin binasına silahlı hücum edərək 6 nəfəri girov götürüb. Girovlar arasında polis rəisinin müavini, general-mayor Vartan Eqiazaryan da olub. Silahlı qarşıdurmada polis əməkdaşları arasında ölən və yaralananlar olub. Hadisələrə rəhbərlik edən "Yeni Ermənistan" İctimai Birliyinin rəhbəri Jirayr Sefilyan 10 il 5 ay müddətinə azadlıqdan məhrum edilib. Qruplaşmanın başqa üzvlərinə də 2-5,5 il müddətinə həbs cəzası verilib. Ölkədə hakimiyyət dəyişiklyindən sonra “Sasna Tsrer” qruplaşmasının üzvlərinin azadlığa çıxacağı gözlənilsə də bu baş vermədi. Bu səbəbdən Nikol Paşinyana qarşı etiraz aksiyalarına başlanıb. Nikol Paşinyan qrup üzvlərinin azadlığa buraxılması məsələsinə soyuq münasibət bildirib. O hətta qeyd edib ki, kimsə bunu ondan gözləyirsə, yanılır. Keçrilən aksiyalara rəhbərlik edən Pavel Yeqiazaryan isə bəyan edib ki, məhkəmə müsbət qərar çıxarana qədər binanın mühasirəsini davam etdirəcəklər. Erməni mediasının məlumatına görə, silahlı qrupun tərəfdarları aktiv hərəkətlərə keçməyə söz veriblər. Erməni siyasi ekspertlər isə bu fonda qanlı qarşıdurmaların baş verməsini istisna etmir.
Hadisələin bu səpkidə inkişafında isə Respublika Partiyası da olduqca maraqlıdır. Partiyanın adının çəkilməsini istəməyən yüksək vəzifəli üzvü “EADaily”yə açıqlamasında bildirib ki, sabiq baş nazir Serj Sarkisyan gözləmə mövqeyinə keçərək, siyasi səhnəyə qayıtmaq üçün əlverişli məqam gözləyir. Onun sözlərinə görə, Paşinyanın hökumət proqramının qəbuluna mane olmamaq barədə göstəriş verilib. Həmçinin yeni hökumətin fəaliyyətini, populizm və emosiyalardan uzaq olmaq şərtilə, sadəcə tənqid etmək tapşırılıb: "Bunun 2 səbəbi var. Birincisi, hazırda Respublikaçılar partiyası ictimai dəstəyini itirib. Ona görə də populizm bizə kömək etməyəcək. İkincisi Paşinyan hökumətinin daha çox xarici siyasət sferasındakı savadsız fəaliyyəti və bəyanatlarının dəqiq və açıq şəkildə yayılmasını təmin etməkdir. Paşinyan komandasının səriştəsizliyini nəzərə alsaq, mütləq kobud səhvlərə yol verəcəklər. Respublikaçılar ümid edir ki, yeni hökumət tezliklə uğursuzluğa düçar olacaq. Çünki cəmiyyətin inqilabi gözləntilərini, çətin ki, doğrulda bilsinlər.” Respublikaçıların nümayəndəsi bir məqamı xüsusilə vurğulayıb ki, Serj Sarkisyan onlara Paşinyan hökumətinin fəaliyyətini sakitcə izləməyi və yalnız 3 mühüm məsələdə: Dağlıq Qarabağ münaqişəsinin nizamlanması, Ermənistanın Avrasiya İqtisadi İttifaqındakı üzvlüyü və Avropa İttifaqı ilə hərtərəfli geniş əməkdaşlıq sazişinin realizəsi məsələlərində qəti kompromis göstərmədən birbaşa fəaliyyətə keçməyi tapşırıb. Ermənistanın “Joxovurd” qəzeti yazır ki, Sarkisyan öz partiyadaşlarına 3 ay da gözləməyi məsləhət görüb və deyib ki, bu müddət ərzində Paşinyan Nazirlər Kabinetinin işini bərbad vəziyyətə salacaq və xalq da bundan məyus olacaq. 7 iyunda yeni hökumətin proqramı irəli sürüləndən sonra Respublika Partiyası Paşinyanı nüfuzdan salmaq üçün əməli işə keçəcək. Bu kontekstdə, Ermənistanın keçmiş baş naziri Qrant Baqratyanın Paşinyan haqqında söylədiklərindən belə qənaətə gəlmək olar ki, Respublika Partiyasının planlarına "yaşıl işıq" yana bilər. Baqratyanın fikrincə, ya Paşinyanın hakimiyyəti dövründə də iqtisadi inkişafla bağlı yalan davam etdiriləcək, ya da Nikolun hökuməti çökəcək: “Paşinyan, ölkədə statistik yalanların baş alıb getməsilə bağlı fikirlərinə rəğmən, Milli Statistika Xidmətinin sədri vəzifəsinə yenə də həmin yalanların müəllifini təyin etdi. Stepan Mnasakanyan əvvəlki hökumətdə 7,5 faiz iqtisadi inkişafdan danışırdı. Yəni doğrudan 7,5 faiz artım qeydə alan hakimiyyəti tam dəyişirlər? Ya iqtisadi yalanlar yenə davam edəcək, ya da Paşinyan hökuməti çökəcək. Bununla da, xalqın etimad göstəricisi sıfıra enəcək”. Yaranmış vəziyyətdə Ermənistanda qarşıdakı günlər ərzində xaotik vəziyyətin daha da dərinləşməsi qaçılmaz sayılır. Eyni zamanda görünən həm də odur ki, Ermənistanda hakimiyyət davası yenidən qızışır və bu, yeni daxili toqquşmalara səbəb olacaq başlıca faktorlardan sayılır.
Tahir TAĞIYEV
