“Onların dediyi 150 nəfərlik siyahıdakı adamların 90 faizini cəmiyyətdə tanıyan yoxdur”
Avropa Parlamenti yekdilliklə Ermənistanla Avropa Birliyi arasında imzalanmış çərçivə sazişini təsdiqləyib. Bu barədə məlumatı erməni KİV-ləri yayıb. Bildirilir ki, Avropa Parlamenti rəsmi Brüsselə müraciət edərək, Ermənistanla əlaqələri genişləndirməyə çağırıb. Litvadan olan deputat Petras Austreviçyus deyib ki, xüsusilə də həmin ölkədə baş verən inqilabı misal gətirərək bildirirlər ki, bu, başqaları üçün də demokratiya dərsi ola bilər. Avropa Parlamentinin nümayəndələri Brüsselə, həmçinin, Ermənistanda formalaşan yeni rejimə ölkədəki vəziyyəti liberallaşdırmaq üçün maddi yardımı artırmağı tövsiyə edib. Böyük Britaniyanı təmsil edən deputat Çarlz Tanner isə bildirib ki, Ermənistan zəngin irsə və yetkin demokratiyaya malik ölkədir. Qeyd olunur ki, avropalı deputatlar Ermənistanın Avrasiya İttifaqı ilə əməkdaşlıq etməsi səbəbindən onun üzərindən bəzi tarif baryerlərini götürə bilmədikləri üçün peşmançılıq keçirdiklərini də dilə gətiriblər. Dağlıq Qarabağ münaqişəsinin həllinə gəldikdə isə, münaqişə tərəflərinə danışıqlar tempini artırmaq tövsiyə olunur və qeyd edilir ki, konfliktin hərbi yolla həlli mümkün deyil. Erməni KİV-ləri tərəfindən yayılan məqalədə vurğulanır ki, Avropa Parlamentinin deputatları elə həmin gün Azərbaycanla Avropa Birliyinin gələcək taleyi barədə öz tövsiyələrini rəsmi Brüsselə ünvanlayıblar. Azərbaycanda guya 150-yə yaxın vicdan və siyasi məhbusun olduğu xatırladılır və onların tezliklə azadlığa buraxılması tələbinin irəli sürülməsi istənilir.
Hər halda, bu, Ermənistan KİV-lərinin iddiasıdır. Əksər hallarda biz onların məlumatları öz xeyirlərinə təhrif etdiyinin şahidi oluruq. Bu yazının da hansı dərəcədə təhrifə məruz qaldığını deyə bilmərik, amma istənilən halda, bu cür mövqeyi, Ermənistanla Azərbaycan arasında aparılan uğursuz və qərəzli müqayisəni ikili standartların bariz nümunəsi kimi qəbul etmək olarmı?
Beynəlxalq məsələlər üzrə ekspert Yeganə Hacıyeva qəzetimizə açıqlamasında bildirdi ki, bu yazının erməni mediasının məhsulu olduğu açıq-aşkar hiss edilir: “Əvvəla onu qeyd edim ki, Avropa Parlamenti Avropa İttifaqının əməkdaşlıq etdiyi ölkələrlə imzalanan çərçivə sazişlərini təsdiq edə biləcək orqan funksiyasını daşımır. Avropa Parlamenti bu yöndə yalnız tövsiyələr verə bilər. Bu parlament Avropa İttifaqının 5 mühüm institutlarından biridir. Bu, siyasi təsisatdır və yalnız tövsiyə xarakterli qərarlar verə bilər. Ermənistan mediasında belə bir materialın təqdimatı Avropa Birliyinin Paşinyana necə böyük əhəmiyyət verdiyini xalqa çatdırmağa yönəlib. Avropa Birliyinin bu tövsiyələrində Azərbaycana qarşı qərəz açıq-aşkar hiss edilir. Açığını deyim ki, onlar bir müddət əvvəl belə qərəzi Kataloniya ilə bağlı da nümayiş etdirdilər. Həmin vaxt Kataloniyada xalqın öz müqəddəratının həllinə müsbət rəy vermişdilər. Bununla da birbaşa separatizmi dəstəkləmiş oldular. Nəticədə Avropa Birliyinin üzvü olan İspaniyanın haqlarını pozmuş oldular. Elə bilirəm ki, Avropa Parlamentinin hərdən bizi necə təəccübləndirdiyini qısa da olsa izah edə bildim. Ermənistanla müqayisədə Azərbaycan həmin çərçivə sazişini daha dərin bəndlərlə 2009-cu ildə imzalayıb. Bu o anlama gəlir ki, Ermənistanın indi start verdiyi prosesləri biz artıq keçmişik. Gəlirik guya Azərbaycanda 150 siyasi məhbusun olması ilə bağlı yayılan xəbərə. Hazırda Ermənistanda tək bir siyasi hərəkatın 70-ə yaxın üzvü həbsdədir. Onların dediyi 150 nəfərlik siyahıdakı adamların 90 faizini cəmiyyətdə tanıyan yoxdur. Diqqətli siyasət izləyicisi kimi mən həmin siyahının son variantı ilə tanış olanda dəhşətə gəldim. Həmin siyahıda 5-6 şəxsi problemli məhbus saymaq olar. Ermənistanda isə sırf siyasətlə məşğul olanları həbs ediblər. Siyahıda çox tanınmış, aktiv adamların adları var. Sizi inandırım ki, bu məsələdə erməni hüquq müdafiəçiləri dövləti maraqlarını daha üstün tuturlar. Yəni kimin gəldi adını siyasi məhbus kimi qeyd etmirlər. Ermənistanda bu məqam həm də ona görə qabardılır ki, Azərbaycan hazırda Avropa Birliyi ilə dərinləşdirilmiş strateji sazişin imzalanması ərəfəsindədir. Çox böyük strateji bəndlərlə bağlı razılıqlar əldə olunub. Ermənistan isə bu sahədə olan güclü rəqibi ilə çox primitiv üsullarla mübarizə aparır. Hesab edirəm ki, Ermənistanda belə materialların təqdimatı daha çox daxili auditoriya üçün nəzərdə tutulub. Əhalini sakitləşdirmək istəyirlər ki, guya tezliklə onlar Avropaya vizasız gedib-gələcəklər”.
Məhəmmədəli QƏRİBLİ
