“Rəsmi İrəvan hələ ki, danışıqları birtərəfli olaraq dayandırıb”
Məlum olduğu kimi, Azərbaycanın xarici işlər naziri Elmar Məmmədyarov ATƏT-in Minsk Qrupunun həmsədrləri ilə görüşüb. Görüşdə sülh prosesinin irəli aparılmasının mümkün variantları müzakirə edilib. E.Məmmədyarov Azərbaycanın münaqişənin tezliklə həlli üçün mahiyyətli və predmetli danışıqlara hazır olduğunu bəyan edib. Bununla yanaşı, E.Məmmədyarov Azərbaycanın münaqişənin tezliklə həll edilməsi üçün intensiv danışıqlara hazır olduğunu bəyan edib.
Qeyd edək ki, gələn ay həmsədrlərin Ermənistanın yeni rəhbərliyi ilə görüşü planlaşdırılır.
Reallıq ondan ibarətdir ki, Azərbaycan və Ermənistanda seçki prosesinin başa çatması danışıqların intensiv şəkildə davam etdirilməsini labüd edir. Ermənistanın yeni baş naziri Nikol Paşinyanın münaqişənin predmetinə aid olmayan tezislərinə Minsk Qrupunun həmsədrləri də münasibət bildirməlidirlər. Digər tərəfdən, Dağlıq Qarabağ probleminin nizama salınması ilə bağlı məsələdə, danışıqlarda iştirak statusu ilə bağlı Ermənistan siyasətçiləri arasında ciddi fikir ayrılığı yaşanır. Onlardan bəziləri hesab edir ki, Ermənistanı münaqişə tərəfi kimi təqdim etmək yanlışdır. Digərləri isə tamam fərqli mövqedən çıxış edərək, münaqişədə üç tərəfin olduğunu iddia edirlər. Eləsi var ki, danışıqlarda yalnız iki tərəfin olduğunu düşünür. Belə bir situasiyada E.Məmmədyarovun Azərbaycanın münaqişənin tezliklə həlli üçün mahiyyətli və predmetli danışıqlara hazır olduğunu bəyan etməsi nə kimi əhəmiyyət kəsb edir? Məsələyə münasibət bildirən politoloq Məhəmməd Əsədullazadə buna bir neçə rakursdan yanaşdı: “Ermənistanın yeni hakimiyyəti hazırda Qarabağ danışıqlarının formatının dəyişməsini, hətta masada olan təkliflər paketindəki prinsiplərə əlavələr etmək niyyətindədirlər. Göründüyü kimi, baş nazir N.Paşinyan da öz açıqlamalarında və XİN-in rəsmi nümayəndəsi də danışıqların mahiyyətini dəyişdirmək üçün bəyanatlar verirlər. Bu olduqca təhlükəli tendensiyadır və müharibə ehtimalını gündəmə gətirir. Azərbaycanın razılaşdığı Yenilənmiş Madrid prinsipləri var, həmin sənədi Ermənistan da qəbul edib. Həmin istiqamətdə danışıqlar gedir. Yeni Ermənistan hakimiyyətinin bu şərtləri birmənalı şəkildə qəbuledilməzdir. Azərbaycanın xarici işlər naziri E.Məmmədyarov da Minsk Qrupu çərçivəsində masada olan prinsiplər üzrə danışıqlara hazır olduğunu vurğulayır. Məmmədyarovun bu açıqlaması Ermənistan üçün bir mesajdır. Hesab edirəm ki, rəsmi İrəvan Minsk Qrupu həmsədrlərinin gözlənilən növbəti səfərində danışıqların hazırkı formatından çıxarsa, Ermənistanın tərəf kimi göstərilməsinə etiraz edərsə, bu, danışıqların sıfırlanmasına gətirəcək. Artıq Azərbaycanın seçim imkanı qalmayacaq. İşğal olunmuş ərazilərin qaytarılması üçün əməliyyatlara başlamalıdır. Rəsmi Bakı Moskva, Paris və Vaşinqtona Ermənistanın indiki mövqeyi ilə bağlı sorğu göndərməlidir. Ermənistan ordusu işğal etdiyi ərazilərdə hərbi təlimlər keçirməklə müdafiə imkanlarını inkişaf etdirir. Ermənistan hələ ki, danışıqları birtərəfli olaraq dayandırıb”.
Vidadi ORDAHALLI
