AŞ PA-nın tətbiq etdiyi sanksiya Azərbaycan nümayəndə heyətinin və ya nümayəndə heyətinin rəhbərinin fəaliyyətinə heç bir məhdudiyyət yaratmır.
“Trend”in məlumatına görə, bunu Azərbaycanın AŞ PA-dakı nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov deyib.
S.Seyidov vurğulayıb ki, bu sanksiya nəticəsində sadəcə olaraq Azərbaycan nümayəndə heyətinin rəhbəri iki il müddətinə AŞPA-nın prezidenti ola bilməz, seçki missiyasında iştirak edə bilməz:
“Mən axırıncı dəfə AŞ PA-nın seçki missiyasında 10 il bundan əvvəl iştirak etmişəm. Yəni göründüyü kimi, bu sanksiya bizim fəaliyyətimizə ciddi məhdudiyyət yaratmır. Əksinə, biz bundan sonra AŞ PA-dakı fəaliyyətimizi daha da gücləndirəcəyik, Azərbaycan əleyhinə olan qüvvələri ifşa etmək üçün daha aktiv fəaliyyət göstərəcəyik”.
Qeyd edək ki, ötən gün AŞ PA-nın Prosedur qaydaları və institusional məsələlər komitəsi Assambleyanın bəzi üzvlərinə, o cümlədən S.Seyidova qarşı sanksiyalar tətbiq edib.
Müvafiq qərarda qeyd olunur ki, AŞ PA üzvləri üçün nəzərdə tutulmuş “Davranış Qaydaları” Məcəlləsinin 25-ci bəndinə əsasən, S.Seyidov fəaliyyətində AŞ PA-nın etik qaydalarını ciddi şəkildə pozub. Onlar müvəqqəti olaraq Assambleyanın mandatından məhrum edilib.
S.Seyidov deyib ki, bəzi qüvvələr, o cümlədən erməni lobbisi Azərbaycan Avropa Şurasından kənarlaşdırmaq istəyirlər.
S.Seyidov bildirib ki, lakin həmin qüvvələr Azərbaycanın Avropa Şurasındakı fəaliyyətinə təsir göstərə bilməyəcəklər: "Bu, Avropa Şurasının özünə ziyandır və Şurada ikili standartların mövcud olduğunu bir daha göstərir”.
Nümayəndə heyətinin rəhbəri bildirib ki, Ermənistan və Ermənistanın ətrafında olan qüvvələr beynəlxalq arenada Azərbaycana uduzduqları üçün başqa taktika seçirlər:
“Biz orada Dağlıq Qarabağ həqiqətlərini qaldırırıq, Ermənistanın işğalçılıq siyasətini gündəmə gətiririk, Dağlıq Qarabağ münaqişəsinin Azərbaycanın ərazi bütövlüyü və beynəlxalq qanunlar çərçivəsində həll olunmasının vacibliyini vurğulayırıq və Ermənistan çətin vəziyyətə düşür. Azərbaycan nümayəndə heyətinə sanksiya tətbiq edərək, hansısa düzgün olmayan davranışla Azərbaycan haqqında mənfi rəy yaradacaqlarını düşünürlər. Burada erməni lobbisi ilə yanaşı, Azərbaycanın inkişafını gözü götürməyən qüvvələrin də rolu var".
S.Seyidov əlavə edib ki, Azərbaycanın Avropa ilə çox yaxşı münasibətləri var, ancaq bunu istəməyən qüvvələr Azərbaycanı bu yoldan çəkindirmək istəyirlər: "Lakin heç kim düşünməsin ki, biz bu meydanı tərk edəcəyik. Bizim bayrağımız Ulu Öndər Heydər Əliyev tərəfindən orada ucaldılıb. Bu bir imkandır, bir meydandır və biz bu meydandan istifadə edib Azərbaycan həqiqətlərini orada çatdıracağıq”.
Səməd Seyidov AŞ PA komitəsinin qərarını Azərbaycana qarşı növbəti ikili standartlarla dolu yanaşma kimi qiymətləndirib
S.Seyidov qeyd edib ki, Azərbaycan Avropa Şurasının müxtəlif strukturları ilə konstruktiv əməkdaşlıq edir: "Ancaq bu o demək deyil ki, Avropa Şurası daxilində Azərbaycana qarşı ikili standarlar mövcud deyil. Biz bunun dəfələrlə şahidi olmuşuq.
Dünən qəbul edilən qərar Azərbaycana qarşı növbəti ikili standartlarla dolu yanaşma kimi qiymətləndirilməlidir".
O bildirib ki, Avropa Şurasının rəhbərliyinə yazdığı məktubda Azərbaycana qarşı belə bir davranışın heç bir əsası olmadığını, Azərbaycana qarşı qeyri-obyektiv mövqe olduğunu və Azərbaycan əleyhinə olan qüvvələrin dəyirmanına su tökmək olduğunu qeyd edib.
S.Seyidovun sözlərinə görə, bu davranışın kökü ondan irəli gəlir ki, bir neçə müddət əvvəl AŞ PA-da xüsusi istintaq qrupu yaradılıb: “Biz bu istintaq qrupunun yaradılması ilə bağlı öz fikrimizi ortaya qoymuşduq ki, AŞ PA-nın ali prinsiplərindən biri qanunun aliliyidir, məhkəmə olmadan, hüquqi prosedur olmadan kimisə ittiham etmək qəti qadağandır. Məhz buna görə də bizə qarşı belə münasibət yarandı. Bizim fikrimiz özünü doğrultdu, həmin qrupun hesabatının böyük əksəriyyəti Azərbaycana qarşı yönəldi”.
Millət vəkili bildirib ki, AŞ PA-nın daxilində də qurumun fəaliyyətinin şəffaf olmadığı deyilir: “Azərbaycanla bağlı qəbul olunmuş sənədlərin əksəriyyəti mənfi xarakterlidir, ancaq Ermənistanla bağlı sənədlər müsbətdir. Necə olur ki, Ermənistanda bu qədər hadisələr baş verir, mövcud rejim xalq tərəfindən tarixin zibilliyinə atılır, ancaq Ermənistanla bağlı müsbət rəy var? Britaniyalı deputat bildirmişdi ki, bu məruzəyə Azərbaycanın adını salmaq düzgün deyil, ona görə ki, başqa ölkələrdəki prosesi araşdırmırsınıza, Azərbaycanın adını bura salmaq qeyri-obyektivdir. Bununla belə, həmin deputatın təklifi qəbul olunmadı. AŞ PA-da Azərbaycana qarşı fəaliyyətdə olan bir neçə qrup, o cümlədən Ermənistan lobbisi Azərbaycana əleyhinə belə addımlar atırlar”.
Xəbər xidməti
