Arzuxan Əlizadə: “Ola bilsin ki, belə açıqlamaların kökündə seçkidə səs toplamaq niyyəti dayanır”
Bu günlərdə Ermənistanın yeni xarici işlər naziri Zöhrab Mnatsakanyan Azərbaycanın işğal altındakı Dağlıq Qarabağ ərazisinə gələrək, Xankəndində qurulan separatçı rejimin rəhbəri Bako Saakyan və digər şəxslərlə görüşüb. Ermənistan mətbuatının məlumatına görə, görüşdə Dağlıq Qarabağla bağlı xarici siyasətə dair bir sıra məsələlər müzakirə olunub. Ermənistanın yeni xarici işlər naziri bəyan edib ki, Dağlıq Qarabağ Ermənistanın diplomatik cəbhədə prioritetlərindən biri olacaq.
Bununla yanaşı, Z.Mnatsakanyan qondarma “DQR”in “xarici işlər naziri” Masis Mailyanla görüşərək bir sıra məsələləri müzakirə edib. Görüşdə qondarma rejimin beynəlxalq müstəvidə tanınması prosesində guya müsbət dinamikanın daha da möhkəmləndirilməsi perspektivləri, eləcə də üçtərəfli danışıq formatının bərpası ilə bağlı fikir mübadiləsi aparılıb. “Tərəflər” bununla bağlı əlaqəli fəaliyyətin vacibliyini vurğulayıblar. Eyni zamanda, məsləhətləşmələrin davam etdirilməsinin vacibliyi qeyd edilib.
Göründüyü kimi, Ermənistanda hakimiyyətə gələn yeni qüvvələr danışıqları müsbət məcrada inkişaf etdirmək əvəzinə, daha avantürist mövqe sərgiləyirlər. Məsələ ondadır ki, Z.Mnatsakanyandan əvvəl Dağlıq Qarabağa səfər edən baş nazir Nikol Paşinyan separatçı qurumun danışıqlarda tərəf olmasının vacibliyini gündəmə gətirdi. Çox təəssüflər olsun ki, onun bu açıqlamasına ATƏT-in Minsk Qrupu həmsədrləri öz etirazlarını bildirmədilər. Halbuki, bu cür açıqlamanın verilməsi danışıqların ruhuna ziddir və pozuculuq məqsədi daşıyır. Həyasızlığın dərəcəsinə bax ki, Z.Mnatsakanyan da bənzər açıqlama ilə çıxış edir.
Ekspertlər bütün bunlara necə yanaşırlar? Məsələyə münasibət bildirən AMİP-in baş katibi Arzuxan Əlizadənin sözlərinə görə, məlum açıqlamalar hazırkı Ermənistan rəhbərliyinin Dağlıq Qarabağ danışıqlarında daha aqressiv və barışmaz siyasət yeridəcəyindən xəbər verir: “Çünki ölkə rəsmilərinin ard-arda bu cür açıqlamalarla çıxş etməsi danışıqların pozulmasına hesablanıb. Nəzərə almaq lazımdır ki, Ermənistanda 20 il hakimiyyətdə olan və danışıqlarda barışmaz mövqeyi ilə seçilən Qarabağ klanı sözügedən məsələni bu dərəcədə gündəmə gətirməmişdi. Bəziləri sadəlövhcəsinə ümid edirdilər ki, yeni gələn qüvvələr danışıqlarda konstruktiv mövqe sərgiləyəcəklər. Ancaq baş verənlər bunun tam əksini ortaya qoyur və müşahidələr göstərir ki, Paşinyan hakimiyyəti bunda qərarlıdır. Ermənistan hakimiyyətinin bu yöndə çağırışları davam edərsə, o zaman Azərbaycan qarşı tərəflə aparılan danışıqları dayandırmalı və torpaqların güc yolu ilə azad olunmasına start verməlidir. Çünki bu cür çağırışlar təxribat xarakterlidir. O da ola bilər ki, Paşinyan seçkilərdə Qarabağ klanının müəyyən qədər dəstəyini qazanmaqdan ötrü bu cür şirnikləndirici vədlər verir. Nəzərə almaq lazımdır ki, ölkədə növbədənkənar parlament seçkiləri yaxınlaşır. Paşinyanın əsas məqsədi parlament seçkilərində çoxsaylı yer əldə etməklə hakimiyyət kreslosunda möhkəmlənməkdir. Çünki onun hazırkı hökuməti o qədər də dayanıqlı gücə malik deyil. Yəni ola bilsin ki, belə açıqlamaların kökündə seçkidə səs toplamaq niyyəti dayanır. İstənilən halda, separatçı qurumun danışıqlarda tərəf olmasından söhbət belə gedə bilməz. Belə olarsa, o zaman Dağlıq Qarabağın azərbaycanlı icması da danışıqlarda iştirak etməlidir. O üzdən hesab edirəm ki, Ermənistanın istənilən təxribat xarakterli addımlarına adekvat cavab verilməlidir”.
Vidadi ORDAHALLI
