“Sözügedən layihələr üç ölkənin müxtəlif sahələrdə inteqrasiyasına səbəb olub”
Xəbər verildiyi kimi, müdafiə naziri, general-polkovnik Zakir Həsənov Azərbaycan Ali Hərbi Məktəbinin rəisi, general-mayor Füzuli Salahov, Türkiyə Respublikası Quru Qoşunları Məktəbinin rəisi, briqada generalı İsmayıl Güzeller və Gürcüstan Milli Müdafiə Akademiyasının rektoru, polkovnik Zaza Caparidze ilə görüşüb.
Martın 31-də Giresun şəhərində Azərbaycan, Türkiyə və Gürcüstan arasında imzalan müdafiə sahəsində əməkdaşlıq haqqında Anlaşma Memorandumuna əsasən, hər üç ölkənin hərbi təhsil müəssisələri rəhbərlərinin Bakıda keçirilən görüşü çərçivəsində aparılan müzakirələrin, təcrübə mübadiləsinin mühüm əhəmiyyət kəsb etdiyini deyən müdafiə naziri belə tədbirlərin mütəmadi keçirilməsinin vacibliyini vurğulayıb. General-polkovnik Z.Həsənov Azərbaycan, Türkiyə və Gürcüstan hərbi təhsil müəssisələri rəhbərlərinin Bakıdakı tədbirini hər üç ölkənin müdafiə nazirləri və Silahlı Qüvvələri Baş Qərargah rəislərinin bu günədək keçirdikləri görüşlərin davamı kimi qiymətləndirib. Həmçinin, bu əməkdaşlığın regionda sülhün və təhlükəsizliyin təmin edilməsinə mühüm töhfə verəcəyinə əminliyini bildirib. Tərəflər hər üç ölkənin hərbi təhsil müəssisələri arasında kursantların qarşılıqlı təhsil almaları, birgə təlimlərin, idman, bilik yarışlarının keçirilməsi və bir sıra digər məsələləri müzakirə ediblər.
Sirr deyil ki, bu kimi əməkdaşlıq çərçivəsində hərbi təhsil müəssisələri arasında aparılan qarşılıqlı təcrübə mübadiləsi, kursantların bir sıra hərbi biliklərə yiyələnməsinin böyük əhəmiyyəti var. Bu, ordunun daha da güclənməsinə, zabitlərin nəzəri və praktiki biliklərinin artmasına müsbət təsir göstərir. Bu baxımdan, Azərbaycan, Türkiyə və Gürcüstan arasında üçtərəfli hərbi təhsil əməkdaşlıq formatının gələcəyini ekspertlər necə dəyərləndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə üç ölkə arasında bununla bağlı əməkdaşlıq formatının qurulmasına müsbət prizmadan yanaşdı: “Məsələ ondadır ki, Cənubi Qafqaz regionuna daxil olan iki ölkə, Ermənistan istisna olaraq, Azərbaycan və Gürcüstan ikitərəfli siyasi-hərbi-iqtisadi əməkdaşlığı genişləndiriblər. Gürcüstan tranzit ölkə olaraq Azərbaycanın enerji tərəfdaşıdır. Son illər ölkələr arasında əlaqələr daha da inkişaf edib. Bununla yanaşı, Türkiyənin daim Cənubi Qafqazla bağlı xüsusi siyasəti olub. Çünki Azərbaycanla dost və qardaşlıq bağları bunu labüd edir. Bundan əlavə, Azərbaycanın Bakı-Tiflis-Ceyhan neft kəməri, Bakl-Tiflis-Ərzurum qaz kəməri, TANAP və Bakı-Tiflis-Qars dəmir yolu bu üç ölkənin əməkdaşlığını şərtləndirən amillərdir. Sözügedən layihələr üç ölkənin müxtəlif sahələrdə inteqrasiyasına səbəb olub. Bunun nəticəsidir ki, Türkiyə, Gürcüstan və Azərbaycan hərbi sahədə də əməkdaşlıq edirlər. Bu əməkdaşlıq müxtəlif formatlarda özünü göstərir. Boru kəmərlərinin mühafizəsi üzrə birgə qruplar var. Bundan əlavə, üç ölkənin müdafiə nazirləri üçlü görüş keçirib və silahlı qüvvələrin birgə təlimləri olub. Hərbi məktəb rəhbərlərinin görüşü isə gələcəkdə hərbi təhsil sahəsində əməkdaşlığı nəzərdə tutur. Türkiyə NATO ölkəsidir və iki dövlətin silahlı qüvvələrinin modernləşdirilməsində qardaş dövlətin yardımı əvəzsizdir. Ona görə də hərbi kursantların qarşılıqlı təhsil alma məsələləri də müzakirə edilə bilər. Hesab edirəm ki, hərbi təhsil sahəsində üç ölkənin əməkdaşlığı gələcək perspektivdə Qafqazın NATO çətiri altında olmasına münbit şərait yaradacaq. NATO Türkiyə vasitəsilə Azərbaycan və Gürcüstanı Rusiyanın təsirlərindən qoruyacaq”.
Vidadi ORDAHALLI
