“Paşinyan əleyhinə etiraz aksiyalarının Serj Sarkisyanın rəhbəri olduğu klan tərəfindən təşkil olunduğuna şübhə yeri qalmır”
Ermənistan mətbuatında ölkədə əksinqilabın olacağı ilə bağlı yazılar dərc edilməyə, bu mövzu ətrafında aktiv müzakirələr aparılmağa başlayıb. Həmin diskussiyalarda qeyd edilir ki, bu istiqamətdə hakimiyyətə yeni gələn Nikol Paşinyana qarşı aktiv iş aparılır. Son üç gün ərzində Ermənistanda çox fərqli təbəqənin təmsilçilərinin etiraz aksiyaları keçirilib. Aksiyalarda ayrı-ayrılıqda taksi sürücüləri, hərbi komissarlıq işçiləri və polislər iştirak ediblər. Maraqlıdır ki, həmin adamlar Paşinyandan meydanda verdiyi vədlərin yerinə yetirilməsini tələb edirlər. Ekspertlər hesab edirlər ki, Paşinyan bütün problemləri dərhal həll etmək kimi gücə malik deyil və proseslər onun hakimiyyətdən salınmağına qədər istiqamət ala bilər. Artıq etirazların ilk işartıları görünür və proseslərin gedişatında bunun böyüyərək əksinqilaba çevriləcəyi istisna olunmur. Paşinyanın baş nazir seçilməsinə baxmayaraq, hələ də Ermənistanın siyasi elitasında birmənalı şəkildə qəbul olunmur. Bəllidir ki, hələ də Ermənistanda keçmiş prezident Serj Sarkisyanın partiyası daha güclüdür. Parlamentdə keçirilən baş nazir seçkilərindən sonra Respublika Partiyasının bəyanatında da göstərilirdi ki, Paşinyana qarşı müxalif mövqedə dayanacaqlar. Onların parlamentdə çoxluğa sahib olması isə N.Paşinyanın işinin çətin olacağını deməyə əsas verir. Nəzərdən qaçırmaq olmaz ki, Paşinyan baş nazir olmaq üçün ilk seçkidə lazımi səsi ala bilmədi və müəyyən dəyişikliklərdən sonra ikinci cəhddə baş nazir seçildi. Bu, Sarkisyanın rəhbərlik etdiyi siyasi qüvvənin o qədər də zəif olmadığını göstərir. Bütün bunları əsas götürüb demək olarmı ki, Paşinyan əleyhinə etiraz aksiyalarını məhz hakimiyyətdən devrilmiş S.Sarkisyanın adamları təşkil edir?
Politoloq Vüqar Qədirovun sözlərinə görə, meydanlarda populist bəyanat verməklə ölkəni idarə etmək arasında ciddi fərq var: “Paşinyanın keçdiyi həyat yoluna diqqət etdikdə məlum olur ki, onun heç bir dövlət idarəetmə təcrübəsi yoxdur. Vəziyyət elə gətirdi ki, o, xalqın nəbzini tutmağı bacardı. Bu da son 20 il ərzində ermənilərin “Qarabağ klanı”nın zülmündən bezməsinə görə asan oldu. Yəni xalq önə çıxmağı bacaran istənilən şəxsi dəstəkləyəcəkdi. Paşinyan üçün xalqı coşdurmağa kifayət qədər danışılası mövzular vardı. 10 illik hakimiyyəti dövründə S.Sarkisyan bu əsasları ona vermişdi. Sonda o, hakimiyyətə gəlməyi bacardı. İndi iş görmək, verilən vədləri həyata keçirməyin zamanıdır. Ermənistan əhalisi daha çox iqtisadi problemlərinin həllini istəyir. Mövcud resurslar və siyasət kursu ilə Paşinyan bunu etmək iqtidarında deyil. Çünki bunun üçün Ermənistan işğalçı siyasətindən əl çəkməlidir. Onun ardınca blokadadın çıxıb regionu əhatə edən beynəlxalq iqtisadi layihələrə qoşulmalıdır. Ancaq Paşinyanın davranışlarından görünür ki, o bunları etməkdə maraqlı deyil. Reallıq ondan ibarətdir ki, Paşinyan özünü Sarkisyan kimi aparsa, ölkəni bu vəziyyətdən çıxara bilməsə, heç bir məsələni həll etmək iqtidarında olmasa, həmin o meydan onu çox asanlıqla devirə bilər. Artıq hiss olunur ki, müəyyən təbəqə Paşinyana qarşı etiraz edir. Məsələn, Ermənistanda siyasi məhbuslar var ki, onların azad olunması ilə bağlı tələblər artıq güclənir. Paşinyan isə bunu etmir. Baxmayaraq ki, Paşinyan özü onların siyasi məhbus olduğunu, azadlığa buraxılmasının vacibliyini deyirdi. İndi isə deyir ki, onların işlərinə əvvəlcə hüquqi müstəvidə baxılmalıdır, yalnız bundan sonra siyasi məhbuslar azadlığa buraxıla bilər. Bu artıq ziddiyyətli bir yanaşmadır. Paşinyan bununla özünü inkar edir. Bundan əlavə, o, Avrasiya İttifaqına qarşı çıxırdı. Baş nazir olan kimi isə Putinin qabağına qaçıb həmin qurumun tədbirində iştirak etdi. Bütün bunlar ona olan inamı və rəğbəti azaldır. Təbii ki, belə vəziyyət S.Sarkisyanı qane edir. Serj və onun klanı tam gücünü itirməyib. Hazırkı məqamda hətta mən deyərdim ki, Paşinyanın əlindəkilərdən də güclü olan təsir rıçaqlarına malikdirlər. Bura uzun illər ölkənin talanmasından əldə olunan maliyyə resurslarını da əlavə etsək, Paşinyan əleyhinə etiraz aksiyalarının S.Sarkisyanın rəhbəri olduğu klan tərəfindən təşkil olunduğuna şübhə yeri qalmır”.
Məhəmmədəli QƏRİBLİ
